بنجائی وزیر پیٹرولیم علی پرویز ملک نا سعودی عرب نا وزیر صنعت و معدنی وسیلہ بندر ابراہیم الخوریف تون اوڑدہی

ریاض۔ 13 جنوری (اے پی پی) بنجائی وزیر پیٹرولیم علی پرویز ملک سعودی عرب نا وزیر صنعت و معدنی وسیلہ بندر ابراہیم الخریف تون اوڑدہی کرے  ہراٹی معدنیات و کانڑ کنی نا بشخ اٹی ہڑتوم آ کنڈآتا کمکاری ءِ سوگو کننگ، اسیجائی زرکاری نا وارخواہی پٹنگ و معدنی ویلیوچین نا چندی ریسہ غاتیٹی اشتراک عمل ءِ ودفنگ آ سرجمی اٹ گپ وتران کننگا۔ سے شنبے نادے آ ترجمان پیٹرولیم ڈویژن نا کنڈآن جاری بیان نا رداٹ سعودی عرب نا دارالحکومت ریاض اٹی سعودی وزارت صنعت و معدنی وسیلہ غاتا کنڈآن فیوچر منرلز فورم (ایف ایم ایف) 2026 نا وخت آ اڈ ہلوک اوڑدہی ٹی سعودی وزیر فورم اٹی پاکستان نا بشخ ہلنگ نا ستاءِ کرسا پارے کہ جہانی چکار تیزی اٹ کانڑ کنی و اہم معدنیات آتا کنڈآن منتقل مننگ ءِ۔ اومعدنی بشخ اٹی پاکستان و سعودی عرب نا نیام اٹ کمکاری نا گیشتر گمان تے مون آتخا و باوری کرفے کہ سعودی عرب تینا علمی وسیلہ وتکنیکی مہارت نا کمک اٹ پاکستان نا معدنی بشخ انا کمکاری ءِ کیک۔ اوپاکستان نا ورنا و متحرک افرادی قوت ءِ ہم اسہ اہم ءُ میرات اس گوندا۔ بنجائی وزیر علی پرویز ملک ہڑتوم آملک آتا نیام اٹ سوگو برادرانہ تعلقداری نا درشانی ءِ کرساپارے کہ پاکستان کمکاری ءِ پین گہراکننگ کن سنبرینگوک ءِ۔ اوپارے کہ جیولوجیکل سروے آف پاکستان، سعودی جیولوجیکل سروے تون شریداری عمل آ کاریم کننگ ءِ و ٹیتھیان بیلٹ نا گیشتر معدنی لائخی تے تالان کرے ہراٹی ریکوڈک بیرہ اسہ چنکو بشخ اسے۔ اومستی پارے کہ کھد آتا تیاری و طبی ازباب آتا صنعت اٹی ہم اسیجا ڈٹ آتا نمان وارخواہی ساڑی ءِ۔ پاکستانی ڈل اٹی بڑزکو کہولی پالیسی ساز، سرکاری ادارہ غاتا سروک، نجی بشخ انا نمائندگان و کانڑ کنی نا بشخ انا اہم شریدار اوار ءُ، ہرافتے ٹی پی پی ایل، اوجی ڈی سی ایل، ماڑی انرجیز، جی ایچ پی ایل، ایف ڈبلیو او، پی ایم ڈی سی، سائنڈک میٹلز و بلوچستان آن تعلق تخوک آ معدنی کمپنی تتون اوار اوار خصوصی سروس فراوان کروک آک ہم بشخ ہلکر۔