نائب مزن وزیر سینیٹر محمد اسحاق ڈار ءَ نیویارک ءَ انڈونیشیا ءِ درئی کارانی وزیر سوگیونو  ءَ گوں گند ءُ نند کتگ، دیریں براتی سیادی آنی مھکم بوھگ ءِ سر ءَ وشھالی ءِ درشان

اسلام آباد۔19فروری  (اے پی پی): نیویارک ءَ اقوام متحدہ ءِ سلامتی کونسل ءِ فلسطین ءِ ھوالگ ءَ مزن تک ءِ دیوان ءِ ساھت ءَ انڈونیشیا ءِ درئی کارانی وزیر سوگیونو  ءَ گوں نائب مزن وزیر ءُ دری کارانی وزیر سینیٹر محمد اسحاق ڈار ءَ گند ءُ نند کت۔ پنچ شمبے ءِ روچ ءَ درئی کارانی کارگس ءِ رد ءَ دوئیں سروک آں دو نیمگی سیادی آنی سر ءَ چار ءُ تپاسی کتگ ءُ دوئیں ملک آنی نیام ءَ دیریں براتی سیادی آنی وسعت ءُ مھکمی ءِ سر ءَ دل یکیمی ءِ درشانی کتگ۔ دوئیں دری کارانی وزیر آں دمگی ءُ میاں اوستمانی جاور ھال آنی سر ءَ ھم گپ ءُ تران کت ءُ ھاسیں رنگ ءَ غزہ ءُ مغربی کنارہ ءِ جاور ھال آنی سر ءَ ھم گپ ءُ تران کت ءُ میاں اوستمانی کانود ءُ اقوام متحدہ ءِ ھمگرنچیں قرارداد آنی رد ءَ فلسطین ءَ انصاف ءِ، برجائی ءُ سرجمیں امن ءِ برجائی ءِ واستہ نزیکی ءَ گوں کمک کنگ ءِ سر ءَ تپاک کت۔ نائب مزن وزیر سینیٹر محمد اسحاق ڈار ءَ گوستگیں سال ءِ دسمبر ءَ انڈونیشیا ءِ صدر پروبوو سوبیانتو  ءِ پاکستان ءِ سوبمندیں تر ءُ تاب ءِ یات ءَ کنان ءَ تر ءُ تاب ءِ ھاسیں ارزشت ءِ سر ءَ زور پر دات۔ آئی ءَ گوشت کہ اے تر ءُ تاب ءَ چہ دو نیمگی کمک ءَ را نوکیں زور داتگ ءُ گوستگیں بازیں دہائی آنی تہ ءَ بوتگیں برجاھیں پیشرفت ءِ ساچشت انت۔