بی آر سی اوتھل ءِ نودربر ءُ استاداں وزیر تجارت ءَ گوں گند ءُ نند کتگ، دومی سال ءِ گڈی بیچ ءِ درستیں نودربر جام کمال خان ءَ لیپ ٹاپ ءِ وسیلگ ءَ داتگ

اسلام آباد۔14فروری  (اے پی پی):بلوچستان ریزیڈنشل کالج اوتھل ءِ نودربر ءُ استاداں وتی سرجمیں پاکستان ءِ وانگ ءِ تر ءُ تاب ءِ ساھت ءَ پاک سیکرٹریٹ اسلام آباد ءَ وفاقی وزیر تجارت جام کمال خان ءِ کارگس ءِ تر ءُ تاب کتگ ءُ آئی ءَ گوں گند ءُ نند کتگ۔ اے موہ ءِ سر ءَ وفاقی وزیر ءَ جار جت کہ دومی سال ءِ فائنل بیچ ءِ توامیں نودربر آناں لیپ ٹاپ پجاری کنگ بیت۔ وزارت تجارت ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ وفاقی وزیر ءَ جار جتگ کہ دومی سال ءِ درستیں گڈی بیچ ءِ نودربر آناں لیپ ٹاپ ءِ پجارینگ بیت تانکہ آ نوکیں ٹیکنالوجی ءُ ڈیجیٹل مہارت آناں کارمرد کنان ءَ وتی وانگ ءُ زانگ ءُ پیشہ وارانہ آیوکیں باندات ءَ را مھکم بہ کن اَنت۔ انوگیں دور ءَ ورنا آنی سوبمندی ءِ واستہ ٹیکنالوجی ءِ رسائی ناگزیر بوتگ۔ جام کمال خان ءَ گوشت کہ بی آر سی اوتھل ءِ جوڑ کنگ آئی ءِ پت بلوچستان ءِ پیسریگیں سر وزیر نمیرانیں بلوچستان جام میر محمد یوسف ءِ نیمگ ءَ لسبیلہ ءِ الس آناں سوغات ءِ رنگ ءَ داتگ ات کہ جام کھول ءِ علم ءَ گوں مہر ءُ ورنا آنی واستہ کمٹمنٹ ءِ عملی ثبوت انت۔ وفاقی وزیر ءَ زھگاں گوں گپ ءُ تران کنان ءَ گوشت کہ آرٹیفیشل انٹیلی جنس ءُ نوکیں ٹیکنالوجی ءَ چہ دگنیا ءَ را ترندی ءَ گوں بدل کنگ بوھگ ءَ انت۔ مرچی موبائل فون ھما کاراں کنگ ءَ اِنت کہ پیسر ءَ جتا جتائیں کارگس ءُ پیشہ وراں کتگ اَنت۔ اے صلاحیت آؤکیں ماہانی تہا بازیں رند ءَ گیش بنت۔ اے درگت ءَ آئی ءَ ورنا آناں آیوکیں وھد ءِ لوٹ آنی رد ءَ وانگ ءُ زانگ ءِ دیم ءَ برگ ءِ پنت ءُ شون کت۔ جام کمال خان ءَ کشت ءُ کشاری، لائیو سٹاک، انجینئرنگ، کمپیوٹر سائنس، ڈیٹا سینٹر، بیٹری ٹیکنالوجی، بجلی ءِ شوبگ ءُ کان کنی ءَ را آیوکیں وھد ءِ ھاسیں شوبگ لیک اتگ۔ آئی ءَ گوشت کہ بلوچستان تانبہ، زر، کرومائٹ، مینگنیج، آئرن ءُ اینٹیمون ءِ وڑیں ارزشتی ایں معدنی وسیلگ آنی تہ ءَ چہ مالا مال انت کہ نوکیں صنعت ءُ سیمی کنڈکٹر ٹیکنالوجی ءِ تہ ءَ بنیاتی ارزشت ءِ واھند انت۔ وفاقی وزیر ءَ وانگ ءُ زانگ ءِ ارزشت ءِ سر ءَ زور پر دات ءُ گوشت کہ یک رندے کہ وانگ ءُ زانگ ءِ موہ گار بیت گڈا پدا آئی ءِ گرگ مشکل اِنت پمیشکا نودربر سرجمی ءَ وتی وانگ ءِ سر ءَ دلگوش بہ کن اَنت۔ آئی ءَ ورنا آناں نوکیں پٹ ءُ پول ءُ سائنسی پڑ آنی نیمگ ءَ ھم دلگوش کت۔ آئی ءَ نوکیں وانگ ءُ زانگ ءِ آسراتی، فائبر آپٹک انٹرنیٹ، ہائی ٹیک لیبارٹری ءُ صنعت ءَ گوں سیادی داروکیں یونیورسٹی آنی ضلورت ءِ سر ءَ زور پر دات ءُ نودربر آناں پنت ءُ شون کت کہ آ مزنیں وانگ ءُ زانگ ءِ ادارگ آنی نیمگ ءَ بہ رو اَنت ھاسیں رنگ ءَ NUST ءِ وڑیں ادارگ آنی نیمگ ءَ بہ رو اَنت کہ اودا پٹ ءُ پول ءُ صنعت ءِ یک موثریں یکجاہی یے است اِنت۔ دیوان ءِ گڈسرا نودربراں وفاقی وزیر ءِ منت گپت ءُ لیپ ٹاپ ءِ پھجارینگ ءِ جار ءَ را ورنا آنی واستہ یک ھاسیں ءُ دلبڈی ءِ گامگیج لیک اِت۔