حیدر آباد سکھر موٹروے ڈٹ ءِ زوت پورو کننگ حکومت نا اولیت ءِ، وزیر مملکت ارمغان سبحانی نا قومی اسمبلی ٹی ورندی

اسلام آباد۔ 13 جنوری (اے پی پی) قومی اسمبلی ءِ پاننگانے کہ لاہور۔ بہاولنگر موٹروے ڈٹ ءِ پی ایس ڈی پی آن فنڈز فراوان کپننگ انگ ءِ، حیدر آباد سکھر موٹروے ڈٹ ءِ زوت آن زوت پورو کننگ حکومت نا اولیت ءِ۔ سے شنبے نادے آ قومی اسمبلی نا دیوان اٹی بنجائی مالی واجبات آتا خلاف ورزی و قومی تزویراتی ڈٹ آتیان وسیلہ غاتا گدریفنگ نا کمک اٹ 465 ارب روپئی نا لاہور۔ بہاولنگر موٹروے ڈٹ ءِ بنجائی تحویل اٹی ہلنگ نا بابت سید نوید قمر، شرمیلا فاروقی، آغا رفیع اللہ، میر غلام علی تالپور و عبدالقادر پٹیل نا چکاری نوٹس آ وزیر مملکت ارمغان سبحانی پارےکہ پی ایس ڈی پی آن اسہ پاولی اس ہم دا ڈٹ اکن تفننگ انگ ءِ۔ سید نوید قمر پارے کہ ایشو دا ڈٹ ءِ بنجائی تحویل اٹی ہلنگ نا بابت ءِ۔ وزیر مملکت پارے کہ سکھر حیدر آباد موٹروے حکومت نا اولیت ءِ، اونا پنچ پیکج ءُ ہراٹی اِرا ایشیئن انفراسٹرکچر ڈویلپمنٹ بینک، اسہ اسلامی شونداری بینک و اِرا پبلک پرائیویٹ پارٹنر شپ نا رداٹ پورو کننگک، دا ڈٹ ءِ زوت پوروی اسکان سرکننگک انتئے کہ ہچ ءُ شک اس اف کہ دا ڈٹ ملکی زرگزران اٹی تمبہ نا حیثیت تخک۔ شرمیلا فاروقی پارے کہ قومی تزویراتی ڈٹ آتیان فنڈ آتے بایدے گدریفنگپ۔ وزیر مملکت پارے کہ 465 ارب روپئی گدریفپننگ انگ ءِ، دا ڈٹ پی ایس ڈی پی نا بشخ ءِ، پی ایس ڈی پی نا ڈٹ ءِ تعلقدار فورم ایکنک آ گدریفنگ نا منظوری ءِ تسوسس۔ وزیر مملکت پارے کہ حیدر آباد سکھر موٹروے ڈٹ ءِ وزیراعظم نا وژن نا رداٹ زوت آن زوت پورو کننگ نا کوشست مننگ ءِ۔ اوپارے کہ موٹروے و قومی اہمیت نا ڈٹ آتے پورو کننگ مسلم لیگ (ن) نا طرہ امتیاز ءِ۔ سید نوید قمر نا سلاہ غا اسپیکر دا باندات ءِ قومی اسمبلی نا قائمہ کمیٹی ڈٹ بندی نا دُوٹی تس۔