فیلڈ مارشل سید عاصم منیر جرمنی ءِ تر ءُ تاب ، میونخ سیکورٹی کانفرنس ءِ موہ ءَ جتاجتائیں دیواناں بہر زوریت ءُ دنیا ءِ سروکاں گوں گند ءُ نند کنت

راولپنڈی۔15فروری  (اے پی پی):12فروری ءَ چہ 14 فروری ءَ جرمنی ءِ تر ءُ تاب ءَ دفاعی اُرد ءِ سروک ءُ آرمی اسٹاف ءِ سروک فیلڈ مارشل سید عاصم منیر ءَ 62می سلامتی دیوان ءِ موہ ءَ دیوان آنی تہ ءَ بھر زوری کتگ۔ ادا انٹر سروسز پبلک ریلیشنز ءِ نیمگ ءَ جاڑی بوتگیں پریس ریلیز ءِ رد ءَ فیلڈ مارشل سید عاصم منیر ءَ تر ءُ تاب ءِ وھد ءَ بازیں ھاسیں مردم آں گوں گند ءُ نند کتگ۔ آئی ایس پی آر ءِ رد ءَ آئی ءَ امریکی وزیر ءِ درئی کار مارکو روبیو ءَ گوں گند ءُ نند کتگ ءُ وت مہ وتی ءِ جیڈھ آنی سر ءَ گپ ءُ تران کتگ ایشی ءِ تہ ءَ جھان ءُ دمگی ایمنی ءِ جاور ھال ءُ ناشرکاری ءِ ھلاپ ءَ جنگ ءِ تہ ءَ کمک ھوار اِنت۔ جرمن حکام ءِ گوما گند ءُ نند ءِ وھد ءَ فیلڈ مارشل ءَ جرمن وفاقی وزیر داخلہ الیگزینڈر ڈوبرانڈٹ، جرمن وفاقی چانسلر گنٹر ساؤٹر ءِ درئی کار ءُ سیکورٹی پالیسی ءِ مشیر ءُ سلاہ بندیں اُرد ءِ دفاع ءِ سروک جنرل کارسٹن بروئر ءَ گوں گند ءُ نند کتگ۔ گند ءُ نند آنی تہ ءَ استیں سیکورٹی جیڈھ، دوئیں ملک آنی نیام ءَ دفاعی کمک ءُ دو نیمگی ءُ کثیر نیمگی گپ ءُ تران ءِ وسیلگ ءَ جھان ءِ امن ءُ ایمنی ءِ دیمروئی ءِ ضلورت ءِ سر ءَ دلگوشی دیگ بوتگ۔ آئی ایس پی آر ءِ رد ءَ فیلڈ مارشل سید عاصم منیر ءَ برازیلین سلاھ بندیں اُرد ءِ   جوائنٹ اسٹاف  ءِ  چیف ایڈمرل ریناٹو روڈریگز ڈی ایگیار فریئر ءِ گوما پائدگ مندیں گند ءُ نند کتگ ءُ دوئیں ملک آنی نیام ءَ دفاعی کمک ءِ سر ءَ گپ ءُ تران کتگ۔ لبنان ءِ سلاہ بندیں اُرد ءِ کمانڈر جنرل روڈولف ہیکل ءَ ھم فیلڈ مارشل ءَ گوں گند ءُ نند کتگ۔ گند ءُ نند ءِ تہ ءَ جہانی ءُ دمگی ایمنی ءِ جاور ءُ دوئیں ملک آنی نیام ءَ دفاعی کمک ءَ را گیش کنگ ءِ واستہ گامگیج آنی سر ءَ ھیال ریچی کنگ بوت۔