ریلوے ءِ دیم ءَ مزنیں جیڑھ ریلوے ٹریک ءِ بحالی اِنت، یقینی چیلنج است اَنت، ما آھانی دیم ءَ کپیں، ریلوے ءِ وفاقی وزیر

راولپنڈی۔14فروری  (اے پی پی):ریلوے ءِ وفاقی وزیر محمد حنیف عباسی ءَ گوشت کہ ریلوے ءِ دیم ءَ مزنیں جیڈھ ریلوے ٹریک ءِ بحالی اِنت، یقینی چیلنج است اَنت بلے ما ایشی ءِ دیم ءَ کپیں۔ آئی ءَ افسر آناں ہدایت کتگ کہ ریلوے ءِ گہتری ءِ واستہ داتگیں ٹارگٹ تاں 30 جون ءَ سرجم کنگ بہ بنت اگاں نہ سیادی داروکیں افسر وتی اگدہ ءَ برجاہ دارگ ءِ حق نہ دار انت۔ راولپنڈی ریلوے اسٹیشن ءِ پلیٹ فارم نمبر 4 ءُ 5 ءِ اپ گریڈیشن ءِ سرجمی ءِ بنگیج ءَ پد میڈیا ءَ گوں تران کنان ءَ آئی ءَ گوشت کہ مزن وزیر محمد شہباز شریف ءِ گور ءَ یک ھاسیں ہدایت ءِ است انت کہ ہچ وڑیں لاپرواہی برداشت کنگ نہ بیت ھاسیں رنگ ءَ ریلوے ٹریک ءِ بحالی ءِ تہ ءَ۔ آئی ءَ دل یکیمی ءِ درشان کت کہ استیں کارکردگی ءِ رد ءَ ٹھینگ بوتگیں ٹارگٹ سرجم بنت۔ وفاقی وزیر ءَ گوشت کہ گوستگیں روچاں کزاکستان ءُ ازبکستان ءِ صدر آنی پاکستان ءِ تر ءُ تاب ءِ ساھت ءَ ازبکستان ءِ گوما تپاکی بوتگ، وھدیکہ کزاقستان ءِ گوما ھم تپاک کنگ بوتگ۔ آئی ءَ گوشت کہ چمن، قندھار، ہرات ءُ ترکمانستان ءَ گوں نزیک ءَ 840کلومیٹر ریلوے ءِ لنک ءِ ٹارگٹ سرجم کنگ بہ بیت گڑا پاکستان میاں اوستمانی ایشیا ءَ گوں ھمگرنچ بیت۔ حنیف عباسی ءَ گوشت کہ ایران ءَ گوں کوئٹہ تفتان ءِ سیم سر ءَ یک مال برداریں ریل ءِ نشانگ جوڑ کنگ بوتگ، اگاں اے رنگیں اُرش نہ بوت گڈا مال برداریں ریل ءِ روگ ءِ واستہ سرجمی ءَ تیار انت۔ آئی ءَ بلوچستان ءَ جعفر ءُ بولان ایکسپریس ءِ بحالی ءَ را مزنیں سوبمندی لیک اتگ۔ ایم ایل ون ءِ ھوالگ ءَ آئی ءَ گوشت کہ اے یک نادریں موہ یے بوتگ کہ زوال بوتگ، البت ایشیائی بینک ءَ 480کلومیٹر کراچی روہری منصوبگ ءِ واستہ 2 ارب ڈالر ءِ منظوری داتگ ءُ جولائی ءِ گڈ ءَ تاں ایشی بندات کنگ بیت۔ ایشی ءَ ابید ایم ایل ٹو منصوبہ ھم این ایل سی ءُ ڈی پی ورلڈ ءِ کمک ءَ گوں 2.5ارب ڈالر ءِ سرمایہ کاری ءَ بندات کنگ بوھگ ءَ اِنت وھدے کہ ڈیجیٹلائزیشن ءِ ھاتر ءَ ایف ڈبلیو او ءِ گوما یک معاہدے کنگ بوتگ ءُ ھر اسٹیشن ءَ را سمارٹ ءُ سیف جوڑ کنگ بیت۔ آئی ءَ گوشت کہ روہری ءَ چہ کراچی ءَ 8 مال برداریں ریل روگ ءَ ات کہ نوں ایشانی تہ ءَ دہ کنگ بوتگ، ایشی ءِ ٹارگٹ روچ ءِ تہ ءَ دوازدہ مال بردار انت۔ آئی ءَ گوشت کہ ھزارہ ایکسپریس ءِ اپ گریڈ کنگ بوتگ وھدیکہ اے سال ءِ دسمبر ءَ تاں ایندگہ ریل آنی ھم اپ گریڈ کنگ بیت۔ وفاقی وزیر ءَ گوشت کہ ریلوے اسکول ءُ ہسپتال آنی جاور آنی گہتری ءِ واستہ گامگیج کنگ بوھگ ءَ انت۔ لھتیں وانگجاھانی ماڑی ھراب بوتگ اَنت ءُ پدا جوڑ کنگ بوھگ ءَ اَنت۔ راولپنڈی ریلوے ہسپتال ءَ ابید دگہ ہسپتال آناں آؤٹ سورس کنگ ءِ پیسلہ کنگ بوتگ تانکہ کارمند ءُ آہانی کھول ءَ را گہتریں آسراتی پجاری کنگ بہ بیت۔ آئی ءَ گوشت کہ پیپلز ٹرین سرجمیں کوئٹہ ءَ ھوار کنت، ایشی ءِ فنڈ بلوچستان حکومت ءِ نیمگ ءَ چہ کنگ بیت، نوکیں اسٹیشن ھم جوڑ کنگ بنت، کوچ ھم دمگی رنگ ءَ جوڑ کنگ بنت۔ تھر ءَ سفاری ٹرین ءِ بندات کنگ بوتگ وھدیکہ دگہ سیل ءُ سواد ءِ جاھاں ھم منصوبگ بندی کنگ بوھگ ءَ اِنت۔ آئی ءَ گوشت کہ پنجاب ءِ سر وزیر مریم نواز شریف ءَ لاہور ریلوے اسٹیشن ءِ درائیں بھر ءِ نوک جوڑیشت ءِ واستہ 2ارب کلدار کمک داتگ ءُ زوت مزنیں فرق گندگ بیت۔ ریلوے کراسنگ ءِ جیڈھ ءِ سر ءَ آئی ءَ گوشت کہ سرجمیں ملک ءَ 1875 جاگہ ​​آنی سر ءَ گیٹ نیست بلے اے زمہ واری صوبائی حکومت آنی انت۔ یک جستے ءِ پسو ءَ وفاقی وزیر ءَ گشتگ کہ نادراہی ءِ سرا مسخرہ کنگ نہ بیت، ہر زندانی ءَ را علاج ءِ آسراتی رسگ لوٹیت بلے سزا ءَ چہ بچگ ءِ ھاتر ءَ نادراہی ءَ بہانہ جوڑ کنگ نہ بیت۔ آئی ءَ گوشت کہ من وت سئے جیل آنی تہ ءَ بندی بوتگ آں ءُ آسراتی ایوک ءَ جیل ءِ رھبندانی رد ءَ دیگ بنت۔