چیئرمین سینیٹ سید یوسف رضا گیلانی ءَ امریکہ ءَ آئی پی یو ءِ سروکی ءَ گوں ھاسیں گند ءُ نند کتگ ءُ پاکستان ءِ جوانیں  پارلیمانی سفارتکاری ءِ سرجمی ءَ درشان

نیو یارک۔15فروری  (اے پی پی):سینیٹ ءِ چیئرمین سید یوسف رضا گیلانی ءَ نیویارک ءَ انٹر پارلیمانی یونین ءِ صدر ڈاکٹر ٹولیا ایکسن ءُ سیکرٹری جنرل مارٹن چنگ گونگ ءِ گوما جتا جتائیں گند ءُ نند کتگ ات کہ ایشی ءِ تہا پاکستان ءِ فعال، باوقار ءُ موثر پارلیمانی سفارتکاری ءِ سرا چمشانک دیگ بوتگ ات۔ یک شمبے ءِ روچ ءَ سینیٹ سیکرٹریٹ ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ سینیٹ ءِ چیئرمین سید یوسف رضا گیلانی ءَ پاکستان ءِ اصولی موقف، جمہوری جزمءُ جہانی تک ءَ فعال پارلیمانی کرد ءَ را دلجمیں رنگ ءَ پیش کتگ۔ آئی ءَ اے گپ ءِ سر ءَ زور پر دات کہ پاکستان آئی پی یو ءَ را دگنیا ءِ پارلیمنٹ آنی نیام ءَ گپ ءُ تران ، کانود ءِ حاکمیت ءِ دیمروئی ، ھواریں گورننس ءُ جھان ءِ کمک ءِ واستہ موثر تریں پلیٹ فارم لیک ایت ءُ اے فورم ءِ تہ ءَ پاکستان ءِ کرد مدام جوڑیشت ءُ جوانیں بوتگ۔ آئی پی یو ءِ گوما پاکستان ءِ مھکم ءُ دیریں جزم ءِ سر ءَ چمشانک دیان ءَ چیئرمین سینیٹ ءَ گوشت کہ پاکستان ءِ پارلیمنٹ آئی پی یو ءِ اسمبلی، قائمہ کمیٹی ءُ جنرل ڈیبیٹ آنی تہ ءَ مدام سرگرم رنگ ءَ بھر زوری کنگ ءَ اِنت۔ تاشقند ءَ برجم داشتگیں 150می آئی پی یو اسمبلی ءَ وتی بھر زوری ءِ حوالہ ءَ آئی ءَ گوشت کہ پاکستان ءَ امن ءُ ایمنی، پائیدار دیمروئی، موسمی مٹ ءُ بدلی ءُ کثیر نیمگی کمک ءِ وڑیں ھاسیں جھان ءِ جیڈھ آنی سر ءَ ھاسیں ءُ جوانیں موقف پیش کتگ۔ آئی ءَ نومبر 2025 ءَ اسلام آباد ءَ برجم داشتگیں انٹر پارلیمانی اسپیکر کانفرنس ءِ سوبمندیں برجم دارگ ءِ ھاسیں ذکر کت ءُ گوشت کہ اے کانفرنس ءَ پاکستان ءِ پارلیمانی سروکی ءِ سر ءَ جھان ءِ اعتماد ءَ را گیش مھکم کتگ۔ آئی ءَ ’’اسلام آباد ءِ اعلامیہ‘‘ ءِ یک رند ءَ منگ ءَ را پاکستان ءِ واستہ سفارتی سوبمندی لیک اِتگ کہ ایشی ءَ امن، ایمنی ءُ پائیدار دیمروئی ءِ یکے دومی ءَ گوں سیادی ءِ سر ءَ چمشانک داتگ۔ سینیٹ ءِ چیئرمین سید یوسف رضا گیلانی ءَ جمہوری حکومت داری ءِ دیمروئی ءِ واستہ پاکستان ءِ سینیٹ ءِ کرد ءِ سر ءَ زور پر دیان ءَ گوشت کہ ایوان بالا صوبائی یکوئی ءِ مھکم کنگ، اقلیت آنی رکھینگ، شفافیں کانود سازی ءُ موثر نگرانی ءِ نظام ءِ تہ ءَ کلیدی کرد پیلو کنگ ءَ انت۔ آئی ءَ اے گپ ءِ پدر کنگ ءَ گوشت کہ پارلیمانی عمل ءِ وسیلگ ءَ جھان ءِ تک ءَ الس ءِ توار ءَ را جوانیں رنگ ءَ پدر کنگ آئی ءِ سروکی ءِ اولی ترجی آنی تہ ءَ ھوار اِنت۔ آئی ءَ ایس ڈی جیز ءَ را پارلیمانی ملکیت دیگ ءِ وتی سروکی ءِ جزم ءِ پدا زور دات ءُ کانود سازی، بجٹ ءِ نگرانی ءُ ثبوت ءِ سر ءَ بنیات ءِ سر ءَ پالیسی سازی ءِ تہ ءَ گیش کمک ءِ واھشت ءِ درشان کت۔ موسمی مٹ ءُ بدلی ءِ جیڈھ ءِ سر ءَ چیئرمین سینیٹ ءَ گوشت کہ پاکستان دگنیا ءِ ھما ملک آنی تہ ءَ ھوار اِنت کہ موسمی مٹ ءُ بدلی ءَ چہ سک باز آماچ اَنت۔ 2022ءِ تباہ کنوکیں سیلاب ءُ ایشی ءَ پد موسمی شدیدیں وئیل آنی حوالہ ءَ آئی ءَ میاں اوستمانی براتی ءَ را موسمیاتی انصاف ءُ مشترکہ ذمہ واری ءِ اصول آنی رد ءَ دیمروئی کنوکیں ملک آناں کمک کنگ ءِ سر ءَ زور پر دات۔ زالبول آنی سیاسی ءُ اقتصادی شمولیت ءِ ھوالگ ءَ چیئرمین سینیٹ ءَ پاکستان ءِ آئینی گامگیج ءُ کانود آنی سر ءَ چمشانک دات ءُ زالبول آنی اقتصادی بااختیار کنگ ءُ گریبی ءِ ھلاسی ءِ تہ ءَ بے نظیر انکم سپورٹ پروگرام ءَ را یک موثریں گامگیج ءِ رنگ ءَ گوشت۔ آئی ءَ گوشت کہ برجائی دیمروئی ءِ واستہ زالبول آناں بااختیار کنگ المی اِنت۔ چیئرمین سینیٹ ءَ جہانی امن ءُ انسانی حقانی بابت ءَ گپ ءُ تران کنان ءَ تنازعہ ءِ گیواری ءِ ھاتر ءَ گپ ءُ تران ءُ سفارتکاری المی لیک اتگ۔ آئی ءَ مقبوضہ جموں ءُ کشمیر ءِ اُلس ءِ وت واجہی ءِ حق ءِ واستہ وتی مھکمیں حمایت ءِ پدا زور پر دات ءُ فلسطین ءِ جیڈھ ءِ انصاف ءِ گیواری ءِ ضلورت ءِ سر ءَ زور پر دات ءُ گوشت کہ دمگ ءَ برجمیں امن ءِ واستہ یک آجوئیں فلسطینی ریاست ءِ جوڑ کنگ المی اِنت۔ سیکرٹری جنرل آئی پی یو ءِ گوما گند ءُ نند ءَ سینیٹ ءِ چیئرمین سید یوسف رضا گیلانی ءَ سینیٹ سیکرٹریٹ ءِ ادارگی کرد ءِ سر ءَ زور پر دات ءُ گوشت کہ پارلیمانی سفارتکاری ءِ سوبمندی ءِ واستہ پیشہ وارانہ، کارآمد ءُ بے رھبندیں پارلیمانی سیکرٹریٹ بنیاتی اَنت۔ آئی ءَ پارلیمانی جدید کنگ، ڈیجیٹلائزیشن، مصنوعی ذہانت ءِ سر ءَ بنیات ءِ آسراتی، پٹ ءُ پولی کمک ءُ کارندہ آنی تربیت ءِ پڑ آنی تہ ءَ عملی کمک ءِ تجویز داتگ۔ چیئرمین سینیٹ ءَ اے گپ ءِ پدرائی کت کہ آئی ءِ سروکی ءَ پاکستان ءِ سینیٹ جھان ءِ تک ءَ سرگرم، زمہ وار ءُ باوقاریں کرد ءَ را برجاہ دار ایت ءُ کثیر جہتی نظام ءِ برجائی، جمہوریت ءِ دیمروئی ءُ الس دوستیں حکومت داری ءِ واستہ ھمک رنگ ءِ کمک ءَ را برجاہ دارگ بیت۔ گند ءُ نند آنی گڈ ءَ دوئیں نیمگ ءَ پارلیمنٹ پاکستان ءُ آئی پی یو ءِ نیام ءَ کمک ءَ را گیش وسعت دیگ ءِ واستہ وتی جزم ءِ پدا پدر کت، وھدیکہ چیئرمین سینیٹ سید یوسف رضا گیلانی ءِ فعالیں سروکی ءَ را میاں اوستمانی پارلیمانی حلقہ آنی تہ ءَ ساڑاھگ بوت۔