ردیں ھال انوگیں دور ءِ مستریں ءُ سنگین تریں چیلنج اِنت، اے چیلنج ءَ گوں گر ءُ چیل بوھگ ءِ ھاترا سرکار، رسانکدر، وانگ ءُ زانگ ءِ ادارگ ءُ سول سوسائٹی وتی کرد ءَ پیلو کنگ لوٹ اَنت، عطا اللہ تراڑ

اسلام آباد۔ 12 جنوری (اے پی پی): وفاقی وزیر ءِ اھوالکاری ءُ شنگکاری عطا اللہ تراڑ ءَ گوشت کہ ردیں ھال استیں دور ءِ مستریں ءُ سنگینیں چیلنج انت، اے چیلنج ءَ گوں گر ءُ چیل بوھگ ءِ واستہ حکومت، میڈیا، وانگ ءُ زانگ ءِ ادارگ ءُ سول سوسائٹی وتی کرد ءَ پیلو بہ کن انت۔ آئی ءَ اے گپ دو شمبے ءِ روچ ءَ آئی بی اے کراچی ءِ نیمگ ءَ برجم داشتگیں ’’حقیقت اے آئی ءَ چہ زندگ بوت کن اَنت؟یکجاہ ءَ ردیں ھالانی ھلاپ ءَ جنگ‘‘ ءِ گپ ءُ تران ءَ گوں تران کنان ءَ کت۔ وفاقی وزیر ءِ اھوالکاری ءَ اے ھاسیں مراگش ءِ برجائی ءِ سر ءَ آئی بی اے، سینٹر فار ایکسیلنس ان جرنلزم ءُُ یو این ڈی پی ءِ منت گپت ءُُ گوشت کہ ردیں اھوالکاری استیں دور ءِ مزنیں چیلنج جوڑ بوتگ۔ آئی ءَ گوشت کہ مصنوعی ذہانت ءِ دیمروئی ءَ پد ردیں ھال آنی گوما گر ءُُ چیل بوھگ گیش مشکل بوتگ۔ آئی ءَ گوشت کہ وزیر ءِ ھال ءُُ اھوال ءِ بستار ءَ آئی ءَ اے چیلنج ءِ گیواری ءِ واستہ بازیں گامگیج چست کتگ، ایشی ءِ تہ ءَ پاکستان ءِ اولی ڈیجیٹل کمیونیکیشن ڈیپارٹمنٹ ءِ جوڑ کنگ ھم ھوار اِنت کہ نوں وزارت ءِ ھال ءُُ اھوال ءِ گوں ھمگرنچیں ادارگ اِنت۔ آئی ءَ گوشت کہ وزارت ءِ سوشل میڈیا پلیٹ فارم آنی وسیلگ ءَ زانتکاری آنی تصدیق کنگ بیت وھدیکہ جعلی ھال آنی سر ءَ باقاعدہ جعلی زانتکاری ءِ لیبل جنگ بیت۔ وفاقی وزیر ءِ اھوالکاری ءَ گوشت کہ آئی ویریفائی ءَ راجی ءُُ میاں اوستمانی تک ءَ وتی جاگہ ​​جوڑ کتگ کہ اے سک باز دلبڈی ءِ گامگیج اِنت۔ آئی بی اے ءَ آئی ویریفائی پاکستان ءِ جوڑ کنگ ءَ مزنیں کارے کتگ کہ آئی ءَ مشکلیں وھد ءَ ردیں ھالاں گوں گر ءُ چیل بوھگ ءَ جوانیں کرد پیلو کتگ۔ آئی ءَ گیش گوشت کہ آئی ویریفائی ءَ را ایوک ءَ راجی تک ءَ حوالہ دیگ نہ بیت بلکیں میاں اوستمانی جرنل ءُُ گلوبل میڈیا پلیٹ فارم ھم ایشی ءَ را یک معتبریں وسیلگ ءِ رنگ ءَ باز کارمرد کنگ ءَ اَنت۔ آئی ءَ گوشت کہ ردیں ھال آنی ھلاپ ءَ ایوک ءَ حکومت جوانیں گامگیج چست کُت نہ کنت۔ اے درگت ءَ میڈیا انڈسٹری ءِ سر ءَ مزنیں ذمہ واری انت ءُ میڈیا ہاؤس آناں دیم ءَ آیگی انت ءُ وتی فعالیں کرد ءَ پیلو کنگی انت ۔ وفاقی وزیر برائے اھوالکاری ءَ گوشت کہ جتا جتائیں سوشل میڈیا پلیٹ فارمز ءَ اے آئی ءِ وسیلگ ءَ جوڑ بوتگیں مواد ءَ را اے آئی ءِ رنگ ءَ ھاسیں رنگ ءَ لیبل کنگ بندات کتگ۔ وفاقی وزیر ءَ اے آئی ءِ وسیلگ ءَ جوڑ بوتگیں درستیں مواد ءِ واستہ جوانیں لیبلنگ ءِ ضلورت ءِ سر ءَ زور پر دات۔ آئی ءَ گوشت کہ آئی ویریفائی ءِ وڑیں نظام نہ ایوک ءَ پاکستان ءَ ذمہ واریں اھوالکاری ءِ دیمروئی ءِ واستہ بلکینگ ءَ جعلی ھال آنی ترند ءُ جوانیں رنگ ءَ پجارینگ ءِ واستہ ھم المی اِنت۔ آئی ءَ گوشت کہ اے جہد ءِ تہ سرجمیں چاگرد، سرکار، میڈیا ہاؤس، وانگ ءُُ زانگ ءِ ادارگ ءُُ سول سوسائٹی درستانی کرد است انت۔ بھارت ءِ گوما کش ءُُ چیل ءِ حوالہ ءَ وفاقی وزیر ءِ اھوالکاری ءَ گوشت کہ پاکستان ءَ اے جنگ سک باز جوانیں رنگ ءَ سوبمند بوتگ، ایشی ءِ تہ ءَ یک بیانیہ چیلنج ءِ بوتگ کہ مارا سک باز جوانیں رنگ ءَ دیم پہ دیم بوتگ۔ وفاقی وزیر ءِ اھوالکاری ءَ گوشت کہ دیمروئی ءِ راہ گیشیں ھمگرنچی، مزنیں کمک ءُُ سرکاری ءُ نجی شریکداری ءِ تہ ءَ اِنت ایشی ءِ واستہ وزارت ءِ اھوالکاری سرجمی ءَ تیار اِنت۔ آئی ءَ گوشت کہ مزن وزیر محمد شہباز شریف ءَ ردیں ھال آنی گوما گر ءُ چیل بوھگ ءِ سرجمیں مینڈیٹ داتگ۔ وفاقی وزیر ءَ پاکستان براڈکاسٹرز ایسوسی ایشن ءُُ آل پاکستان نیوز پیپرز سوسائٹی ءَ را ھم دزبندی کت کہ آ دیم ءَ بیا انت ءُُ اے رد ءَ وتی سرگرمیں کرد ءَ پیلو بہ کن انت، آھاں سرجمیں کمک ءِ درشان کنگ بیت۔ وفاقی وزیر ءَ گوشت کہ اے وھد ءَ ما یو این ڈی پی ءِ گوما پیسر ءَ چہ یک پروگرام ءِ سر ءَ کار کنگ ءَ ایں ۔ آئی ءَ گیش گوشت کہ یک تربیتی ورکشاپ ءِ ھم برجم دارگ بوتگ کہ ایشی ءِ مول ءُُ مراد نہ ایوک ءَ وزارت ءِ اھوالکاری ءِ کارندہ آناں بلکیں میڈیا ءِ پیشہ ور آناں ھم ردیں ھال آنی ھلاپ ءَ جنگ ءِ واستہ المی ئیں ھُنر پجارینگ بوتگ تانکہ آ اے چیلنج ءَ را جوانیں رنگ ءَ گوں دیم پہ دیم بوت کن اَنت۔ اے چاگرد ءِ ھمک مردم ءِ ذمہ واری انت کہ آ دیم ءَ بیا ایت ءُ اے جیڈھ ءَ گوں گر ءُ چیل بوھگ ءَ وتی کرد ءَ پیلو بہ کنت۔ وفاقی وزیر ءَ گوشت کہ اگاں ما جھان ءِ منظر نامہ ءَ را بچاریں گڑا ورلڈ اکنامک فورم ءِ گلوبل رسک رپورٹ ءِ رد ءَ جھان ءِ دیم ءَ مزنیں ھترہ ردیں ھال اِنت پرچا کہ ایشی ءَ چہ آشوب ءُ آشوب پیداک بوت کنت۔ آئی ءَ گوشت کہ آئی ویریفائی ءَ وتی نشان ءِ جوڑ کنگ ءِ راہ ستا کرز اِیت ءُُ ما اے شرپداریں مول ءُُ مراد ءِ واستہ ھمک وھد ءَ شمئے ھمراہ ایں ۔ وفاقی اھوالکاری ءِ وزیر ءَ گوشت کہ آئی ءَ را ھاسیں رنگ ءَ مئے ورنائیں نسل ءَ چہ سک باز اُمیت اِنت کہ ما ردیں اھوالکاری ءَ را ھلاس کنگ ءَ ایں ۔ آئی ءَ گوشت کہ مصنوعی ذہانت ءِ باوجود حقائق زندگ بوت کن اَنت۔ وفاقی وزیر ءَ زور پر دات کہ درستیں سوشل میڈیا پلیٹ فارم آناں اے گپ ءَ را دل یکیمی کنگ لوٹ ایت کہ اے آئی ءَ را ہر شوبگ ءَ ذمہ واری ءُ جوانیں رنگ ءَ کارمرد کنگ بہ بیت، آ ایگری ٹیک، فن ٹیک، ہیلتھ ٹیک، ایڈ ٹیک یا دگہ ٹیکنالوجی ءِ تہ ءَ بہ بیت۔ آئی ءَ اے گپ ءِ پدا زور دات کہ سوشل میڈیا پلیٹ فارمز ءَ اے آئی ءَ چہ پیداکیں درستیں مواد ءَ را ”اے آئی“ ءِ نام ءَ گوں ھاسیں رنگ ءَ لیبل کنگ بہ بیت۔ آئی ءَ گوشت کہ مئے چاگرد ءَ آرٹیفیشل انٹیلی جنس ءِ بازیں منفی کارمردی ھم گندگ بوھگ ءَ انت۔ مارا وتی زھگ ءُ ورنائیں نسل ءَ را وانینگ ءُ حساس کنگی اِنت ءُ چاگرد ءِ درستیں تک ءُ پھناتاں اے آئی ءَ را ذمہ واری ءِ گوما کارمرز کنگ ءِ رھبند ءِ وانینگ لوٹ اِیت۔ آئی ءَ گوشت کہ اگاں ما یو این ڈی پی، آئی بی اے، سینٹر فار ایکسیلنس ان جرنلزم، اے دگہ ادارگ ءُُ ھاسیں رنگ ءَ میڈیا ھاوس آنی گوما ھمکوپگی بہ کن ایں گڈا ان شاء اللہ ما اے چیلنج ءَ چہ دیم ءَ شت کن ایں ءُُ راستیں راستی ءَ را الس ءِ دیم ءَ سر کن آں ۔ وفاقی وزیر ءَ اے گپ ءِ سر ءَ زور پر دات کہ ما یک موثریں نفاذ ءِ نظام ءِ جوڑ کنگ ءُُ راستی آناں دگنیا ءِ دیم ءَ پیش کنگ ءِ واستہ یکجا بوھگ ءِ ضلورت ءِ سر ءَ زور پر دات تانکہ مصنوعی ذہانت ءَ را ھچ وڑیں پوشیدہ ایجنڈا یا نظریات ءِ دیمروئی ءِ واستہ ناجائز کارمرد کنگ مہ بیت کہ مئے راجی پالیشی ءُ چاگردی قدر ءُُ قیمت آنی ھلاپ انت۔ نہ گُڈسر ءَ آئی ءَ درستیں ھواریں مردمانی منت گپت ءُ گْوشت کہ من سک زوت اے مزنیں ادارہ ءِ تر ءُ تاب ءَ کناں۔