وفاقی داخلہ ءِ وزیر ءَ اسلام آباد ءَ الیکٹرک بس آنی واستہ نوکیں ڈپو ءُ چارجنگ سینٹر ءِ بنگیج کتگ، راوت ءَ را سروس ءِ تہ ءَ گیشی ءِ جار جتگ

اسلام آباد۔20فروری  (اے پی پی): وفاقی تہی کارانی وزیر محسن نقوی ءَ اسلام آباد بس سروس ءَ را راوت ءَ را گیش کنگ ءِ جار جتگ ءُ گوشت کہ اے بس آنی تہ ءَ روچے 125ہزار ءَ چہ 250ہزار ءَ سر کنگ ءِ ٹارگٹ اِنت۔ وفاقی دارالحکومت ءَ چاگرد دوستیں پبلک ٹرانسپورٹ ءِ دیمروئی ءِ نیمگ ءَ مزنیں گامگیج ءِ زورگ ءَ وفاقی وزیر داخلہ محسن نقوی ءَ الیکٹرک بس آنی واستہ نوکیں ڈپو ءُ چارجنگ سینٹر ءِ بنگیج کتگ۔ اے موہ ءِ سر ءَ آئی ءَ الیکٹرک بس ءَ سفر کنان ءَ سفری آسراتی آنی چار ءُ تپاسی ھم کت۔ افتتاحی مراگش ءِ ساھت ءَ سیادی داروکیں کارندہ آناں وفاقی وزیر ءَ را سرپد کت ءُ سرپدی دات کہ ڈپو ءَ 64چارجر ایر کنگ ءِ گنجائش است انت ایشی ءِ تہ ءَ 50 چارجر ایر کنگ بوتگ انت ءُ 14 زوت ایر کنگ بنت۔ یک چارجر ءِ تہا دو بس ءِ چارج کنگ ءِ صلاحیت است انت کہ آ بس دو کلاک ءَ چارج بہ کنت۔ اسلام آباد ءَ الیکٹرک بس 21 جتا جتائیں روٹ آنی سر ءَ روگ ءَ اَنت ءُ اے سرجمیں نظام گوگل ءِ گوما یکجا کنگ بیت تانکہ مسافر آنی واستہ آسانی بہ بیت۔ مراگش ءَ گوں گشتانک دیان ءَ محسن نقوی ءَ گوشت کہ اسلام آباد ءِ روچ ءَ یک لکھ بیست ءُ  پنچ ہزار  شہری اے بس آنی تہ ءَ سفر کنگ ءَ اَنت ایش زوت ماہانہ دو لکھ  پنجاہ ہزار  ءِ ٹارگٹ ءَ سر بنت۔ آئی ءَ جار جتگ کہ نوں الیکٹرک بس سروس راوت ءَ تاں دیم ءَ برگ بوھگ ءَ انت ءُ زالبول ءُ مردین نودربر آنی روٹ آنی سر ءَ ھاسیں دلگوشی دیگ بیت۔ وزیر داخلہ ءَ انکشاف کتگ کہ ایچ آئی ٹی پاکستان ءَ وت الیکٹرک بس آنی لوکل پروڈکشن بندات کنگ ءَ انت۔ آئی ءَ گوشت کہ پنڈی ءُ اسلام آباد ءِ نیام ءَ ریل ءِ سروس بحال کنگ بوھگ ءَ انت۔ میٹرو ءِ گوما الیکٹرک بس سروس ٹریفک ءِ جیڈھ آنی گیواری ءَ سک باز کمک ثابت بوھگ ءَ اِنت۔ مراگش ءَ چیف کمشنر اسلام آباد، آئی جی اسلام آباد پولیس، ڈپٹی کمشنر ءُ اے دگہ مزنیں افسراں ھم بھر زوری کت۔ محسن نقوی ءَ منصوبگ ءِ سوبمندیں سرجمی ءِ سر ءَ سرجمیں ٹیم ءِ کارکردگی ساڑات ءُ مبارک بات دات۔