راجی اسمبلی ءِ اسپیکر سردار ایاز صادق ءَ باجوڑ ءَ سیکورٹی چیک پوسٹ ءِ سر ءَ فتنہ الخوارج  ءِ ناشرکارانی ارش ءِ مذمت

اسلام آباد۔17فروری  (اے پی پی): راجی اسمبلی ءِ اسپیکر سردار ایاز صادق ءَ باجوڑ ءَ سیکورٹی چیک پوسٹ ءِ سر ءَ فتنہ الخریج ءِ ناشرکار آنی نیمگ ءَ اُرش ءِ سک باز مذمت کتگ ءُ گران بھائیں انسانی جانانی تاوان ءِ سر ءَ سک باز رنج ءُ گم ءِ درشانی کتگ۔ سئے شمبے ءِ روچ ءَ وتی مذمتی بیان ءِ تہ ءَ آئی ءَ 12خوارج ناشرکارانی کوش ءِ سر ءَ سیکورٹی فورسز ءَ را شگر ءُ منت پیش کتگ۔ اسپیکر راجی اسمبلی ءَ ناشرکاری اُرش ءَ را ناکام کنگ ءِ وھد ءَ 11 بہادریں سپاھیگ آنی جان ءِ بیرانی ءِ سر ءَ سکیں دلپدردی ءُ رنج ءِ درشان کت۔ اسپیکر سردار ایاز صادق ءَ شہیدانی دلیری ءُ بہادری ءَ را شگر ءُ منت گپت ءُ شہیدانی کھول ءِ گوما دل ءِ جہلانکی ءَ دلپدردی ءُ ہمدردی ءِ درشانی کت۔ آئی ءَ گوشت کہ ناشرکاری ءِ ھلاپ ءَ جنگ ءَ وتی سر ندر کرتگیں راج ءِ بامردیں زھگ آنی ابدمانیں قرجوڑیشتکار شموشگ نہ بنت، راج ءَ را وتی شہید آنی قرجوڑیشتکار مدام یات بنت۔ آئی ءَ گوشت کہ ناشرکار وتی نا شریں ارادہ ءُ بدیں عناصر آنی تہ ءَ کدی سوبمند نہ بنت، ناشرکاری ءِ ھلاپ ءَ جنگ ءَ سرجمیں راج سیکورٹی فورسز ءِ گوما اوشتاتگ۔ راجی اسمبلی ءِ اسپیکر ءَ ناشرکاری اُرش ءَ چہ ٹپیگ بوتگیں لس مردم آنی زوت جان سلامتی ءِ دعا کنان ءَ گوشت کہ سیکورٹی فورسز ءِ آپریشن داں ناشرکاری ءِ سرجمیں ھلاسی ءَ برجاہ مان ایت۔ راج ءِ بہادریں سپاھیگ ءُ بے گناہیں شہری آنی قرجوڑیشتکار بے سوب نہ رو اَنت، سرجمیں راج ملک ءَ ناشرکاری ءِ سرجمی ءَ ھلاسی ءِ واستہ یکجاھ اِنت۔ راجی اسمبلی ءِ اسپیکر ءَ چہ اللہ تعالیٰ ءَ دزبندی کت کہ شہیدانی رُتب برز بہ کنت ءُ پشومانی ھاندان ءَ صبر ءُ اوپار بہ دنت۔