سرکاری پوسٹ گریجویٹ کالج اصغر مال، راولپنڈی ءَ را راجی مڈی نامینتگ، وفاقی وزیر اورنگزیب کھچی

راولپنڈی۔13جنوری  (اے پی پی): دود ءُ ربیدگ ءُ راجی مڈی ءِ وفاقی وزیر اورنگزیب خان خاچی ءَ گوشت کہ گورنمنٹ پوسٹ گریجویٹ کالج اصغر مال راولپنڈی ءَ را راجی مڈی نامینتگ  ءُ ایشی ءِ باقاعدہ نوٹیفکیشن فروری ءِ گڈ ءَ تاں یک مراگش ءِ وسیلگ ءَ جاری کنگ بیت۔ اے ھیالانی درشانی وفاقی وزیر ءَ کالج ءَ اسٹوڈنٹ کونسل ءِ نوک گچین بوتگیں باسک آنی سوگند چستی مراگش ءَ گوں تران کنان ءَ کت۔ آئی ءَ گوشت کہ اے ادارگ ایوک ءَ اینٹ ءُ سیمنٹ ءِ ماڑی نہ انت بلکینگ ءَ زانت، شعور، کردار سازی ءُ راجی راجدپتر ءِ زندگیں علامت انت۔ نودربر کونسل ءِ نوکیں گچین بوتگیں باسک آناں مبارکی کنان ءَ گوشت کہ آھانی سوگند زمہ واری، ایمانداری، رھشونی ءُ راجی ازمت ءِ سفر ءِ بنگیج اِنت۔ اورنگزیب خان کھیچی ءَ اے گپ ءِ سر ءَ زور پر دات کہ وانگ ءُ زانگ ءِ اصل مول ءُ مراد ایوک ءَ ڈگری ءِ گرگ نہ اِنت بلکیں ھما کردار ءِ جوڑ کنگ اِنت کہ راجانی مقدر ءَ بدل کنت۔ کالج ءِ یک سد سالی راجدپتر ءِ حوالہ ءَ آئی ءَ گوشت کہ گورنمنٹ گریجویٹ کالج اصغر مال ءَ انچیں دانش ور ءُ کواس ودی کتگ ایشاں پاکستان ءِ وانگ ءُ زانگ، فکری ءُ انتظامی ڈھانچہ ءِ مھکم کنگ ءَ ھاسیں کرد پیلو کتگ۔ آئی ءَ گوشت کہ اے کالج ءِ راہداری راجدپتر ءِ وشبو ءَ چہ وشبو انت ءُ ایشی ءِ دیوال ھما استاد ءُ نودربر آنی گواہ انت کہ آہاں علم ءَ را نظم ءُ ضبط ءُ ازمت ءِ تہ ءَ بدل کتگ۔ وفاقی وزیر ءَ کالج انتظامیہ ءُ استاد آنی بے تواری بلے دلگوشیں ازمت آناں ھم ساڑات۔ نودربر آناں گوں تران کنان ءَ آئی ءَ گوشت کہ ورنائیں بچک راج ءِ ٹیکی اَنت ءُ راج ءِ بروسہ ءُ ملک ءِ باندات ایشانی دست ءَ اِنت۔ پاکستان موومنٹ ءِ وھد ءَ قائداعظم محمد علی جناح ءِ نیمگ ءَ نودربر آناں داتگیں کلوہ ءِ ھوالگ ءَ آئی ءَ نودربر آناں پنت ءُ شون کت کہ آ وتی وانگ ءَ گوں لگن ءَ سرجم بہ کن اَنت ءُ ملک ءِ ھزمت ءَ وتی کرد ءَ پیلو بہ کن اَنت۔ برین ڈرین ءِ ھوالگ ءَ منفی پروپیگنڈا ءَ را رد کنان ءَ وفاقی وزیر ءَ گوشت کہ اگاں نودربر آناں درملک ءَ موہ رس ایت گڈا آ پاکستان ءَ تر ءُ تاب بہ کن اَنت ءُ ملک ءَ را نامدار بہ کن اَنت۔ آئی ءَ گوشت کہ پاکستان ورنا آبادی ءَ چہ مالا مال انت، ملک ءَ را موہ آناں چہ پائدگ چست کنگ ءُ راجی شان جوڑ کنگ لوٹ ایت۔ دومی نیمگ ءَ آئی ءَ گوشت کہ گوستگیں سال ءِ مئی ءَ راستی ءِ جنگ ءِ ساھت ءَ سلاھ بندیں اُرد آنی شانداریں سوبمندی ءَ پد جہانی تک ءَ پاکستان ءَ را نوکیں چار ءُ تپاسی ءَ چہ چارگ بوھگ ءَ انت ءُ ملک ءِ شرپ ءُ شرپ سک باز گیش بوتگ۔ آئی ءَ اے سوبمندی ءِ ھاتر ءَ سلاہ بندیں اُرد ءُ راجی کوشست آنی کریڈٹ داتگ۔ وفاقی وزیر ءَ اے ھم جار جتگ کہ کالج وتی چیر دستی ءَ ادارگ آنی گوما پاکستان نیشنل کونسل آف آرٹس، لوک ورسا ءُ پاکستان اکیڈمی آف لٹریچر ءَ ھوار مفاہمت نامہ ءِ سر ءَ دستخط کنت ایشی ءِ چیر دستی ءَ نودربر آناں دود ءُ ربیدگی ءُ لبزانکی کارانی واستہ اسٹیج، ہال ءُ ایندگر آسراتی مفت ءَ دیگ بنت۔ ایشی ءَ چہ پیسر کالج ءِ پرنسپل تنویر احمد عباس خیچی ءُ نودربر کونسل ءِ سروک پروفیسر ڈاکٹر شازیہ نظیر ءَ ھم مراگش ءَ گشتانک دات۔ مراگش ءِ تہ ءَ ھاسیں مہمان ءِ بستار ءَ آثار قدیمہ ءِ شعبہ ءِ ڈائریکٹر جنرل عرفان اللہ ءُ ایگزیکٹو ڈائریکٹر لوک ورسا ڈاکٹر وقاس سلمار ءَ بہر زرتگ ات۔ اے مراگش ءَ مزنیں کساسے ءَ استاد، نودربر ءُ کالج ءِ انتظامیہ ءَ بہر زرتگ ات۔