وفاقی داخلہ ءِ وزیر ءَ امارات ءِ ڈل ءَ گوں گند ءُ نند کتگ، امیگریشن ءِ عمل ءَ را آسراتی دیگ ءِ راہ ءُ درانی سر ءَ گپ ءُ تران

اسلام آباد۔13جنوری  (اے پی پی): متحدہ عرب امارات ءِ ڈل ءَ ڈائریکٹر جنرل کسٹمز و پورٹ سکیورٹی احمد بن لاحج الفلاسی  ءِ سروکی ءَ وفاقی داخلہ ءِ وزیر محسن نقوی ءَ گوں گند ءُ نند کت۔ گند ءُ نند ءِ تہ ءَ پاک ءُ امارات ءِ سیادی ، وت مہ وتی کمک ءُ مسافر آنی واستہ امیگریشن ءِ عمل ءَ را آسراتی دیگ ءِ سر ءَ دلگوش گور کنگ بوت۔ گند ءُ نند ءِ ساھت ءَ اے گپ ءِ سر ءَ تپاک کنگ بوت کہ ’’پری امیگریشن کلیئرنس‘‘ ءِ ھوالگ ءَ پاکستان ءُ متحدہ عرب امارات ءِ نیام ءَ باقاعدہ منوگری ءِ سر ءَ دستخط کنگ بیت۔ نوکیں نظام بنداتی رنگ ءَ پائلٹ بنیاد ءَ بندات کنگ بیت وھدیکہ اولی بھر ءَ پائلٹ پروجیکٹ کراچی ءَ بندات کنگ بیت۔ اے موہ ءِ سر ءَ تران کنان ءَ وفاقی تہی کارانی وزیر محسن نقوی ءَ گوشت کہ پری امیگریشن کلیئرنس ءِ چیر دستی ءَ مسافر آنی رجسٹریشن ءُ ایشی ءَ گوں سیادی داروکیں کلیئرنس پاکستان ءِ تہ ءَ سرجم کنگ بیت ءُ اے نظام ءِ سر ءَ عمل کنگ ءَ پد وھدے مسافر امارات ءَ سر بنت گڈا آھاں دراجیں امیگریشن ءِ عمل ءَ چہ گوزگ ءِ ضلورت نہ بیت ءُ آ ایرپورٹ ءِ وڑ ءَ ڈومیسٹک ءِ مسافر آنی وڑ ءَ سٹریٹ دور ءَ چہ درکپگ ءِ ضلورت بیت۔ آئی ءَ گوشت کہ اے گامگیج ءَ چہ سیل ءُ سواد ءَ را آسانی بیت، وھد ءِ بچت ءُ مسافر آنی واستہ سرجمیں تجربگ ءَ را گہتر کنگ بیت۔ امارات ءِ ڈل ءَ اے گامگیج ءَ را دوئیں ملک آنی الس آنی واستہ سیت مند لیک اتگ ءُ کمک ءِ واستہ وتی جزم ءِ درشان کتگ۔ دیوان ءَ اے گپ ءِ سر ءَ تپاک کنگ بوت کہ پائلٹ پروجیکٹ ءِ انتظامی ءُ تکنیکی تک ءَ را گڈی رنگ دیگ ءِ واستہ سیادی داروکیں واکدار ھمگرنچی ءَ را برجاہ دار اَنت ءُ سوبمندیں پائلٹ ءَ پد اے نظام ءَ را کم کم ءَ گیش جاھاں سر کنگ بیت۔ اے ڈل ءِ تہ ءَ ایگزیکٹو ڈائریکٹر ڈیجیٹل ٹرانسفارمیشن جما عبداللہ القابی، ایگزیکٹو ڈائریکٹر ایئرپورٹس حماد سیف المشغونی  ءُ دگہ مزنیں کارندہ ھوار اتنت۔ گند ءُ نند ءَ تہی کارانی وزیر مملکت طلال چوہدری ءُ تہی کارانی وفاقی سیکرٹری خرم آغا ءَ ھم شریک بوتگ ۔