پاکستان، آسٹریا ءَ دوستی ءُ کمکی سیادی ءِ دوبر پدر کنگ ءَ انت، تجارت ءُ سرمایہ کاری ءَ ھوار جتا جتائیں پڑ آنی تہ ءَ دو نیمگی سیادی ءَ را گیش مھکم کنگ ءِ  جزم

اسلام آباد۔17فروری  (اے پی پی): پاکستان ءُ آسٹریا ءَ وتی دوستی ءُ کمکی سیادی ءِ دوبر پدر کتگ ءُ تجارت ءُ سرمایہ کاری ءَ ہوار جتا جتائیں شوبگ آنی تہ ءَ دو نیمگی سیادی ءَ را گیش مھکم کنگ ءِ وعدہ کتگ۔ آسٹریا ءِ مزن وزیر ءِ دو نیمگی تر ءُ تاب ءِ ھوالگ ءَ دری کارانی وزارت ءِ نیمگ ءَ چہ جاڑی بوتگیں یکجائی بیان ءِ رد ءَ آسٹریا ءِ فیڈرل چانسلر کرسچن اسٹوکر ءَ 16فروری ءَ پاکستان ءِ مزن وزیر محمد شہباز شریف ءِ سرکاری تر ءُ تاب ءِ سر ءَ وش آتک کتگ۔ پاکستان ءَ 1956 ءَ دوئیں رہشوناں دوستی ءُ کمکی سیادی ءِ دوبر پدر کنگ ءُ اقتصادی کمک، تجارت ءُ سرمایہ کاری ءَ ھوار جتا جتائیں پڑ آنی تہ ءَ دو نیمگی سیادی ءَ را گیش مھکم کنگ ءِ وعدہ کتگ۔ دوئیں نیمگاں جھان ءِ دیمروئی آنی سر ءَ چار ءُ تپاسی کت ءُ امن ءُ ایمنی ، برجمیں دیمروئی ءُ انسانی ھک آنی دیمروئی ءِ چیلنج آنی گیواری ءِ تہ ءَ اقوام متحدہ ءِ مرکزی کرد ءِ سر ءَ تپاک کت۔ آہاں اقوام متحدہ ءِ منشور ءِ مول ءُ مراد ءُ اصولانی سرا باز جہتی نظام ءُ رہبندانی سرا مبنی میاں اوستمانی نظم ءِ ھاتر ءَ وتی بے مٹیں حمایت ءِ درشانی کت ءُ اقوام متحدہ ءِ نظام ءَ را مھکم کنگ ءِ ھاتر ءَ یکے دومی ءِ کمک ءَ را گیش دیمروئی دیگ ءِ سرا تپاک کت۔ دوئیں رہشوناں تجارت ءُ سرمایہ کاری، سیل ءُ سواد، مہمان نوازی، وانگ ءُ زانگ، آئی ٹی، جان سلامتی، انسانی وسائل ءِ دیمروئی ءُ مزدور ءِ نقل و حرکت ءِ پڑ ءَ کمک ءَ را گیش کنگ ءِ توانائی ءِ سر ءَ ھم چار ءُ تپاسی کت۔ اے درگت ءَ اے پڑ آنی تہ ءَ زیر ھیال ءُ لیکہ ءِ تہ ءَ جتا جتائیں مفاہمت نامہ آناں زوتاں چہ زوت ءَ را گڈی رنگ ءَ جوڑ کنگ ءِ سر ءَ تپاک کت۔ رہشون آنی نیام ءَ یک پہ یک ءَ گند ءُ نند ءُ ڈل ءِ تک ءَ گپ ءُ تران ءَ ابید آسٹریا ءِ وفاقی چانسلر ءُ مزن وزیر ءَ آسٹریا ءُ پاکستان ءِ نامداریں کمپنی آنی فورم ءِ ھم سروکی کتگ۔ اے گپ ءِ سر ءَ تپاک کنگ بوت کہ دو نیمگی تبادلہ ءُ کمک ءَ را استیں ءُ آیوکیں فریم ورک ءِ وسیلگ ءَ ءُ پیسر ءَ چہ جوڑ بوتگیں گپ ءُ تران ءُ مذاکرات ءِ نظام ءِ بنیات ءَ گیش دیمروئی دیگ بیت۔ پاکستان ءِ مزن وزیر ءَ آسٹریا ءِ بزنس کمیونٹی ءُ کمپنی آناں اپریل 2026 ءَ اسلام آباد ءَ برجم دارگ بوھوکیں یورپی یونین ءُ پاکستان بزنس فورم ءَ بھر زوری ءِ دعوت دات۔آئی ءَ فیڈرل چانسلر کرسچن اسٹوکر ءَ را ھم نزیکیں وھد ءَ پاکستان ءِ تر ءُ تاب ءِ دعوت دات۔