سر وزیر بلوچستان ءَ جان سلامتی کارڈ ءِ سر ءَ علاج ءِ مھتل کنگ ءِ نوٹس زرتگ ، زوت رپوٹ لوٹ اِتگ ءُ جیڈھ ءِ گیش ءُ گیوار ءِ ھکم داتگ

کوئٹہ۔ جنوری (اے پی پی) سر وزیر بلوچستان میر  سرفراز بگٹی ءَ لھتیں نادراھجاھ آنی تہ ءَ ھیلتھ کارڈ ءِ چیر دستی ءَ علاج ءِ مھتل کنگ ءِ ھوالگ ءَ درکپوکیں ھال آنی سر ءَ سکیں نوٹس زرتگ ءُ اے بابت ءَ ھیلتھ پروگرام ءِ محکمہ ءُ ھیلتھ کارڈ ءِ سیادی داروکیں کارندہ آنی نیمگ ءَ چہ ترندیں ءُ سرجمیں رپورٹ ءِ لوٹ کتگ۔ بلوچستان ءِ بنجاھی وزیر گس ءَ چہ شنگ بوتگیں نمدی ءِ تہ ءَ بلوچستان ءِ سر وزیر میر  سرفراز بگٹی ءَ صوبائی جان سلامتی ءِ وزیر ءَ را پنت  ءُ شون کتگ کہ آ اے جیڈھ ءَ را زوت گیش ءُ گیوار بہ کنت ءُ اے گپ ءَ را دل یکیمی بہ کنت کہ جان سلامتی کارڈ ءِ چیر دستی ءَ ھچ نادراہ ءَ را علاج ءَ چہ بند کنگ مہ بیت۔ آئی ءَ اے گپ پدر کت کہ گریب ءُ مستحقیں نادراہ آنی علاج ءِ تہ ءَ ھرچ وڑیں لاپروائی ءُ رد ءُ بند برداشت کنگ نہ بیت۔ میر سرفراز بگٹی ءَ ھم پنت  ءُ شون کتگ کہ ہیلتھ کارڈ ءِ چیر دستی ءَ درستیں ہسپتال آنی واجبات زوت ادا کنگ بہ بنت دانکہ ہسپتال مالی مشکلات ءِ آماچ مہ بنت ءُ علاج ءِ عمل بے رکاوٹ ءَ برجاہ بہ بیت۔ سر وزیر بلوچستان ءَ گوشت کہ ہیلتھ کارڈ پروگرام صوبہ ءِ گریب ءُ تنگدستیں مہلوک ءِ واستہ یک ھاسیں وشھالی منصوبگ انت، ایشی ءِ وسیلگ ءَ ھزاراں نادراہ سیت مند بوھگ ءَ انت، پمیشکا اے پروگرام ءِ چیر دستی ءَ علاج ءِ عمل ہر قیمت ءَ برجاہ بہ بیت۔ آئی ءَ سیادی داروکیں واکدار آناں سک باز پنت  ءُ شون کتگ کہ اے درگت ءَ ھچ وڑیں لاپروائی ءَ مہ کن اَنت۔