وزیراعظم نا ویانا ٹی اقوام متحدہ نا کنڈآن ’’پائیدار شونداری، جہانی امن و شونہالی نا کسر ‘‘ نا سرحال آ دود آن تران

ویانا۔ 17 فروری (اے پی پی) وزیراعظم محمد شہبازشریف کرہ ارض ءِ مون تروک جہانی تنکی تے تالان کرسا پارینے کہ غیر حل شدہ سیاسی جھیڑہ غاک حالیت آتے بارود نا ڈھیر اٹ بدل کننگ ءُ، سفارتکاری، گپ وتران و مکالمہ جھیڑہ غاتے توننگ نا اسٹ انگا ذریعہ ءِ، پائیدار شونداری بایدے عدل وانصاف آ تالان مرے داکان بیدس جہانی امن مدامی کن تغ اس ہی سلک، اقوام متحدہ ءِ مہالو آن بھاز زیات سوگو، جوان وسیلہ غاتیان شپ و اصلاح شدہ ادارہ اس جوڑ کننگے تانکہ دا جہانی کمکاری نا مرکزی تمبہ نا وڑاٹ کاریم کرسا کے۔ او سے شنبے نادے آ داڑے اقوام متحدہ نا کنڈآن ’’پائیدار شونداری ، جہانی امن و شونہالی نا کسر‘‘ نا سرحال آ خصوصی دودآن تران کریکہ۔ وزیراعظم پاکستان و اقوام متحدہ نا چندی ادارہ غاتا نیام اٹ کمکاری نامعاہدہ غاتیا دستخط نا دود اٹی ہم بشخ ہلک۔ دامعاہدہ غاتیٹی یواین آئی ڈی او پروگرام کنٹری پارٹنر شپ پاکستان(2025آن 2030)، یواین او ڈی سی کنٹری پروگرام پاکستان و انسٹیٹیوٹ آف نیوکلیئر میڈیسن اینڈ آنکالوجی لاہور (انمول) و آئی اے ای اے نا نیام اٹ کمکاری نا معاہدہ غاک اوار ءُ۔ خصوصی دود اٹی نائب وزیراعظم و وزیرخارجہ اسحاق ڈار آن بیدس ویانا ٹی ساڑی جہانی تنظیم تا ڈائریکٹرجنرلز و سفارتی مشن تا آخبتی نمائندہ غاک ہم بشخ ہلکر۔ وزیراعظم دود آن تران کرسا پارے کہ اوڑکن اقوام متحدہ نا ویانا دفتراٹی دا مچی آن تران اعزاز نا ہیت اسے، دا شار بھلو وخت اسے آن سفارتکاری، کثیر الجہتی کمکاری و گپ وتران نا کمک اٹ امن نا پٹنگ نا چیدہ ءِ۔ اوپارے کہ اینو نن اسہ ہندن ءُ لمحہ سے ٹی جمع مسونن  ہرا جہانی بدلی و گھمبیر نتیجہ غاتا حامل ءِ، دنیا داوخت آ چورائے آ سلوک ءِ و نن تنکی تتون مون تننگ اُن، ننا دور انا غٹ آن بھلا اندیشہ اسٹ انگا خطرہ اف بلکن جغرافیائی و سیاسی دشمنی، موسمیاتی تنکی تون اوار کیہی خطرہ غاتا مجموعہ ءِ۔ وزیراعظم پارے کہ بھاز انگا عوامل نزوری نا سوب جوڑ مننگ ءِ ، کرہ ارض ءِ اسہ وخت آ کیہی تنکی تا مون تروک ءِ، ودوک آ جہانی آبادی ترندی اٹ ننا سیارہ ءِ محدود قدرتی وسیلہ غاتے چٹفنگ ءِ، غیرحل شدہ سیاسی جھیڑہ غاک داحالیت آتے پین ودفنگ ءُ و اودے بارود نا ڈھیر اٹی بدل کننگ ءُ۔ وزیراعظم پارے کہ نیزگار، وام تا جال، بھلو کچ اسے آ ہمپ و بٹ  ، ہن و بر پین بھلاخطرہ ءِ ہرا دنیا ءِ رہینگ انگ کن پین خطرناک جاگہ اس جوڑ کننگ ءِ، پائیدار امن، ہرا ننا دور انا تنکی تا مقابلہ ءِ کننگ کے، نا اسہ ہی کسر ءِ و او پائیدار شونداری نا کسر ءِ، اسہ ہندن ءُ پائیدار شونداری اس ہراٹی کس اس پدی سلپ، داانسانیت کن وخت انا گرج ءِ۔ وزیراعظم پارے کہ شونداری ءِ ہمو وخت اسکان پائیدار کننگ مفک ہراتم اسکان دا لکھ آ بندغ آتے گچین زند انا ضمانت فراوان کپ، ہنداسوب آن ننے ہر حال اٹ ہندن ءُ پالیسی تینا کروئی مریک ہراٹی غٹ انا شمولیت مرے، راجی رکھ فراوان مرے و وسیلہ غاتا انصاف اٹ بشخنگ ءِ پک کننگے، نن بیرہ ہمو دروشم اٹ زند انا آب آتے بڑز کننگ کینہ، بے بریبری ءِ کم کننگ کینہ و ہندن ءُ راج اسے نا تعمیر ءِ کننگ کینہ ہراڑے شونہالی غٹ اکن مرے و انسانی وقار ملحوظ خاطر سلے۔ اوپارے کہ پائیدار شونداری اسہ عالمگیر ہدف اسے، ننے امنا کروئی مریک کہ دانا بھاریم و فائدہ قوم تیٹی بریبر بشخنگتور، پدتموک ملک آک مچ آ دنیا ٹی چاگڑد کن مضرگیس آتا اخراج اٹی غٹ آن کم بشخ شاغرہ ولے موسمیاتی بدلی، وام تا فریشانی و زرگزرانی شیف و بڑزی نا غٹ آن بھلا قیمت ءِ اداکننگ ءُ۔ اوداچرجوئی ٹی پاکستان نا مثال ءِ تس ہرا موسمیاتی تنکی نا مون اٹی ءِ وداٹی پاکستان نا ہچ ءُ غلطی اس اف ولے نن موسمیاتی تنکی نا پدریسہ اثرآتون مون تننگ اُن۔ وزیراعظم دنیا ءِ پاکستان اٹی 2022 نا بھسکار نوکاپ نا یات ترفے ہرا ہزار آ جان تے درے ، ہزار ایکڑ آ سلوک فصل آتے درے و لکھ آ اُراک بھس مرسا تمار۔ اوپارے کہ تدوک آسال بدبختی اٹ دُوارہ نوکاپ بس و مہالو آن ہ زیات بھسکاری کرے ، داآفت آک اُرا، فصل و بنداوی پنجر ءِ بھس کننگ آن کیہی زیات نسخان نا سوب ءُ و انسانی سلامتی ءِ اونا ماس آن خورک کیک ہندا سوب آن پائیدار شونداری انصاف ، عدل و انصاف نا وڑوڈول آتیا بایدے تالان مرے۔ دااصول آتیان بیدس جہانی امن مدامی کن تغ اس ہی سلک۔ وزیراعظم پارے کہ چیلنج آتیان پد ہم ، پاکستان پائیدار شونداری نا ہدف آتون پختہ وڑاٹ وابستہ ءِ، نن پائیدار شونداری نا ہدف آتے دا امنا کرسا تینا قومی شونداری ڈٹ بندی ٹی ضم کرینن کہ زرگزرانی شونداری غٹ اکن زموارانہ طرز معاشرت ناحامل مرے، ننا چکار نا وت انسانی شونداری، تعلیم، جان جوڑی نا چیٹ، غذائی رکھ و راجی رکھ ءِ، خاص وڑاٹ زالبول وورناتے کن ہرا ننا غٹ آن بھلا میرات وآخبت آک ءُ۔ اوپارے کہ پاکستان نا آبادی نا بھلا بشخ ورناتیا تالانءِ ہرا اسہ بھلو موقع اس مننگ تون اوار اوار اسہ چیلنج اس ہم ارے۔ اوحکومت پاکستان نا گام گیج آتا ذکر ءِ کرسا پارے کہ نن ادارہ غاتے سوگو کننگ اُن، ڈیجیٹل بدلی ءِ مون آ دننگ اُن، نیز علاقائی رابطہ غاتے ودفنگ اُن تانکہ اسیجائی شونہالی ءِ مون آ دننگے۔ وزیراعظم یات ترفے کہ پاکستان پدریسہ گپ وتران و سفارتکاری و کثیر الجہتی کمکاری نا وکالت ءِ کرینے انتئے کہ دا جھیڑہ غاتے توننگ نا اسٹ انگا عمل نا قابل ذریعہ ءِ، پاکستان ءِ گیشتر جارحیت، اقوام متحدہ نا سلامتی کونسل نا قراردادو اہ معاہدہ غاتا خلاف ورزی تون مون تروئی تمک، داسہ تدوک آ سال سویلی ایشیا اسہ بھلو جوہری جھیڑہ سے نا درگہ غا ئس۔ اوداہیت آ است ہسونی نا درشانی ءِ کرے کہ پاکستان نا ہمسایہ دریائے سندھ انا دِیر انا بشخنگ نا نظام ءِ سلہہ نا وڑاٹ کاریم اٹ اتنگ نا دھڑکو تسکہ ہرا پاکستان نا 24 کروڑ مخلوق نا زند و روزگار نا ضمانت ءِ۔ اوپارے کہ نن پائیدار شونداری نا ہدف آتا پابند اُن ولے ننے اسہ خرین ءُ سچائی اسے امنا کروئی مریک کہ جہانی امن و کمکاری نا بنداو آ سلوک کثیر الجہتی نظام یقیناََ بھاز دباؤ نا گواچی ءِ، داسہ اقوام متحدہ ءِ مہالو آن زیات سوگو، جوان وسیلہ غاتیان شپ و ہراڑے المی مرے اصلاح شدہ بایدے مرے تانکہ دا ادارہ جہانی کمکاری نا مرکزی تمبہ نا وڑاٹ کاریم کرساکے۔ وزیراعظم پارے کہ ویانا اقوام متحدہ نا نظام اٹی اسہ یکتا ءُ ہند اس تخک، دا جہانی گورننس نا اہم تمبہ غاتا اُرا ءِ ہرافتے ٹی دہشت گردی نا برخلاف، منشیات تور، ڈوہ تا توننگ، مجرمانہ انصاف نا اصلاحات کون آ اہم تمبہ اوار ءِ، نیز دا صنعتی شونداری، جوہری ٹیکنالوجی نا زموارانہ و پرامن کاریم اٹ اتنگ و خلائی ادارہ غاتا اُراءِ ، ہندا سوب آن پاکستان آئی اے ای اے ، یواین آئی ڈی او، یواین او ڈی سی و ویانا ٹی ساڑی ایلو ادارہ غاتون تینا تعمیری تعلقداری تا بھاز قدر ءِ کیک۔ نیز نن پورو وڑاٹ دا ادارہ غاتا اختیار نامخ تفی نا پابند اُن۔ وزیراعظم پارے کہ لائخی تے مون آ اتنگ، شریداری علم و ٹیکنالوجی نا گدریفنگ داہیت اکن المی ءِ کہ جدت، امن،و شونہالی نا پول اس جوڑ مرے نئے کہ کشسا پیشن کننگ و نزوری نا ذریعہ جوڑمرے، مصنوعی ذہانت ، بائیو ٹیکنالوجی و مون آ بروک ٹیکنالوجی تے ہمو وڑوڈول آتون بایدے رائج کننگے ہرا غٹ انسانیت کن فائدہ مند مریر نئے کہ آسودہی یافتہ منہ تپہ غاتیکن۔داوخت آ جہانی ایٹمی توانائی ایجنسی(آئی اے ای اے) نا ڈائریکٹر جنرل رافائل ماریانو وزیراعظم نا بشخ ہلنگ نا خیرمقدم ءِ کرسا پارے کہ پاکستان تون ننا اہم شریداری ءِ ہرادے نن پین ودفنگ اُن، ’’ریس آف ہوپ‘‘ نا فلیگ شپ ڈٹ انا بات کمکاری ءِ پین ودفنگ انگ ءِ، کینسر نا درمان نا بشخ اٹی پاکستان نا کڑد ستاکڑزک، پاکستان تون کمکاری چاگڑدی رکھ انا ایلو بشخ آتسکان ہم تالان ءِ۔ اوپارے کہ خور وکشت وکشار نا بشخ اٹی ہم کمک کننگ اُن، ننا کمکاری بروک آ دور اٹی پین سوگو مریک۔ داوخت آ یواین اوڈی سی نا ایگزیکٹیو ڈائریکٹر برانڈولینو پارے کہ وزیراعظم پاکستان نا ساڑی گری شرفمندی نا سوب ءِ، داپاکستانی وزیر اعظم اسے نا ویانا انٹرنیشنل سینٹر نا اولیکو دورہ ءِ، پاکستان نا کثیر الجہتی نظام اٹی فعال شمولیت نا خیرمقدم ءِ کینہ، پاکستان تون ننا 50 سال آن زیات وخت انا شریداری ءِ، نن اواری اٹ منشیات تور، سیم تا سلانتی، و دہشت گردی ءِ توننگ کن کاریم کرینن۔ اوپارے کہ نن سجفوک ڈوہ انا برخلاف پاکستان نا اولیکو قومی حکمت عملی اس تیار کننگ اٹ کمک کننگ اُن تانکہ منشیات نا اسمگلنگ، انسانی اسمگلنگ ، سائبرکرائم، کرپشن و مالی ڈوہ انا برخلاف کمکاری ءِ سوگو کننگ مرے۔ داوخت آ یواین آئی ڈی او نا ڈپٹی ڈائریکٹر جنرل یوکویاسونگاپارے کہ جوان و پائیدار صنعتی شونداری جہانی شونداری ایجنڈانا بنداو ءِ تخک، پاکستان جہانی اہمیت نا تخوک ملک ءِ ہرانا چاہنداری اونا کچ، متحرک ورناآبادی و تزویراتی محل و وقوع تون اوار اوار مون تروک موسمیاتی خطرہ غاتا بابت آن ءِ۔ اوپارے کہ پاکستان نا اِرا تہائی آبادی 30 سال آن کم وئی نا ورناتیا تالان ءِ، چنکا و نیامی درجہ نا ادارہ غاک کسبکاری و اختراع، صنعتی شونداری و سرسہبی نا کلیت ءِ، جہانی کہول آ گرین ہاؤس گیس آتا پیش تمنگ اٹی کم آن کم بشخ شاغنگ آن پد ہم پاکستان موسمیاتی اثرآتا رداٹ بے کچ بے رکھ ءِ، 2022 نا بھسکار نوکاپ اونا پیدوار درور ءِ، کاربن گیس آتا کم پیش تمنگ نا ٹیکنالوجی و صنعت آتا شونداری، زرگزران نا رکھ، شونداری نا مون آ دننگ و راجی ہم گرنچی کن المی ءِ۔ اوپارے کہ پاکستان تون ننا شریداری نیمہ صدی آن زیات آ تالان ءِ، پاکستان اٹ یواین آئی ڈی او نا پورٹ فولیو 60 ملین آن ودفسا 200 ملین ڈالر کننگ خوانہ، پاکستان نا فائیو ایزفریم ورک انا پورو مخ تفی ءِ کینہ۔