بنجائی وزیر داخلہ محسن نقوی نا اسلام آباد ماڈل زندان و نیشنل پولیس اکیڈمی نا دورہ، ڈٹ آتا زوت  پوروی ناپارت

اسلام آباد۔ 13 فروری (اے پی پی) بنجائی وزیر داخلہ محسن نقوی اسلام آباد ماڈل زندان و نیشنل پولیس اکیڈمی ٹی زیرتعمیر ہاسٹل نا سرجمی اٹ دورہ ءِ کرے و تعمیراتی کاریم تا پیش رفت نا جاچ ءِ ہلک۔ داوخت آ او پارت کرے کہ ڈٹ آتا زوت پوروی کن کاریم ءِ ڈبل شفٹ اٹ کننگے۔ وزیرداخلہ ءِ حوال اٹی پاننگاکہ اسلام آباد ماڈل زندان نا ڈٹ، ہرا 2011آن التوانا گواچی ئس، داسہ ترندی اٹ پورو مننگ ءِ۔ تدوک آ اسہ سال اٹی بھلا پیش رفت آن پد فیزون نا 85 درسد کاریم پورو مسنے و انشاء اللہ بروک آ اِرا تُو اٹی زندان فنکشنل کننگک۔ محسن نقوی بیرکس نا معائنہ ءِ کرسا تعمیراتی آب آ است جمی نا درشانی ءِ کرے۔ اوپارے کہ اسلام آباد اٹی پوسکن ماڈل زندان نا قیام سیکورٹی نا رداٹ المی ءِ۔ حوال اٹی پاننگاکہ زندان اٹی سیکورٹی کن اِرا رکھی دیوال تفنگ انگ ءِ، وخت اس کہ پوسکن مانیٹرنگ کن اسہ مرکزی کنٹرول روم اس ہم جوڑ کننگک ہراکان غٹ امور نا ڈیجیٹل چاروکی مریک۔ اوکان پد وزیرداخلہ نیشنل پولیس اکیڈمی ٹی زیر تعمیر ہاسٹل نا دورہ ءِ ہم کرے و انڈرٹریننگ اے ایس پیز(ASPs)کن جوڑ کروک ماڈل روم انا معائنہ ءِ کرے۔ اوپارے کہ پوسکن انفراسٹرکچر آن پولیس تربیت نا آب بڑز مریک و آفیسر آتے گچین ہنکینی آسراتی دُوبریک۔ دورہ نا وخت آ چیف کمشنر محمد علی رندھاوا، آئی جی اسلام آباد علی ناصر رضوی، ڈی جی ایف آئی اے ڈاکٹر عثمان انور ئسک ہم ساڑی ئسر۔