ملک اٹی براہ راست درملکی زرکاری ٹی برجامالی سال انا اولیکو ششماہی ٹی کمتی

اسلام آباد۔ 18 فروری (اے پی پی) ملک اٹی براہ راست درملکی زرکاری ٹی برجامالی سال انا اولیکو ششماہی ٹی سالانہ بنداو تیا کمتی ریکارڈ کننگانے۔ اسٹیٹ بینک انا حساب وکتاب نا رداٹ مالی سال انا اولیکو ششماہی ٹی ملک اٹی 981 ملین ڈالر نا براہ راست درملکی زرکاری ریکارڈ کننگا ہرا تدوک آمالی سال انا ہند امد انا مقابلہ ٹی 41 درسد کم ءِ۔ تدوک آ مالی سال انا ہند امد اٹی ملک اٹی 1.661ارب ڈالر نا براہ راست درملکی زرکاری ریکارڈ کننگاسس۔ جنوری ٹی ملک اٹی 173 ملین ڈالر نا براہ راست درملکی زرکاری مس ہرا تدوک آ سال جنوری نا مقابلہ ٹی 27 درسد کم ءُ۔ تدوک آ سال جنوری ٹی ملک اٹی 236 ملین ڈالر نا براہ راست درملکی زرکاری ریکارڈ کننگاسس۔ دسمبر نا مقابلہ ٹی جنوری ٹی براہ راست درملکی زرکاری ٹی ماہانہ بنداوتیا ودکی ریکارڈ کننگا۔ جنوری ٹی چین درملکی زرکاری نا بابت غٹ آن بھلا ملک ئس، جنوری ٹی چین پاکستان اٹی 73 ملین ڈالر نا براہ راست زرکاری کرے، ہندا وڑ سوئٹزرلینڈ 17 ملین ڈالر و یواے ای 14 ملین ڈالر نا زرکاری تون بالترتیب ارٹ میکو و مسٹ میکو نمبر آ ئس۔ جنوری ٹی برطانیہ پاکستان اٹی 9 ملین ڈالر، سویلی کوریا 8 ملین ڈالر، کویت 9 ملین ڈالر، جاپان 4 ملین ڈالر و ایلو ملک آک جم وڑاٹ 15 ملین ڈالر نا براہ راست درملکی زرکاری کریر۔ حساب وکتاب نا رداٹ جنوری ٹی بجلی نا بشخ اٹی 71 ملین ڈالر، مالیاتی بزنس  61 ملین ڈالر، برقی مشینری 13 ملین ڈالر، خذمت 12 ملین ڈالر، خور 3ملین ڈالر ، الیکٹرانکس 8 ملین ڈالر، پیٹرولیم ریفائنگ 6 ملین ڈالر، ٹرانسپورٹ ازباب 5 ملین ڈالر، ٹیکسٹائل 4 ملین ڈالر، فارما 2 ملین ڈالر و ایلو بشخ آتیٹی 12 ملین ڈالر نا براہ راست درملکی زرکاری مس۔