مزن وزیر ءِ صنعت ءُ پیداوار ءِ بابت ءَ ھاسیں کمکار ہارون اختر خان ءَ پاکستان کیمیکل مینوفیکچررز ایسوسی ایشن ءِ ڈل ءَ گوں گند ءُ نند

اسلام آباد۔19فروری  (اے پی پی): پاکستان کیمیکل مینوفیکچررز ایسوسی ایشن ءِ ڈل ءَ پنچ شمبے ءِ روچ ءَ مزن وزیر ءِ صنعت ءُ پیداوار ءِ ھوالگ ءَ ھاسیں کمکار ھارون اختر خان ءَ گوں گند ءُ نند کتگ، ایشی ءِ تہ ءَ انجینئرنگ ڈویلپمنٹ بورڈ ءِ سی ای او حماد منصور  ھم ھوار بوتگ۔ گند ءُ نند ءِ تہ ءَ کیمیکل انڈسٹری ءِ دیم ءَ اوشتاتگیں جیڈھ، آیوکیں بجٹ ءُ پیش کرتگیں پیٹروکیمیکل پالیشی ءِ سر ءَ سرجمیں رنگ ءَ گپ ءُ تران کنگ بوت۔ اے موہ ءِ سر ءَ ھارون اختر خان ءَ گوشت کہ مزن وزیر محمد شہباز شریف ءِ اقتصادی دیمروئی ءِ وژن ءِ رد ءَ صنعت آناں مھکم کنگ حکومت ءِ اولی ترجی اِنت۔ آئی ءَ گوشت کہ اے وھد ءَ ملک ءِ صنعت آناں مزنیں یوٹیلیٹی کوسٹ، مزنیں ٹیکس ءُ گرانیں وام ءِ وڑیں جیڈھ آنی دیمپانی کنگ ءَ انت، البت حکومت اے جیڈھ آناں گیواری ءِ واستہ عملی گامگیج زورگ ءَ انت۔ آئی ءَ گوشت کہ ھمک صنعت ءِ دیمروئی ءُ لوکل مینوفیکچرنگ ءِ دیمروئی ءِ واستہ یک سرجمیں حکمت عملی ءِ جوڑ کنگ بوھگ ءَ انت۔ ہارون اختر خان ءَ گوشت کہ دیمروئی ءِ راہ پچ کنگ ءِ واستہ راجی صنعتی پالیشی تیار کنگ بوھگ ءَ اِنت، وھدیکہ صنعت وتی کیس ءُ تفصیلی تجزیہ پیش کت کن اَنت تانکہ آیوکیں بجٹ ءَ جوانیں تجویز ھوار کنگ بہ بنت۔ آئی ءَ گیش گوشت کہ مزن وزیر شہباز شریف ءِ سروکی ءَ حکومت سٹیک ہولڈر آنی شور ءُ سلاھ ءَ پد منصوبگ بندی کنت ءُ درستیں پیسلہ وت مہ وتی تپاکی ءَ چہ کنگ بنت۔ آئی ءَ گوشت کہ انجینئرنگ ڈویلپمنٹ بورڈ سیادی داروکیں صنعت آں گوں مشورہ کنگ ءَ پد پیٹروکیمیکل پالیسی پیش کنت وھدیکہ آیوکیں بجٹ پاکستان ءِ صنعت ءُ الس ءِ واستہ سازگال ءُ آسان بیت۔ ہارون اختر خان ءَ گوشت کہ مزن وزیر محمد شہباز شریف ءِ محنت ءِ سبب ءَ اقتصادی جاور ھال جوان بوھگ ءَ انت ءُ حکومت صنعتی شوبگ ءَ را زندگ کنگ ءِ واستہ جزمیگ انت۔