وفاقی داخلہ ءِ وزیر محسن نقوی ءَ اسلام آباد ماڈل جال ءُ نیشنل پولیس اکیڈمی ءِ تر ءُ تاب کتگ ، منصوبہ آناں زوت سرجم کنگ ءِ پنت ءُ شون

اسلام آباد۔13فروری  (اے پی پی): وفاقی تہی کارانی وزیر محسن نقوی ءَ اسلام آباد ماڈل جال ءُ نیشنل پولیس اکیڈمی ءَ جوڑیشت ءِ تہ ءَ ھاسٹل ءِ تر ءُ تاب کت ءُ نوک کنگ ءِ کار آنی برجائی ءِ سر ءَ چار ءُ تپاسی کت۔ اے موہ ءِ سر ءَ آئی ءَ پنت ءُ شون کت کہ منصوبگ آنی زوت سرجمی ءِ واستہ ڈبل شفٹ آنی تہ ءَ کار کنگ بہ بیت۔ بریفنگ ءِ وھد ءَ تہی کارانی وزیر ءَ را گوشگ بوت کہ اسلام آباد ماڈل جال منصوبگ کہ 2011 ءَ چہ دیر بوتگ ات نوں تیزی ءَ گوں سرجم بوھگ ءَ انت۔ گوستگیں یک سال ءِ تہ ءَ لھتیں کسانیں تاخیر ءَ پد 85 درسد فیز اول ءِ کار سرجم بوتگ ءُ ان شاء اللہ آیوکیں دو ماہ ءَ جال کارآمد کنگ بیت۔ محسن نقوی ءَ جوڑیشت ءِ جاہ آنی چار ءُ تپاسی ءِ وھد ءَ نوکیں رنگ ءِ کار آنی دیمروئی ءِ سر ءَ دل یکیمی ءِ درشانی کت۔ آئی ءَ گوشت کہ اسلام آباد ءَ نوکیں ماڈل پولیس اسٹیشن ءِ جوڑ کنگ سیکورٹی ءِ تناظر ءَ ناگزیر انت۔ بریفنگ ءَ گوشت کہ تھانہ ءِ واستہ دو حفاظتی دیوال جوڑ کنگ بوھگ ءَ انت، وھدیکہ نوکیں نگرانی ءِ واستہ سینٹرل کنٹرول روم ھم جوڑ کنگ بیت کہ ایشی ءَ چہ درستیں جیڈھ آنی سر ءَ نزیکی ءَ گوں نگرانی کنگ بیت۔ ایشی ءَ پد وزیر داخلہ ءَ نیشنل پولیس اکیڈمی ءِ زیر تعمیراتی ہاسٹل ءِ ھم تر ءُ تاب کت ءُ زیر تربیت ءِ اے ایس پی آنی واستہ جوڑ کتگیں ماڈل روم ءِ ھم چار ءُ تپاسی کت۔ آئی ءَ گوشت کہ نوکیں بنیاتی ڈھانچہ ءَ چہ پولیس ءِ تربیت ءِ معیار ءَ را برز کنگ بیت ءُ افسر آناں جوانیں نندگ ءُ پاد آھگ ءِ آسراتی رس ایت۔ تر ءُ تاب ءِ موہ ءَ چیف کمشنر محمد علی رندھاوا، آئی جی اسلام آباد علی ناصر رضوی ، ڈی جی ایف آئی اے ڈاکٹر عثمان انور  ھم ساڑی بوتگ انت۔