بنجائی وزیر اورنگزیب خان کھچی نا گورنمنٹ گریجویٹ کالج اصغر مال راولپنڈی ءِ قومی میرات گوندنگ نا پڑو

اسلام آباد/راولپنڈی۔13 جنوری (اے پی پی) بنجائی وزیر قومی میرات و دودوربیدہ اورنگزیب خان کھچی گورنمنٹ گریجویٹ کالج اصغر مال راولپنڈی ءِ پاکستان نا قومی میرات گوندنگ نا پڑو کرسا پارینے کہ زوت دا تاریخی تعلیمی ادارہ ٹی اسہ باضابطہ دود اس اڈتننگک ہراٹی اودے قومی میرات نا درجہ تننگک۔ سے شنبے نادے آوزارت قومی میرات و دودوربیدہ نا کنڈآن جاری بیان نا رداٹ کالج اٹی اڈ ہلوک دود آن تران کرسا بنجائی وزیر پارے کہ گورنمنٹ گریجویٹ کالج اصغر مال بیرہ اسہ تعلیمی ماڑی اس آخا بلکن علم، شعور، کڑد و قومی تاریخ نا اسہ زندہ استعارہ سے۔ اوطالب علم آتے قوم انا آخبت و ملک انا روشنا استار گوندسا پارے کہ قائد اعظم محمد علی جناح قیام پاکستان نا وخت طالب علم آتے تعلیم آ زور تننگ نا تلقین کریسس و اینو ہم ہندا کلہو تننگ انگ ءِ کہ ورناک علم و کڑد ءِ تینا شعار کیر۔ بنجائی وزیر پارے کہ طالب علم آتے مرے کہ ہراتم اوفتے پیشن نا ملک ہِننگ نا موکل ملے او پاکستان نا مثبت سفیر جوڑ مرسا کار۔ اوپارے کہ پاکستان نا فوج انا جیرت مندانہ قربانی و معرکہ حق آن پد جہانی کہول آ پاکستان نا عزت و شرف اٹی نمان ودکی مسنے و پیشن نا دنیا ٹی مخلوق پاکستان ءِ شرف نا نظر اٹ ہرک۔ اوکالج انتظامیہءِ وزارت دودوربیدہ و اونا ماتحت ادارہ غاتون معاہدہ غاتا سلہ ءِ خلسا پارے کہ وزارت نا غٹ ادارہ غاک تعلیمی و دودوربیدہ ئی کمکاری کن تیار ءُ۔