پاکستان بنگلہ دیش نا پوسکن آ حکومت تون واپاری، دفاعی ، دودوربیدہ ئی ہل و تس و علاقائی فورم تیٹی کمکاری ءِ سوگو کننگ کن کاریم کننگ نا چاری ءِ، صدر آصف علی زرداری نا بی این پی نا راہشون طارق رحمان ءِ گچین کاری تیٹی سرسہبی آ مبارکباد

اسلام آباد۔ 13 فروری (اے پی پی) صدر مملکت آصف علی زرداری بنگلہ دیش نیشنلسٹ پارٹی (بی این پی) و اونا راہشون طارق رحمان ءِ قومی گچین کاری تیٹی زبردست گیشتری دوئی کننگ و بروک آ حکومت ءِ جوڑ کننگ نا مینڈیٹ ملنگ آمبارکبادی تسنے۔ جمعہ نادے آایوانِ صدر نا پریس ونگ انا رداٹ صدر مملکت 299 نشست آتیا گچین کاری تا سرسہب اڈتننگ و 127 ملین آن زیات رجسٹرڈ ووٹرآتا شمولیت آ بنگلہ دیش نا الس ءِ ہم مبارکبادی تس۔ صدر مملکت پاکستان نا بنگلہ دیش نا وتواجہی و جمہوری است خواہی تیکن مخ تفی نا درشانی ءِ کرساپارے کہ پاکستان پوسکن آحکومت تون واپاری، دفاعی، دودوربیدہ ئی ہل وتس و علاقائی فورم تیٹی کمکاری ءِ سوگو کننگ کن کاریم کننگ نا چاری ءِ۔ صدر آصف علی زرداری پارے کہ بنگلہ دیش نا گچین کاری سویلی ایشیاکن مستین  نا ریسہ غاتیان مون آہِننگ نا اسہ موقع اسے۔ مستین نا دا ریسہ غاتیٹی علاقائی کمکاری بشمول سارک ہم اوار ءِ، ہرادے  1985 ٹی بنگلہ دیش اٹی ٹہیفنگاسس، اوکان پد ہم دا تنظیم بھارت نا اثراٹی ئس ہرااینو ہم داعظیم فورم ءِ ژند کرینے۔ اودااومیت نا درشانی ءِ کرے کہ ڈھاکہ نا پوسکن آ سیاسی چاگڑد مچ آ ڈیہہ اٹی زیات متوازن ، آجو و تین پہ تینی شرف آ تالان رابطہ غاتے مون آدیک۔ صدر مملکت بنگلہ دیش نا سوگوی، شونداری و شونہالی کن نیک است خواہی تا ہم درشانی ءِ کرے۔