بنجائی وزیر جان جوڑی تمیر نا بنداوی جان جوڑی ہند ءِ ڈیجیٹائز کرسا ٹیلی میڈیسن سروس نا بناءِ کرے، شاریک داسہ چاہندار ڈاکٹر آتیان آن لائن درمان، سلابت و دوائی ہلنگ کیرہ، مصطفیٰ کمال

اسلام آباد۔ 17 فروری (اے پی پی) بنجائی وزیر جان جوڑی مصطفیٰ کمال اسلام آباد نا نواحی علاقہ تمیر نا بنداوی جان جوڑی ہند ءِ ڈیجیٹائز کرسا ٹیلی میڈیسن سروس نا بناءِ کرے ہرانا کمک اٹ مرمر انگا علاقہ غاتا شاریک داسہ چاہندار ڈاکٹر آتیان آن لائن درمان، سلابت و دوائی اُراٹی تولوک دوئی کننگ کیرہ۔ اوپارےکہ وزیراعظم محمد شہباز شریف نا کماشی ٹی وزارت جان جوڑی پالیسی سازی آن مست جان جوڑی نا نظام نا سرجمی اٹ جاچ ءِ ہلک و بھلا ہسپتال آتا جاگہ غا اُراتا خڑک ساڑی بیسک ہیلتھ یونٹس (بی ایچ یو) ءِ سوگو کننگ نا حکمت عملی اس اختیارکرے۔ اسلام آباد نا خلقی آبادی کن جان جوڑی نا بشخ اٹی اسہ اہم پیش رفت اسے نا وڑاٹ تمیر نا بنداوی جان جوڑی ہند ءِ ڈیجیٹائز کرسا ہموڑے پوسکن آ ٹیلی میڈیسن سینٹر نا بناءِ کننگانے۔ بنائی دود آن تران کرسا بنجائی وزیر جان جوڑی مصطفیٰ کمال پارےکہ ساڑی حکومت جان جوڑی نا نظام اٹی اصلاحات نا رداٹ بھلا ہسپتال آتیا بھاریم کم کننگ و بنداوی جان جوڑی ہند آتے فعال کننگ آ زور شاغانے، ہیلتھ کیئر نا مسخت بیرہ مریض نا درمان آخا بلکن ناجوڑی تیان بچفنگ پک کننگ ءِ۔ اوپارے کہ چنکا مرض یا بلڈ پریشر کون آ ویل آتیکن مر مر انگا بھلا ہسپتال آتا رُخ ءِ کننگ آن نئے بیرہ مریض آتے مشکلات آتون مون تروئی تمک بلکن انتظامیہ غاہم ودکی زور ودک۔ ٹیلی میڈیسن جان جوڑی نا بشخ اٹی اسہ حقی انقلاب اس جوڑمریک ہراڑآن خاص کر مرمر انگا و پدسلوک علاقہ غاتا الس ءِ دمدستی و آب اٹ طبی آسراتی دُوبریک ۔ اوپارے کہ پوسکن آٹیکنالوجی فاصلہ نا اڑاند ءِ چٹفسا درمان ءِ بے کچ آسان جوڑ کرینے و داسہ شاری تینا علاقہ غاتیٹی رہینگسا چاہندار ڈاکٹر آتون سلابت دوئی کننگ کیرہ۔ مصطفیٰ کمال پارے کہ ٹیلی میڈیسن سینٹر آتیٹی نئے بیرہ ناجوڑ بلکن ڈاکٹر آتا کارکڑد ناہم گچین مانیٹرنگ ءِ کننگک تانکہ درمان نا آب ءِ پک کننگ مرے۔ اوناپاننگ ئس کہ حکومت دانظام نا کمک اٹ خاص کر نیزگار و کم وسیلہ تخوک آ تپہ غاتیکن درمان ءِ اڑزان ، آسان و قابل رسینگ جوڑ کننگ خواہک۔