وزیر واپار جام کمال خان نا کماشی ٹی بڑزکو کہولی دیوان، پٹاٹہ نا حالیت و بزغرآتا فائدہ غاتا رکھ ءِ کرسا برآمد آتے ودفنگ نا بارواٹی سوگو حکمت عملی اس جوڑ کننگ آ غور

اسلام آباد۔ 17 فروری (اے پی پی) بنجائی وزیر واپار جام کمال خان نا کماشی ٹی بڑزکو کہولی دیوان اس مس ہراٹی ملک اٹی پٹاٹہ نا زیات پیداوار آن ودی مروک آ حالیت آتا جاچ ءِ ہلنگ و بزغرآتا فائدہ غاتا رکھ ءِ کرسا برآمد آتے ودفنگ کن سوگو حکمت عملی اس جوڑ کننگ نا بارواٹی سجفنگا۔ دیوان اٹی بنجاو حکومت پنجاب نا بڑزکو کمامدار، وزیراعظم محمد شہباز شریف نا کوآرڈینیٹر واپار رانااحسان افضل خان و سیکرٹری واپار جوادپال ئسک ہم بشخ ہلکر۔ بشخ ہلوک آ تازہ انگا پیداواری کساس، ہندی مارکیٹ نا حالیت، برآمدی کارکڑد و لاجسٹک چیلنج آتا جاچ ءِ ہلکر۔ وزیر واپار جام کمال دا ہیت آ زور شاغا کہ نہاد آتے ٹی کمتی نا سوب آن سرپلس نا بنداوی اثر بزغرآتے محسوس مننگ ءِ و ہنداسوب آن ہر کمکار وڑوڈول ءِ مصنوعی نہاد آتا نیام تمنگ آتا جاگہ غا بزغرآتے براہ راست کمک ءِ اولیت تننگے۔ دیوان اٹی نیامی ایشیائی و ایلو مون آ بروک منڈی تیٹی برآمدی مسابقت گچین کننگ آ ہم چکار کننگا۔ داہیت آ امنا کننگاکہ ٹارگٹڈ و ٹائم باؤنڈ فریٹ فیسیلی ٹیشن میکانزم نا جاچ ءِ ہلنگ مریک ہراکہ مالیاتی فزیبلٹی و پیدوار وڑاٹ طے مروک آب انا تابع ءِ تانکہ برآمد کنندگان آتے بگاڑ ودی کننگ آن بیدس لاجسٹکس نا ودوک آ خڑچ آتا بست وبند کننگ اٹ کمک رسینگے۔ وزیرواپار پارت کرے کہ خریدار آتا رابطہ غاتے ودفنگ و برآمدی ہند آتے متنوع کننگ کن نیامی ایشیا، دے ٹک نیامی و ایشیا پیسفک مارکیٹ آتون اوار اہم ہند آتون کاروبار و کاروباری اختہ ئی تے ترند کننگے۔ اوبنجا و حکومت پنجاب نا نیام اٹ سوگو و ڈیٹاغا تالان فیصلہ سازی نا اہمیت آ زور شاغا، تعلقدار محکمہ غاتے پارت کرے کہ او پوسکن انگا پیدوار، برآمدات و لاجسٹک آتا ڈیٹا ءِ مرتب کیر تانکہ اسہ جوان ءُ سلاہ اس تیار کننگ مرے۔ جام کمال خان جہانی منڈی تیٹی مسابقت ءِ برقرار تخسا کشاری بشخ اٹی سوگوی ءِ پک کرسا عملی و متوازن پالیسی گام گیج آتا کمک اٹ بزغر و برآمد کنندگان ہڑتوم آتا کمک ءِ کننگ نا حکومتی عزم انا درشانی ءِ کرے۔