جہانی ادارہ جان جوڑی نا کنڈآن گاڈی تا حوالگی دود، حکومت ناوژن بیرہ آسراتی تا فراوانی آخا بلکن مخلوق ءِ ناجوڑی تیان بچفنگ ءِ، بنجائی وزیر مصطفیٰ کمال

اسلام آباد۔ 13 جنوری (اے پی پی) جہانی ادارہ جان جوڑی (ڈبلیو ایچ او)نا کنڈآن پاکستان اٹی جان جوڑی نا نظام ءِ سوگو کننگ کن گاڈی تا حوالگی نا دود اس اڈہلک ہراٹی ناجوڑی تا توننگ و بنداوی جان جوڑی نا آسراتی تا فراوانی آ زور شاغنگا۔ دود آن تران کرسا بنجائی وزیر قومی جان جوڑی سید مصطفیٰ کمال پارے کہ بیرہ ہسپتال و درمان نا آسراتی فراوان کننگ حکومت نا وژن اف بلکن اصل مشن الس ءِ ناجوڑ مننگ آن بچفنگ ءِ۔ اوپارے کہ پاکستان نا ہیلتھ کیئر سسٹم چندی چیلنج آتا گواچی ءِ و اگہ وخت اس بھلو کچ اسے ٹی مخلوق ناجوڑ مرے تو جان جوڑی نا پورو پنجر زور انا شکار مریک ہرانا پیدوار درور کووڈ۔ 19 دین ءِ ہرادے شون ہلوک ملک آک ہم گچین وڑاٹ سنبھالنگ کتور۔ اوپارے کہ ملک اٹی ہرسال کم و ود 62 لکھ چناودی مریک، ولے چنا تا ودی آن بھلن مننگ اسکان ساڑی ایکو سسٹم بے مٹ اف ، دِیر، سفائی و آب و ہوا تون گنڈوک ویل آک ناجوڑی تیٹی ودکی نا سوب جوڑ مننگ ءُ، ہراٹی بھلا ہسپتال آتیٹی ناجوڑ آتا بھلا رش مون آ بریک۔ وزیر جان جوڑی پارے کہ اسہ ڈاکٹر اس ہڑدے درزن آ ناجوڑ آتے ہُننگ آ بیوس ءِ وخت اس کہ وینٹی لیٹرز نا کمتی کون آ ویل قومی سیکورٹی چیلنج نا دروشم اختیار کرینے۔ اوداہیت آ زور شاغا کہ ملک ءِ’’سِک کیئر‘‘ نا جاگہ غا گچین ’’ہیلتھ کیئر‘‘ سسٹم نا گرج ءِ ہراٹی گلی، محلہ و خلقی کہول آ ناجوڑی تا توننگ ءِ اولیت تننگے۔ اوپارے کہ حکومت 13 ناجوڑی تیان بچفنگ کن رکھی ٹیکہ مفت فراوان کننگ ءِ ولے الس ءِ ویکسی نیشن آ پت کروئی مریک۔ اونا پاننگ ئس کہ ڈبلیو ایچ او نا کنڈآن تروک آ گاڈیک مرمر انگا علاقہ غاتیٹی رکھی ٹیکہ و بنداوی جان جوڑی نا سرجزآتیکن کاریم اٹ اتنگک۔