راجی بیانیہ ءِ ھلاپ ءَ ھچ وڑیں گپ ءُ تران، ابہام یا نرمیں رھبند برداشت کنگ نہ بیت، وزیر مملکت سینیٹر طلال چوہدری

اسلام آباد۔ 12 جنوری(اے پی پی): تہی کارانی وزیر مملکت سینیٹر طلال چوہدری ءَ گوشت کہ راجی بیانیہ ءِ ھلاپ ءَ ھچ وڑیں گپ، ابہام یا نرمیں رھبند برداشت کنگ نہ بیت پرچا کہ ناشرکاری ءِ جیڈھ ءِ سر ءَ ابہام دراصل ناشرکار آناں نپ رسگ ءِ برابر اِنت۔ ناشرکارانی واستہ ہر وڑیں سافٹ کارنر یا رعایت پاکستان ءِ مفاد ءِ ھلاپ انت۔ اگاں صد رند ءَ سیاسی جنبش بندات کنگ بہ بنت ھم پاکستان ءِ استحکام ءُ راجی بیانیہ ءِ ھلاپ ءَ ھچ وڑیں گپ ءُ تران ءُ کارروائی برداشت کنگ نہ بیت۔ دوشمبے ءِ روچ ءَ پارلیمنٹ گس ءِ ڈن ءَ میڈیا ءَ گوں تران کنان ءَ آئی ءَ گوشت کہ پاکستان ءَ ناشرکاری ءِ ھلاپ ءَ جنگ ءَ بے دروریں قربانی داتگ نوں کس ءَ را راجی سلامتی ءِ بنیاتی پوزیشن ءَ را نزور کنگ ءِ موہ دیگ نہ بیت۔ اگاں کسے ءَ ناشرکاراں گوں ھمدردی ھست گڈا اوگانستان ءَ بہ روت بلے پاکستان ءِ ھلاپ ءَ کجام ھم بیانیہ ءُ رویہ کجام ھم جاوراں منگ نہ بیت۔ سینیٹر طلال چوہدری ءَ گوشت کہ توشاخانہ دوم سکیں ھاسیں کیسے ءُُ سزا ناگزیر اِنت۔ انصاف ءِ لوٹاں پیلو کنگ ریاست ءِ ذمہ واری انت ایشی ءِ سرا سیاست کنگ مہ بیت۔ آئی ءَ گوشت کہ مئے 1200 ءَ چہ گیش پاکستانی ناشرکاری ءِ واکیہ آنی تہ ءَ شھید بوتگ اَنت ایشانی تہ ءَ 60 ءَ چہ 70درسد وئیل خیبرپختونخوا ءَ بوتگ اَنت۔ آئی ءَ گوشت کہ جست ایش انت کہ چنچو قربانی ءَ چہ پد عزت بیدار بیت ءُ ناشرکاری ءِ ھلاپ ءَ ھاسیں موقف چست کنگ بیت۔ وفاقی وزیر ءَ خیبر پختونخوا ءِ حکومت ءِ سر ءَ سک باز ایراد گپتگ ءُ گوشت کہ صوبائی حکومت ناجائزیں اوگان مہلوک ءَ را پدا روان دیگ ءِ واستہ تیار نہ اِنت ءُ ناشرکاری ءِ ھلاپ ءَ کارروائی ءِ ھوالگ ءَ عملی گامگیج زورگ ءَ چہ چک ءُ پد اِنت۔ آئی ءَ گوشت کہ صوبگ ءِ بازیں ضلع آنی تہ ءَ انسداد ناشرکاری ءِ ھچ وڑیں قوت نیست، یک ضلعے ھم نیست کہ اودا سیف سٹی ءِ سرجمیں منصوبگ سرگرم اِنت، وھدیکہ پشاور ءَ سیف سٹی منصوبگ انگت ءَ ناسرجم اِنت۔ طلال چوہدری ءَ گوشت کہ خیبر پختونخوا ءَ زانت ءُ سرپدی ءَ فرانزک لیب جوڑ نہ کنگ بوتگ ءُ لوٹوکیں وسیلگ انسداد ناشرکاری ادارگ آنی سر ءَ ھرچ کنگ نہ بوتگ تانکہ ناشرکار آنی ھلاپ ءَ موثر کارروائی کنگ مہ بیت۔ آئی ءَ گوشت کہ ناشرکاری کجا چہ آھگ ءَ انت، آئی ءِ پناہ گاہ کجا انت ءُُ آئی ءِ کمک ءَ کئے کنگ ءَ انت اے گپ نوں کس ءَ چہ راز نہ انت۔ آئی ءَ گوشت کہ اوگانستان ءَ پابندی جتگیں گل آنی تربیتی کیمپ ءُُ پناہ گاہ است انت ءُُ ایشی ءِ نیمگ ءَ نہ ایوک ءَ پاکستان ءَ بلکیں دگنیا ءِ دو درجن ءَ چہ گیش ملک آنی نیمگ ءَ اشارہ کنگ بوتگ، ایشی ءِ باوجود اگاں کسے ابہام پیداک کنت گڈا ایشی ءِ پُشت ءَ المی انت کہ چیزے سبب بہ بیت۔ وزیر مملکت ءَ الزام جتگ کہ تحریک انصاف ءِ پالیسی راجی بیانیہ ءِ تہا ابہام پیداک کنگ ءُُ ناشرکاراں ناشرکار گشگ ءَ چہ بچگ بوتگ۔ آئی ءَ گوشت کہ گوستگیں 11 سال آنی تہ ءَ تحریک انصاف ءِ ھچ ھاسیں کارندہ، وزیر ءُ صلاحکار ءِ سر ءَ اُرش کنگ نہ بوتگ وھدیکہ خیبر پختونخوا ءِ ایندگہ سیاسی ءُ مذھبی گل ناشرکاری ءِ آماچ بوتگ اَنت۔ طلال چوہدری ءَ گوشت کہ ناشرکار آنی ھلاپ ءَ گپ جنوکیں پارٹی ءُُ رہشون آناں نشانگ جوڑ کنگ بیت وھدیکہ ھما عناصر کہ وت ابہام پیداک کن اَنت آ ایمن ءُ سلامت بنت۔ آئی ءَ گوشت کہ تحریک انصاف ءِ جارکش انگت ءَ سیکورٹی فورسز ءِ گوما اوشتگ ءَ چہ رک اَنت ءُُ ھر جاگہ ​​کہ رو اَنت راجی بیانیہ ءِ ھلاپ ءَ موقف زور اَنت۔ آئی ءَ گوشت کہ خیبر پختونخوا ءِ سرکار گشگ ءَ اِنت کہ آ ھچ وڑیں آپریشن ءِ موہ نہ دنت وھدیکہ ناشرکاری ءِ ھلاپ ءَ فیصلہ کنوکیں گامگیج ناگزیر جوڑ بوتگ۔ آئی ءَ اے گپ پدر کت کہ ناشرکار آنی واستہ ھرچ وڑیں نرمیں کونے یا رعایت پاکستان ءِ مفاد ءِ ھلاپ اِنت۔ وزیر مملکت ءَ گوشت کہ پاکستان ءِ دوئیں ھمساھگ آنی تہ ءَ یکے پاکستان ءَ سرمایہ کاری کنگ ءَ اِنت وھدے کہ دومی ناشرکاری ءِ کمک ءَ کنگ ءَ اِنت، ابہام پیداک کنگ ناقابل فہم اِنت۔ آئی ءَ گوں ھاسیں گالاں گوشت کہ راجی سلامتی، سیکورٹی فورسز ءُُ ناشرکاری ءِ ھلاپ ءَ ریاست ءِ موقف ءِ سر ءَ ھچ وڑیں سوگند نہ بیت۔ آئی ءَ گوشت کہ سیاسی چست ءُ ایر صد رند ءَ بندات کنگ بہ بنت ھم پاکستان ءِ استحکام ءُ راجی بیانیہ ءِ ھلاپ ءَ ھچ وڑیں گپ ءُ تران ءُ کارروائی برداشت کنگ نہ بیت۔ سینیٹر طلال چوہدری ءَ گوشت کہ ھرکس کہ راجی لال لیکہ ءَ چہ ٹپّ ایت آ وتی سیاست ءَ ھلاس کنت پرچا کہ اے ملک ءَ پاکستان ءِ ھلاپ ءَ بیانیہ جوڑ کنوک آنی واستہ گنجائش نیست۔