سینیٹ نا قائمہ کمیٹی قاعدہ و ضابطہ و استحقاق نا دیوان، سی ڈی اے نا گمشدہ فائل نا بابت رپورٹ، ایلو باندات آتا جاچ ءِ ہلنگا

اسلام آباد۔ 18 فروری (اے پی پی) سینیٹ نا قائمہ کمیٹی قاعدہ و ضابطہ و استحقاق نا دیوان چیئرمین کمیٹی سینیٹر سید وقار مہدی نا کماشی ٹی پارلیمنٹ ہاؤس اٹی اڈ ہلک۔ قائمہ کمیٹی نا دیوان اٹی کیپٹل ڈویلپمنٹ اتھارٹی (سی ڈی اے) نا گمشدہ فائل نا بابت سینیٹ نا فنکشنل کمیٹی حکومتی یقین دہانی تا رپورٹ نا جاچ ءِ ہلنگا وخت اس کہ سینیٹرآتا کنڈآن پیش کروک چندی استحقاق تحریک آتیا ہم سجفنگا۔ قائمہ کمیٹی نا دیوان اٹی سینیٹر حافظ عبدالکریم ، سینیٹر روبینہ خالد، سینیٹر جان محمد و سینیٹر دوست علی جیسر ئسک بشخ ہلکر۔ سینیٹر کامران مرتضیٰ ، سینیٹر عبدالشکور خان، سینیٹر شہادت اعوان و سینیٹر بلال احمد خان ئسک استحقاق تحریک آتا محرکین آتا وڑاٹ وخت اس کہ سینیٹر بشریٰ انجم زوم انا کمک اٹ قائمہ کمیٹی نا دیوان اٹی بشخ ہلک۔ قائمہ کمیٹی سینیٹ نا فنکشنل کمیٹی حکومتی یقین دہانی تا چیئرمین کمیٹی نا کنڈآن پیش کروک تحریک استحقاق آ اسلام آباد نا سیکٹر 1-10/4اٹی واقع مکان نمبر 622 نا گمشدہ فائل نا باندات آ سجفنگا۔ کمیٹی ءِ معلومدار کننگاکہ دا باندات عدالت اٹی زیرسماعت ءِ۔ ولے کمیٹی گونداکہ سی ڈی اے دا باندات ءِ جوانی اٹ مون آ دپننگ ءِ و اصل زموار یعنی غٹ آن مست مالک نا برخلاف کارروائی کننگ نا جاگہ غا ساڑی مالک مکان ہراکہ چارمیکو خریدار ءِ، ءِ سزاتننگ نا تاثر تننگ ءِ۔ چیئرمین کمیٹی سینیٹر سید وقار مہدی سی ڈی اے نا ڈیوالئی آ ترندی نا درشانی ءِ کرسا اتھارٹی ءِ پارت کرے کہ ساڑی مالک ءِ عدالت نا گڈیکو فیصلہ تون مشروط عارضی نوڈیمانڈ سرٹیفکیٹ (این ڈی سی) جاری کننگے۔ داکان بیدس سی ڈی اے ءِ پارت کننگاکہ باندات ءِ زوت آن زوت ایسری انجام اسکان سرکرسا عملدرآمد رپورٹ کمیٹی ٹی پیش کننگے۔ چیئرمین کمیٹی داہیت آ زور شاغا کہ داباندات براہ راست سی ڈی اے نا ساکھ ءِ زہمی کیک۔