صدر مملکت نا ترجمان نا کاریم نا جاگہ غا زالبول ءِ زیزاریفنگ آن رکھ انا بنجائی محتسب نا فیصلہ نا بارواٹی سوشل میڈیا غا ہوکاتا بابت وضاحت

اسلام آباد۔ 17 فروری (اے پی پی) صدر مملکت نا ترجمان ہیلتھ سروسز اکیڈمی نا بابت کارروائی وکاریم نا جاگہ غا زالبول آتے زیزاریفنگ آن رکھ انا بنجائی محتسب نا فیصلہ نا بارواٹی سوشل میڈیا غا پیری کنوک آ ہوکاتا بابت وضاحتی بیان اٹی پارینے کہ بنجائی محتسب نا پرمان نا برخلاف کانود نا رداٹ اسہ درخواستِ نظرثانی ایوانِ صدر ءِ دوئی مسنے۔ سے شنبےنادے آ ایوانِ صدر نا میڈیا ونگ نا رداٹ بنجائی محتسب ادارہ اصلاحات ایکٹ 2013نا دفعہ 14(2) انا رداٹ داوڑنا درخواست دائر مننگ آ تعلقدار پرمان آ عملدرآمد 60 دے اکن خودکار وڑاٹ توننگک۔ بیان نا رداٹ داکارروائی کانود نا خواست آتا رداٹ کننگک و دانا ہرگز دامطلب اف کہ تعلقدار بنغ ءِ دوبہ غاتیان بری گوندنگانے یا گڈیکو وڑاٹ بحال کننگانے۔ بیان اٹی مستی پاننگانے کہ پورو سرکاری ریکارڈ تعلقدار فورم آن بٹنگ انگانے تانکہ اودے ہُننگ آن پد باندات مجا ز اتھارٹی نا مون آ کانود نا رداٹ فیصلہ کن پیش کننگ مرے۔ بیان نا رداٹ دادعویٰ درست اف کہ دوبہ دار ءِ صدر نا کنڈآن بری گوندنگانے یا اودے حتمی ریلیف تننگانے۔ باندات زیرجاچ ءِ و اونا فیصلہ سختی اٹ کانود نا رداٹ کننگک ۔ صدرِ پاکستان آئین و ملکی کانود نا رداٹ ہی گا م گیج کننگ نا پابندءِ۔ ترجمان پارے کہ الس ومیڈیا غان خواست ءِ کہ داباندات اٹی قیاس آرائی آن پاناد کیر۔