حکومت ڈیجیٹل پاکستان نا وژن نا رداٹ میڈیا و آئی ٹی نا بشخ آتیٹی جدت ءِ مون آ دننگ اٹی ءِ، وزیراعظم شہباز شریف نا جہانی ریڈیو دے انا وخت آ کلہو

اسلام آباد۔ 13 فروری (اے پی پی) وزیراعظم محمد شہباز شریف پارینے کہ حکومت ڈیجیٹل پاکستان نا وژن نا رداٹ میڈیا و آئی ٹی نا بشخ آتیٹی جدت ءِ مون آدننگ ءِ، غٹ اواری اٹ قول کین کہ ریڈیو تون اوار غٹ پاکستانی میڈیا ءِ پوسکن آ خواست آتون ہم گرنچ کرسا اودے سچائی، زمواری و قومی یکجہتی نا سوگو ذریعہ اس جوڑ کینہ۔اوداخیال آتا درشانی ءِ جمعہ نادے  آ وزیراعظم آفس نا میڈیا ونگ آن جہانی ریڈیو دے آ جاری کلہو اٹی کرے۔ وزیراعظم پارے کہ اینو نن جہانی برادری تون اواری اٹ ’’جہانی ریڈیو دے‘‘ ءِ اڈتننگ اُن، پاکستان نا جوڑ مننگ آن پد ریڈیو پاکستان ہی اسہ ہندن ءُ واکدار ذریعہ ابلاغ مسنے ہراقوم ءِ اسٹ کرے، شعور بیدار کرے و معلومداری تا فراوانی ءِ عام کرے۔ اوپارے کہ پاکستان اٹ ریڈیو نا تاریخ کیہی بابت بے کچ روشنا ءِ ہرافتے ٹی غٹ آن اہم دا ادارہ نا ملکی کشاری شونداری، چاگڑدی شعور، دودوربیدہ ئی شون و السی آگاہی ٹی اہم کڑد ادا کننگ ءِ۔ اوپارے کہ اینو ہراتم دنیا ترندی اٹ ڈیجیٹل دور اٹی پترینگ انگ ءِ، ریڈیو ہم پوسکن آ خواست آتون ہم گرنچ مننگ ءِ۔ داسال جہانی ریڈیو ڈے انا مرکزی سرحال’’ریڈیو و مصنوعی ذہانت‘‘ ءِ، ہرا داہیت انا عکاسی ءِ کیک کہ ٹیکنالوجی و انسانی تخلیقی لائخی نا امتزاج آن ابلاغ نا نظام پین گچین و جوان کننگ مریک۔ وزیراعظم پارے کہ پاکستان ہم داپوسکن آ ٹیکنالوجی ءِ تینا کننگ کن عملی گام گیج کننگ ءِ تانکہ ورناچین ءِ پوسکن آمہارت آتیان شپ کننگ مرے و میڈیا نا بشخ ءِ جہانی آب اتون ہم گرنچ کننگ مرے۔ داوخت آ نن دا عزم انا درشانی ءِ کینہ کہ ریڈیو پاکستان ءِ پوسکن آ ٹیکنالوجی، خاص کر مصنوعی ذہانت تون سوگو کرسا اودے السی خذمت، تعلیم، جان جوڑی و قومی شونداری نا گچین ذریعہ جوڑ کینہ۔ وزیراعظم پارے کہ حکومت ڈیجیٹل پاکستان نا وژن نا رداٹ میڈیا و آئی ٹی نا بشخ آتیٹی جدت ءِ مون آ دننگ ءِ تانکہ پاکستان علم و ٹیکنالوجی نا بشخ آتیٹی نمان ہند اس دوئی کننگ کے، ببو، نن غٹ اواری اٹ قول کین کہ نن ریڈیو پاکستان تون اوار غٹ پاکستانی میڈیا ءِ پوسکن آ خواست آتون ہم گرنچ کرسا اودے سچائی ، زمواری و قومی یکجہتی نا سوگو ذریعہ جوڑ کینہ۔