بنجائی وزیر داخلہ محسن نقوی نا سری لنکا نا صدر انوراکماراڈ سانائیکے تون اوڑدہی، پاکستانی تے ویزہ ٹی مشکلات آتا بارواٹی معلومدار کرے

کولمبو۔ 17 فروری (اے پی پی) بنجائی وزیرداخلہ و چیئرمین پاکستان کرکٹ بورڈ (پی سی بی) محسن نقوی سری لنکا نا صدر انورا کماراڈ سانائیکے تون اوڑدہی کرے ہراٹی پاکستانی تے ویزہ غاتیٹی مشکلات آتا بارواٹی معلومدار کرے، بنجائی وزیر اوورسیز پاکستانیز چوہدری سالک حسین و پاکستانی ہائی کمشنر میجر جنرل ریٹائرڈ فہیم العزیز ئسک ہم داوخت آ ساڑی ئسر۔ سری لنکن صدر انوراکماراڈسانائیکے وزیرداخلہ نا پاننگ آ نوٹس ہلسا دمدستی وڑاٹ پاکستانی تے غٹ لسٹ آتیان کشنگ نا پرمان کرے۔ اوپارے کہ سری لنکا نا وزیراعظم بھاز زوت پاکستان نا دورہ غا گدریفنگ اُن۔ ہڑتوم آراہشونک اوڑدہی ٹی دہشت گردی تور، منشیات تور و فورس آتا اسیجائی ٹریننگ نا امور نا بارواٹی ہم گپ وتران کریر۔ محسن نقوی پاک سری لنکا تعلقداری نا مون آدننگ کن سری لنکن  صدر نا کڑد انا ستاءِ کرے۔ اووزیراعظم محمد شہباز شریف نا کنڈآن سری لنکن صدر انوراکماراڈسانائیکے ءِ پاکستان نا دورہ ءِ کننگ نا دعوت نامہ ءِ سرکرے۔ محسن نقوی ٹی ٹونٹی ورلڈ کپ کن شاندار بست وبند و پاکستانی ڈل انا مہمانداری آ سری لنکن صدر نا منت واری ءِ ہرفے۔ سری لنکن صدر پاکستان تون تعلقداری تے پین سوگو کننگ نا عزم انا درشانی ءِ کرے۔ اوکولمبو ٹی ٹی ٹونٹی ورلڈکپ نا بھارت تون میچ گوازی کننگ آ وزیراعظم محمد شہباز شریف نا خصوصی منت واری ءِ ہرفسا پاکستان نا خیرخواہی نا جوزہ غاتا ستاءِ کرے۔