وزیر واپار جام کمال خان تون پاکستان کیمیکل مینو فیکچررز ایسوسی ایشن نا ڈل انا اوڑدہی

اسلام آباد۔ 18 فروری (اے پی پی) بنجائی وزیر واپار جام کمال خان تون پاکستان کیمیکل مینو فیکچررز ایسوسی ایشن نا اسہ ڈل اس اوڑدہی کرے ہراٹی کیمیکل سیکٹر ءِ مون  تروک چیلنج آتا جاچ و ملکی صنعتی و برآمدی فریم ورک ءِ سوگو کننگ کن پنجر جاتی اصلاحات نا بارواٹی گپ وتران کننگا۔ وزیر واپار پارے کہ پاکستان نا زرگزرانی چیلنج بیرہ پالیسی نا بابت آخا بلکن زیات تر گورننس و عملدرآمد نا خلاتون گنڈوک ءِ۔ اوپارے کہ اندرونی اصلاحات داہیت ءِ پک کننگ کن اہم ءِ کہ واپاری و صنعتی پالیسیک حقی شونداری ٹی تینا کڑد ءِ ادا کیر۔ جام کمال خان پارے کہ سیکٹرل کونسلز نا رداٹ سیکٹرل پلاننگ ءِ ادارہ جاتی جوڑ کننگ نا گرج ءِ ہراٹی متعین ملکیت، پیدوار مینڈیٹ و وختی ڈلیوری ایبلز اوار ءُ۔ اوپارے کہ سیکٹرل کونسلز ءِ ڈسکشن فورم آتیان مون آ دننگ و پاکستان نا گیشتر پنچ سال انا شونداری فریم ورک تون ہم گرنچ مریس مدی اقتصادی ڈٹ بندی کن گچین پلیٹ فارم اس بایدے جوڑ مرے۔ بنجائی وزیرپارے کہ قومی پالیسی نا تہہ ٹی ساختی صنعتی ڈٹ بندی ءِ اوار کننگ آن  ہم گرنچی و جوابدہی ٹی نمان گچینی بریک۔ اوپارے کہ ٹیکسٹائل نا بشخ بے کچ اہمیت تخک زرگزرانی لچک ءِ پک کننگ کن کیمیکلز، فارماسیوٹیکل، سرجیکل گڑا، فوڈ پراسیسنگ و ویلیو ایڈڈ مینو فیکچرنگ کون آ بشخ آتے بایدے سوگو کننگے۔ اوپارے کہ وزیراعظم محمد شہباز شریف نا گیشتر زرگزرانی وژن غیرروایتی برآمدی بشخ آتیکن وارخواہی تے ودفنگ آ زور شاغک۔ جام کمال خان پارے کہ پاکستان دا ملک آتون سٹریٹجک وڑاٹ رابطہ بایدے تخے ہراڑے اہم واپاری عدم توازن ساڑی ءِ۔ اوسلاہ پیش کرے کہ گڑاس ملک آتیان بھلو کچ اسے آ درآمدات آتا دروشم اٹی پاکستان واپاری توازن نا نتیجہ غاتے گچین کننگ کن گچین ملکی مصنوعات آتیکن اولیتی منڈی اسکان رسینگ دوئی کننگ کیک۔