سینیٹ ءِ چیئرمین ءِ سروکی ءَ پاکستانی پارلیمانی ڈل ءَ اقوام متحدہ ءِ جنرل اسمبلی ءِ صدر ءَ گوں گند ءُ نند

اسلام آباد۔14فروری  (اے پی پی):کشمیر ءِ جیڈھ ءِ گیواری، مھکمیں کثیر نیمگی کمک ءُ ناشرکاری ءِ حلاف ءَ جوانیں گامگیج آنی سر ءَ زور پر دیان ءَ پاکستان ءَ گوشت کہ پاکستان ھمساھگیں ملک آنی گوما دوستی ءِ سیادی ءُ جیڈھ آناں ایمنی ءِ گوما گیواری ءِ وتی دیریں پالیشی ءِ سر ءَ یکزم اِنت۔ سینیٹ سیکرٹریٹ میڈیا ونگ ءِ نیمگ ءَ چہ جاڑی بوتگیں پریس ریلیز ءِ رد ءَ پاکستان ءِ مزنیں تک ءِ پارلیمانی ڈل ءَ سینیٹ ءِ چیئرمین سید یوسف رضا گیلانی ءِ سروکی ءَ اقوام متحدہ ءِ جنرل اسمبلی ءِ صدر اینالینا بیئربوک ءَ گوں اقوام متحدہ ءِ بنجاہی کارگس ءَ سالانہ آئی پی یو سینیٹ ءِ دیوان ءِ موہ ءَ گند ءُ نند کتگ۔ پاکستان ءِ اقوام متحدہ ءِ ھاتر ءَ کثیر جہتی کمک ءِ مرکزی ستون ءِ بستار ءَ بے مٹ ءُ اصولی حمایت کنگ۔ پاکستان ءِ ہمساہگیں ملک آنی گوما دوستی ءِ سیادی ءُ جیڈھ آناں پرامنیں رنگ ءَ گیواری ءِ دیریں پالیشی ءِ حوالہ ءَ سید یوسف رضا گیلانی ءَ گوشت کہ جموں ءُ کشمیر جیڈھ ءِ گیواری سلامتی کونسل ءِ سیادی داروکیں قرارداد آنی رد ءَ اے جنوبی ایشیا ءَ برجائی امن ءُ ایمنی ءِ واستہ المی اِنت۔ آئی ءَ گوشت کہ بھارت ءَ یک نیمگی ءَ سندھ ءِ آپانی معاہدہ مھتل کتگ ایشی ءَ چہ گیش بے رھبندی پیداک اِنت۔ آئی ءِ گشگ ءِ رد ءَ اے گامگیج ٹرانس باونڈری آپی وسیلگ آنی ھوالگ ءَ اے معاہدے ءِ شق ءُ میاں اوستمانی کانود ءِ جوانیں رنگ ءَ جوڑ بوتگیں اصول آنی پدریں خلاف ورزی اِنت۔ آئی ءَ گوشت کہ اے وڑیں گامگیج 240ملین ءَ چہ گیش پاکستانی آنی زندمان ءُ روزگار ءِ سر ءَ مزنیں اثرات ءِ سبب جوڑ بوت کنت ھاسیں رنگ ءَ اے وھد ءَ کہ موسمیاتی دباؤ ءُ آپ ءِ کمی ءِ سبب ءَ وت مہ وتی کمک ءُ میاں اوستمانی معاہدہ آنی سر ءَ سک باز عمل کنگ لوٹ ایت۔ چیئرمین سینیٹ ءَ پاکستان ءِ دیم ءَ ناشرکاری ھوپ آنی نیمگ ءَ جنرل اسمبلی ءِ صدر ءِ دلگوش گور کنان ءَ گوشت کہ ٹی ٹی پی، بی ایل اے، القاعدہ، داعش خراسان ءُ اے دگہ ناشرکاریں گل پاکستان ءِ ھلاپ ءَ اوگان سرزمین ءَ را بے رکاوٹ کارمرد کنگ ءَ اَنت۔ چیئرمین سینیٹ ءَ اے گپ ءِ سر ءَ زور پر دات کہ پاکستان ءِ الس اقوام متحدہ ءِ مشن ءِ سر ءَ مھکمیں رنگ ءَ کمک کن اَنت کہ میاں اوستمانی امن ءُ ایمنی ، برجمیں دیمروئی ءُ انسانی ھک آنی رکھینگ بہ بیت۔ آئی ءَ گوشت کہ بازیں ءُ یکے دومی ءَ گوں بندوکیں جھان ءِ بحران آنی اے دور ءَ کثیر جہتی نظام ءَ را مزنیں چیلنج آنی دیم ءَ انت، ایشی ءِ تہ ءَ اقوام متحدہ ءِ منشور ءُ سلامتی کونسل ءِ بازیں وھد ءَ چہ رند ءِ قرارداد آنی برجاھیں خلاف ورزی ھوار انت۔ قراردادانی سرا عمل نہ کنگ ھوار اِنت۔ چیئرمین سینیٹ ءَ میاں اوستمانی کانود ءُ جوڑ بوتگیں قانونی رہبندانی سر ءَ عمل کنگ ءِ تہ ءَ سرجمیں کمی ءِ نیمگ ءَ اشارہ کنان ءَ ھشدار داتگ کہ اے رجحان جھان ءِ رھبند ءَ را نزور کنگ ءَ اَنت۔ موسمی مٹ ءُ بدلی ءِ رد ءَ ردیں آسر آنی بابت ءَ آئی ءَ گوشت کہ پاکستان ءِ وڑیں ملک کہ گلوبل وارمنگ ءِ تہ ءَ ناچیزیں کرد ءَ پیلو کن اَنت، ایشی ءِ شدیدیں آسر آنی سبب ءَ آماچ بوھگ ءَ اَنت۔ آئی ءَ اجتماعی گامگیج، موسمیاتی انصاف ءُ مھکمیں میاں اوستمانی کمک ءِ ترندیں ضلورت ءِ سر ءَ زور پر دات۔ آئی ءَ گوشت کہ اقوام متحدہ اے یکے دومی ءَ گوں بندوکیں چیلنج آنی گیواری ءِ واستہ یک ناگزیریں پلیٹ فارم ءِ پجاری کنت۔ اے موہ ءِ سر ءَ جنرل اسمبلی ءِ صدر انالینا بیربوک ءَ پاکستان ءَ گوستگیں ناشرکاری واکیہ آنی تہ ءَ گران بھائیں جان ءِ بیرانی ءِ سر ءَ پاکستان ءِ حکومت ءُ الس ءِ گوما دلپدردی ءِ درشانی کت۔ آئی ئَ گوشت کہ ناشرکاری ئِ ھلاپ ئَ یکجائی جہد توامیں ملک آنی نپ ئِ تہ ئَ اِنت۔ آئی ءَ گوشت کہ مزن تک ءِ پارلیمانی ڈل ءِ گوما اے آئی ءِ اولی باقاعدہ گند ءُ نند انت۔ پاکستانی پارلیمانی ڈل ءَ را وش اتک کنان ءَ آئی پی یو ءِ سالانہ گوشدارگ ءَ سینئر باسکانی مزن تک ءِ بھر زوری ءَ را ساڑات ءُ اقوام متحدہ ءِ تہ ءَ پاکستان ءِ ستا کرزیں کرد ءِ توسیپ کت۔ گند ءُ نند ءَ سینیٹر سلیم مندوی والا، سینیٹر فاروق ایچ نائیک، سینیٹر محمد عبدالقادر ءُ سینیٹر سید فیصل علی سبزواری ءَ ھم بہر زرتگ۔