باجوڑ اٹی سیکورٹی فورس آتا چیک پوسٹ آ فتنۃ الخوارج  آتا جلہو بے سہب، ورندی کارروائی ٹی 12 جہنمی ، بارود آن پُر گاڈی چیک پوسٹ اتون ڈوک لگنگ نا سوب 11 ورنا و اسہ کودک چناس شہید، 7 بندغ ٹھپی مسر، آئی ایس پی آر

راولپنڈی۔ 17 فروری (اے پی پی) سیکورٹی فورس آک باجوڑاٹی سیکورٹی فورس آتا چیک پوسٹ آ ’’فتنۃ الخوارج‘‘ آتا جلہو ءِ بے سہب کریر و ورندی کارروائی ٹی 12 دہشت گردآتے جہنمی کریر ، بارودی گاڈی نا ڈوک لگنگ آن انفراسٹرکچر بھس مننگ آن 11 ورنا و اسہ کودک چناس شہید، 7 بندغ ٹھپی مسر۔ آئی ایس پی آر نا رداٹ 16 فروری 2026 آ ضلع باجوڑ اٹی سیکورٹی فورسز و کانود نافذ کروک آ ادارہ غاتا اسیجائی چیک پوسٹ آ بھارتی آلہ کار و پراکسی تنظیم’’فتنۃ الخوارج‘‘ نا دہشت گرد آک لغوری اٹ جلہو کریر۔ جلہو گیر آک چیک پوسٹ انا سیکورٹی ءِ پرغنگ نا کوشست کریر ولے سیکورٹی فورس آک بے کچ چوکسی و عزم انا درشانی ءِ کرسا دہشت گرد آتا داناپاک عزم ءِ مش تا کریر۔ پاک فوج انا بہادر ورناک کسبی مہارت و بے مٹ جیرت اتون ورندی کارروائی کریر و نروک آ خوارج آتے شست کرسا 12 خوارج آتے جہنمی کریر۔ ترجمان پاک فوج پارے کہ بے سہبی ومایوسی نا عالم اٹ جلہو گیر آک بارود آن پُر گاڈی ءِ چیک پوسٹ نا رکھی دیوال اتون خلکر۔ دھماکہ نا شدت داخہ در زیات ئس کہ چیک پوسٹ نا انفراسٹرکچر تما ہرانا نتیجہ ٹی دھرتی نا 11 بہادر گلزادہ غاک تینا جان تے ندر کرسا شہیدی نا جام ءِ نوش کریر۔ دھماکہ غان چیک پوسٹ نا خڑک واقع شاری آبادی نا ہند آتے ہم بھاز نسخان رسینگا ہرانا نتیجہ ٹی اسہ کودک چناس شہید وخت اس کہ زالبول و چناتتون اوار 7 بندغ ٹھپی مسر۔ آئی ایس پی آر نا پاننگ ءِ کہ علاقہ ٹی گمانی وڑاٹ ساڑی پین بھارتی سرپرستی ٹی کاریم کروک آ خارجی نا چٹفنگ کن سینیٹائزیشن آپریشن برجاءِ۔ پاکستان نا سیکورٹی فورسزو  کانود نافذ کروک آ ادارہ غاک بنجائی اپیکس کمیٹی نا نیشنل ایکشن پلان نا رداٹ منظور مروک وژن’’عزمِ استحکام‘‘ نا رداٹ ملک آن درملکی سرپرستی و مخ تف دہشت گردی نا ناسور ءِ ماس کش کننگ کن سنبرینگوک ءُ۔ ننا بہادر سپاہی و کودک شاری تا داعظیم قربانی لمہ وطن نا دفاع کن ننا بدل مفروک عزم ءِ پین سوگوی ایتک۔