کراچی، بنجائی وزیر ریلوائی نا چیئرمین کے پی ٹی تون اوڑدہی

کراچی۔ 13 جنوری (اے پی پی) بنجائی وزیر ریلوائی محمد حنیف عباسی کراچی پورٹ ٹرسٹ (کے پی ٹی ) نا دورہ ءِ کرے ہراڑے او چیئرمین کے پی ٹی ریئر ایڈمرل شاہد احمد (ر) تون اوڑدہی کرے ہراٹی کراچی پورٹ آن کارگو نا ترسیل کن ریلوائی نا نظام ءِ پوسکن آ وڑتتون ہم گرنچ کننگ و لاجسٹکس نا کارکڑد ءِ گچین کننگ کن اسیجاحکمت عملی آ امنا کننگا۔ بنجائی وزیر کارگو ٹرانسپورٹ نا بشخ اٹی بھلو اصلاحات اسے نا پڑو کرسا پارے کہ داسہ سڑک آتا جاگہ غا ریل انا کمک اٹ کارگو نا گدریفنگ آ سنجیدگی اٹ سجفنگ انگ ءِ۔اوپیدوار کرے کہ پاکستان ریلوائی نا کارگو ہرفنگ نا جم لائخی ٹی زوت نمان ودکی کننگک تانکہ قومی و جہانی واپار اٹی کراچی پورٹ انا اسٹریٹجک اہمیت آن پبی فائدہ ہرفنگ مرے۔ محمد حنیف عباسی اسہ اہم مزل اسے نا ذکر ءِ کرسا پارے کہ ایم ایل ون ڈٹ انا باقاعدہ بناجولائی 2026 اٹی کراچی پورٹ آن کننگک، داکان بیدس کراچی پورٹ آن پیری اسکان 54 کلومیٹر مرغن ریلوائی سیکشن نا اپ گریڈیشن ہم کننگک تانکہ مال بردار گاڈی تا ہن و براٹی آسانی مرے۔ وزیر ریلوائی پارے کہ پاکستان ریلوائی بروک آ پنچ تُو اٹی ہڑدے چار فریٹ ٹرین تے چلیفک۔ داوخت آ چیئرمین کے پی ٹی ریئر ایڈمرل شاہد احمد باوری کرفے کہ بلک کارگو نا ترسیل کن ریل ءِ اولیت تننگک و کے پی ٹی تینا دنگ اٹی ساڑی اندرونی ریلوائی ٹریک آتا اپ گریڈیشن نا کاریم ءِ تینٹ پورو کیک۔ ہڑتوم آ راہشونک داعزم انا درشانی ءِ کریر کہ کراچی پورٹ اتون گنڈوک ریلوائی انفراسٹرکچر ءِ پین گچین جوڑکرسا ملکی زرگزران اٹی گچینی اتنگک۔