پاکستان کرکٹ بورڈ ءِ چیئرمین محسن نقوی ءَ راجی لیبی ءُ ٹیم مینجمنٹ ءِ گوما ھاسیں گند ءُ نند

کولمبو ۔15فروری  (اے پی پی):کولمبو ءَ راجی کرکٹ ٹیم ءِ بھارت ءِ ھلاپ ءَ میچ ءَ چہ پیسر پاکستان کرکٹ بورڈ ءِ چیئرمین محسن نقوی ءَ کھڈکار ءُ ٹیم ءِ انتظامیہ ءِ گوما ھاسیں گند ءُ نند کتگ ءُ ھاسیں میچ ءَ چہ پیسر آھانی حوصلہ ءَ را گیش کتگ۔ دیوان یک وشیں چاگردے ءَ بوتگ کہ ایشی ءِ تہا ٹیم ءِ عزم، تیاری ءُ کارکردگی ءِ سرا تفصیل ءَ گپ ءُ تران کنگ بوتگ۔ پی سی بی ءِ چیئرمین ءَ لیب کنوک آنی محنت، نظم ءُ ضبط ءُ جزبگ ءَ را ساڑاتگ ءُ گوشت کہ سرجمیں راج ءِ چم ٹیم ءِ سر ءَ سک انت ءُ آئی ءَ را دل یکیمی انت کہ راجی لیب کنوک وتی جوانیں صلاحیت آنی درشان ءَ کن انت۔ آئی ءَ اے گپ ءِ سر ءَ زور پر دات کہ میدان ءِ سر ءَ زور ءِ چیر ءَ جوانیں سوچ ، وت مہ وتی ھمگرنچی ءُ راستیں پیسلہ سوبمندی ءِ ضمانت اَنت۔ محسن نقوی ءَ راجی ٹیم ءِ واستہ نیکیں واھگ آنی درشان کنان ءَ گوشت کہ بورڈ ھرچ پڑ ءَ کھڈکار آناں سرجمی ءَ کمک کنگ ءَ انت تانکہ آ ایوک ءَ گوازی ءِ سر ءَ دلگوش بہ کن انت۔ اے موہ ءِ سر ءَ راجی ٹیم ءِ کپتان سلمان آغا، ہیڈ کوچ مائیک ہیسن ءُ ٹیم ءِ منیجر نوید اکرم چیما ءَ ھوار درستیں کھڈکار ءُ کوچنگ اسٹاف ھوار اتنت۔ کپتان سلمان آغا ءَ پی سی بی ءِ چیئرمین ءِ منت گپت ءُ دل یکیمی دات کہ ٹیم یکوئی ءَ گوں میدان ءَ روت ءُ راج ءَ را مایوس نہ کنت۔ سروکیں کوچ مائیک ہیسن ءَ تیاری ءِ سر ءَ وشھالی ءِ درشانی کتگ ءُ گوشت کہ کھڈکار سرجمیں دلگوش ءُ پیشہ وارانہ رنگ ءَ مقابلہ ءِ واستہ تیار اَنت۔ اے موہ ءِ سر ءَ پاکستان کرکٹ بورڈ ءِ چیف آپریٹنگ آفیسر سمیر احمد، پاکستان سپر لیگ ءِ چیف ایگزیکٹو آفیسر سلمان نصیر ءُ ڈائریکٹر میڈیا عامر میر ھم ساڑی بوتگ اَنت۔ دیوان ءَ ٹیم ءِ انتظامی کار، کھڈکار آنی وشھالی ءُ آیوکیں شیڈول ءِ سر ءَ ھم گپ ءُ تران کنگ بوتگ۔ دیوان ءِ گڈ ءَ پی سی بی ءِ چیئرمین ءَ یک رندے پدا کھڈکار آنی حوصلہ ءِ توسیپ کت ءُ اے جزم ءِ پدا زور دات کہ راجی ٹیم ملک ءِ وقار ءَ را بُرز کنگ ءِ واستہ سرجمیں توانائی ءَ گوں میدان ءَ درکپیت۔ ٹیم ءِ کھڈکاراں ھم دلجمی ءِ درشانی کتگ ءُ وتی دلجمی ءِ درشانی کتگ کہ آ یکجاہ بنت ءُ جوانیں کارکردگی پیش کن اَنت۔