پاکستان و جاپان نا نیام اٹ 2.91 ارب ین نا معاہدہ غا دستخط

اسلام آباد۔ 13 جنوری (اے پی پی) پاکستان وجاپان سویلی پنجاب اٹی چناتا جان جوڑی نا چیٹ انا آسراتی تیٹی گچینی نا بابت 2.91 ارب جاپانی ین مالیت نا ڈٹ آ دستخط کرینو، دا بابت وزارت اقتصادی امور اٹی خصوصی دود اس اڈ ہلک۔ وزارت اقتصادی امور نا کنڈآن سے شنبے نادے آداڑے جاری بیان نا رداٹ حکومتِ جاپان جاپانی گرانٹ اِن ایڈ نا رداٹ جاپان انٹرنیشنل کوآپریشن ایجنسی(جائیکا) نا کمک اٹ دا ڈٹ اکن 2.91 ارب جاپانی ین (کم  و ود 18.62ملین امریکی ڈالر) نا منظوری ءِ تسنے۔ دا ڈٹ انا مسخت چلڈرن ہسپتال و انسٹی ٹیوٹ آف چائلڈ ہیلتھ (آئی سی ایچ ) ملتان اٹی تشخیصی و درمان نا نظام ءِ سوگو کننگ و آسراتی تا ودکی و المی طبی ازباب آتا فراوانی نا کمک اٹ اودے ڈیہہ انا اسٹ انگا  ٹرشری کیئر ہسپتال نا وڑاٹ پین گچین کننگ ءِ۔ دا ڈٹ زیات خطرہ غاتا گواچی پوسکن ودی مروک، و ناجوڑی تیٹی اختہ چناتے آب اٹ طبی خذمت فراوان کننگ اٹ کمکار مریک، ہراٹی سویلی پنجاب و ایلو صوبہ غاتیٹی چناتیکن جان جوڑی نا خذمت آتا آب اٹ گچینی بریک۔ ایکسچینج آف نوٹس آ پاکستان نا کنڈآن سیکرٹری اقتصادی امور محمد حمیر کریم و جاپان نا کنڈآن پاکستان اٹ تعینات سفیر اکاماتسوشوئچی دستخط کریر۔ سیکرٹری اقتصادی امور جاپانی حکومت و الس نا نہادی کمکاری نا ستاءِ کرسا داعزم انا درشانی ءِ کرے کہ ڈٹ انا سرسہب نفاذ ءِ پک کننگ کن ہرممکن آسراتی فراوان کننگک و ہڑتوم آملک آتا نیام اٹ پین بامعنی کمکاری ءِ مون  آ دننگک۔ جاپانی سفیر اکاماتسو شوئچی حکومتِ جاپان نا کنڈآن حکومتِ پاکستان تون خڑکی کمکاری ءِ برجاتخنگ و دوستانہ تعلقداری و ہڑتوم آ کنڈآتا کمکاری ءِ پین سوگو کننگ نا عزم انا درشانی ءِ کرے۔