کراچی ءَ ریلوے ءِ وفاقی وزیر ءَ چیئرمین کے پی ٹی ءَ گوں گند ءُ نند کت، کارگو ٹرانسپورٹیشن ءِ واستہ ریلوے ءِ نظام ءَ را نوک جوڑ کنگ ءُ رسد ءِ کارکردگی ءَ را گہتر کنگ ءِ واستہ یکجائی حکمت عملی ءِ سر ءَ تپاک

کراچی ۔13جنوری  (اے پی پی): ریلوے ءِ وفاقی وزیر محمد حنیف عباسی ءَ کراچی پورٹ ٹرسٹ ءِ تر ءُ تاب کت ایشی ءِ تہ ءَ آئی ءَ کراچی پورٹ ٹرسٹ ءِ چیئرمین ریئر ایڈمرل شاہد احمد ءَ گوں گند ءُ نند کت ایشی ءِ ساھت ءَ کراچی پورٹ ءَ چہ کارگو ءِ ٹرانسپورٹ ءِ واستہ ریلوے ءِ نظام ءَ را نوک جوڑ کنگ ءُ رسد ءِ گہتری ءِ واستہ یکجائی حکمت عملی ءِ سر ءَ تپاک کنگ بوت۔ کارگو ٹرانسپورٹ ءِ شوبگ ءَ مزنیں اصلاحات ءِ جار جنان ءَ وفاقی وزیر ءَ گوشت کہ نوں کارگو ءِ سڑک آنی بدل ءَ ریل ءِ وسیلگ ءَ ٹرانسفر کنگ ءِ سر ءَ سنجیدگی ءَ گوں چار ءُ بچار کنگ بوھگ ءَ انت۔ آئی ءَ اے گپ ءِ پدرائی کت کہ پاکستان ریلوے ءِ سرجمیں کارگو برگ ءِ گنجائش ءَ را زوت مزنیں کساسے ءَ گیش کنگ بیت تانکہ کراچی بندرگاہ ءِ اسٹریٹجک ارزشت ءَ چہ راجی ءُ میاں اوستمانی تجارت ءَ سرجمی ءَ کارمرد کنگ بہ بیت۔ محمد حنیف عباسی ءَ یک ھاسیں سنگ میل ءِ ذکر کنان ءَ گوشت کہ ایم ایل ون منصوبگ جولائی 2026ءَ چہ کراچی بندرگاہ ءَ چہ باقاعدہ بندات کنگ بیت، ایشی ءَ ابید کراچی بندرگاہ ءَ چہ پیپری ءَ تاں 54کلومیٹر ءِ ریلوے ءِ سیکشن ھم اپ گریڈ کنگ بیت تانکہ بار بردار گاڑی آنی روگ ءُ آیگ ءَ را آسراتی رس ایت۔ ریلوے ءِ وزیر ءَ گوشت کہ آیوکیں پنچ ماہ ءِ ساھت ءَ پاکستان ریلوے روچے چار مال برداریں ریل چلائینگ ءَ انت ۔ اے موہ ءِ سر ءَ کے پی ٹی ءِ چیئرمین ریئر ایڈمرل شاہد احمد ءَ دل یکیمی دات کہ بلک کارگو ءِ ٹرانسپورٹ ءِ واستہ ریل ءَ را اولیت دیگ بیت ءُ کے پی ٹی وت وتی سیمسر آنی تہ ءَ اندری ریلوے ٹریک آناں اپ گریڈ کنگ ءِ کار ءَ سرجم کنت۔ دوئیں رہشوناں کراچی بندرگاہ ءَ گوں ہمگرنچیں ریلوے ءِ بنیاتی ڈھانچہ ءَ را گیش موثر جوڑ کنگ ءَ ملک ءِ معیشت ءَ را گہتر کنگ ءِ وتی جزم ءِ  درشان۔