سندھ طاس معاہدہ نا معطلی ڈیہہ انا امن و پاکستان نا آبی حق آتیکن بھلو خطرہ اس، بھارت نا آبی جارحیت نا مسخت ننے دِیر انا تنکی نا گواچی کننگ ءِ، بنجائی وزیر پروفیسر احسن اقبال

اسلام آباد۔ 13 جنوری (اے پی پی) بنجائی وزیر ڈٹ بندی شونداری و خصوصی گام گیج پروفیسر احسن اقبال پارینے کہ بھارت نا کنڈآن سندھ طاس معاہدہ نا معطلی ڈیہہ انا امن و پاکستان نا آبی حق آتیکن بھلو خطرہ اسے ، بھارتی آبی جارحیت نا مسخت پاکستان ءِ دیر انا تنکی نا گواچی کننگ ءِ ، چاگڑدی و موسمیاتی بدلی تا سوب آن گلیشیئرز نا دِیر مننگ اٹی خطرناک حداسکان ودکی مسنے۔ اوداہیت ءِ سے شنبے نادے آداڑے ٹاسک فورس نیشنل واٹر سیکورٹی نا اولیکو دیوان نا کماشی ءِ کرساپارے۔ دیوان اٹی آبی وسیلہ میاں محمد معین وٹو ہم ساڑی ئس۔ بنجائی وزیر وزارت آبی وسیلہ غاتا رداٹ خصوصی ورکنگ گروپ اس جوڑ کننگ و 51 دے اٹی عمل نا قابل سلاہ و سوج پلاننگ کمیشن ءِ پیش کننگ نا پارت کرے۔ دیوان اٹی پاننگاکہ ہندوکش و ہمالیہ ریجن اٹی برف آتا دِیر مننگ نا کچ اٹی 65 درسد ریکارڈ ودکی مس و سیاچن گلیشیئر سالانہ 50 آن 60 میٹر نا رفتار اٹ دِیر مننگ ءِ، ہمالیہ نا مش تیٹی برف انا دِیر مننگ نا کچ 30 میٹر سالانہ اسکان سرمس۔ وزیر ڈٹ بندی دِیر انا پالیسی تے عملی ڈٹ آتیٹی بدل کننگ کن دمدستی ٹیکنیکل ورکشاپ اس بٹنگ نا پارت کرسا پارے کہ چاگڑدی بدلی آن گلیشیئرز آتا دِیر مننگ اٹی خطرناک حداسکان ودکی مسنے و 1960 آن داتم اسکان گلیشیئرز نا 23 درسد برف دِیر مرسا زیان مسنے۔ اوپارے کہ چاگڑدی بدلی تا سوب پاکستان ءِ دِیر انا سنگین و مریس مدی تنکی تون مون تننگ نا گڑتی ءِ، بھارت نا کنڈآن سندھ طاس معاہدہ نا معطلی ڈیہہ انا امن و پاکستان نا آبی حق آتیکن بھلو خطرہ اسے۔ اونا پاننگ ئس کہ بھارت نا آبی جارحیت نا مسخت پاکستان ءِ دِیر انا تنکی نا گواچی کننگ ءِ، دریاب آتا وہینگ اٹی ودوک آ غیر یقینی حالیت پاکستان کن بھلو خطرہ اسے ۔ پروفیسر احسن اقبال پارے کہ دِیر انا رکھ غذائی سلامتی و زرگزرانی سوگوی نا ضمانت ءِ۔ اوبنجا وصوبہ غاتا نیام اٹ نیشنل واٹر پالیسی آ ہم گرنچی ءِ ہر حال اٹ سوگو کننگ نا پارت کرے۔ اوپارے کہ واٹر سیکورٹی بیرہ اسہ بشخ اس آخا بلکن ملکی بقاو وتواجہی نا بنداو ءِ۔