نائب مزن وزیر سینیٹر محمد اسحاق ڈار اقوام متحدہ ءِ سلامتی کونسل ءِ فلسطین ءِ بابت ءَ مزن تک ءِ دیوان ءَ بہر زوری

نیویارک۔19فروری  (اے پی پی): اقوام متحدہ ءِ سلامتی کونسل ءِ فلسطین ءِ ھوالگ ءَ مزن تک ءِ دیوان ءَ نائب مزن وزیر ءُ درئی کارانی وزیر سینیٹر محمد اسحاق ڈار ءَ بھر زوری کت۔ پنچ شمبے ءِ روچ ءَ دری کارانی کارگس ءِ رد ءَ نائب مزن وزیر ءَ مغربی کنارہ ءِ سر ءَ کنٹرول ءِ گیش کنگ ءِ اسرائیل ءِ نوکیں پیسلہ ، جنگ بندی ءِ برجاھیں خلاف ورزی ، ناجائزیں آبادکاری ءِ کار ءُ مقبوضہ فلسطین ءِ دمگ آنی جاور ھال ءَ را بدل کنگ ءِ کوشست آناں گوں زبردستیں رنگ ءَ مذمت کتگ ءُ ایشانی ھلاس کنگ ءِ لوٹ کتگ۔ سینیٹر محمد اسحاق ڈار ءَ اے موہ ءِ سر ءَ وتی بیان ءِ تہ ءَ امیت درشان کت کہ بورڈ آف پارٹی سلامتی کونسل ءِ قرارداد 2803 ءِ چیر دستی ءَ دائمی جنگ بندی ءِ راہ ءَ پچ کنت، انسانی کمک ءِ تہ ءَ مزنیں گیشی ءُ غزہ ءِ نوک جوڑیشت ءِ واستہ ٹھوس گامگیج آنی راہ پچ کنت۔ نائب مزن وزیر ءَ فلسطینی الس ءِ وت واجہی ءِ حق ءِ پیلو کنگ ءِ سر ءَ زور پر دات ءُ گوشت کہ اے یک معتبریں ءُ وھد ءِ بندوکیں سیاسی عمل ءِ وسیلگ ءَ ممکن اِنت کہ میاں اوستمانی کانود ءِ جواز ءُ اقوام متحدہ ءِ ھمگرنچیں قرارداد آنی رد ءَ اِنت۔ آئی ءَ گوشت کہ اے عمل ءِ گڈی مول ءُ مراد 1967ءَ چہ پیسر ءِ سیمسر آنی سر ءَ یک آجوئیں، وت واجہ ءُ جغرافیائی رد ءَ نزیکیں فلسطین ءِ ریاست ءِ جوڑ کنگ اِنت ءُ ایشی ءِ دارالحکومت القدس الشریف اِنت۔