اقوام متحدہ نا 80 باسک ملک آتا مقبوضہ دیکی کنارہ غا کنٹرول ءِ ودفنگ نا اسرائیل نا ڈٹ انا مذمت

اقوام متحدہ۔ 18 فروری (اے پی پی) اقوام متحدہ نا 80 آن زیات باسک ملک آک مقبوضہ دیکی کنارہ غا کنٹرول ءِ ودفنگ و فلسطینی گل زمین نا بھلا رقبہ ءِ اسرائیلی ’’ریاست نا ملکیت‘‘ گوندنگ نا اسرائیل نا ڈٹ انا مذمت ءِ کرینو۔ الجزیرہ نا رداٹ اقوام متحدہ ٹی فلسطینی سفیر ریاض منصور سے شنبے نادے آ85 باسک ملک و چندی جہانی تنظیم تا سیوت نا کنڈآن ہیت کرسا پارینے کہ نن اسرائیل نا اسہ کنڈی فیصلہ و دیکی کنارہ ٹی اسرائیل نا غیرکانودی ساڑی گری ءِ ودفنگ کن گام گیج آتا ترندی اٹ مذمت ءِ کینہ۔ فلسطینی سفیر پارے  داوڑنا فیصلہ جہانی کانود نا رداٹ اسرائیل نا زمواری تا برخلاف ءِ و اودے دمدستی وڑاٹ بایدے پدی ہلنگے۔ اوپارے کہ نن مقبوضہ بیت المقدس نا دے ٹکی بشخ اتون اوار 1967 آن مقبوضہ فلسطینی گل زمین نا آبادیاتی ساخت، کڑد و حیثیت ءِ بدل کننگ کن غٹ گام گیج آتے مسترد کینہ۔ اومستی پارے کہ داوڑنا گام گیج جہانی کانود نا خلاف ورزی ءِ کیرہ، ڈیہہ اٹی امن و سوگوی کن برجاکوشست آتے نسخان ایترہ، جوان ڈٹ انا برخلاف ءِ و جھیڑہ غاتا چٹفنگ کن امن معاہدہ اسکان سرمننگ نا گمان تے خطرہ ٹی شاغک۔ اسیجائی بیان آ دستخط کروک آتیٹی آسٹریلیا، کینیڈا، چین، فرانس، پاکستان، روس، سویلی کوریا، سعودی عرب، ترکی، متحدہ عرب امارات، یورپی یونین، لیگ آف عرب اسٹیٹس و اسلامی کمکار تنظیم اوار ءُ۔ اسیجائی بیان 1967 آن پد دیکی کنارہ نا علاقہ ’’سی‘‘ ٹی ڈغار نا رجسٹریشن نافذ کننگ نا اسرائیل نا فیصلہ غان پد اولیکو وار جاری کننگانے۔ غیرکانودی آبادکاری نا چاروکی ءِ کروک آ تنظیم پیس ناؤ نا رداٹ ، ایریاسی دیکی کنارہ نا کم و ود 60 درسد علاقہ غا تالان ءِ۔ جہانی عدالت انصاف نا رداٹ ، کم و ود 465،000اسرائیلی آبادکار مقبوضہ دیکی کنارہ ٹی رہینگرہ، ہرا کم و ود 300 بستی و چوکی تیٹی تالان مسنو، ہراکہ جہانی کانود نا راٹ غیرکانودی ءِ۔