بنجائی وزیر کانود تون یونیورسٹی آف لندن نا ڈل انا اوڑدہی، کانودی تعلیم اٹی کمکاری ءِ ودفنگ آ امنا

اسلام آباد۔ 12 جنوری (اے پی پی) بنجائی وزیر کانود و انصاف سینیٹر اعظم نذیر تارڑ تون یونیورسٹی آف لندن نا پرووائس چانسلر (تعلیم) پروفیسر فلپ آل مینڈ نگر نا کماشی ٹی اسہ ڈل اس اوڑدہی کرے ہراٹی کانودی تعلیم نا بشخ اٹی تین پہ تینی کمکاری ءِ مون آ دننگ آ سرجمی اٹ گپ وتران کننگا۔ وزارت کانود و انصاف نا ترجمان نا رداٹ اوڑدہی ٹی یونیورسٹی آف لندن نا علاقائی سلاہکار سعد وسیم و ڈائریکٹوریٹ آف لیگل ایجوکیشن نا ڈائریکٹر بیرسٹر اسامہ ملک ہم ساڑی ئسر۔ گپ وتران نا محور جہانی تعلیمی ادارہ و ہندی یونیورسٹی تا نیام اٹ اسیجائی و شریداری آ تالان تعلیمی پروگرام تا کمک اٹ کمکاری ءِ سوگو کننگ ئس۔ بنجائی وزیر کانود سینیٹر اعظم نذیر تارڑ داوخت آ پارے کہ داوڑنا تعلیمی شریداری آن نئے بیرہ کانودی تعلیم نا آب اٹ گچینی بریک بلکن پائیدار کٹیا نا وارخواہی ودی مریک و طالب علم آتے جہانی کہول آ امنا مروک ڈگری تسکان گچین رسینگ دوئی مریک۔ اوکیمپس اٹی تعلیمی سرجزآتون فاصلاتی تعلیم نا امتزاج ءِ المی گوندا تانکہ طالب علم آک ہندی کانودی فریم ورک انا تہہ ٹی گچین وڑاٹ پریکٹس نا قابل مننگ کیر۔ بیرسٹر اسامہ ملک وزیرکانود ءِ معلومدار کرے کہ ڈائریکٹوریٹ آف لیگل ایجوکیشن نا سلابت اٹ پاکستانی لاء ماڈیول ءِ یونیورسٹی آف لندن نا ایل ایل بی (آنرز) نا نصاب اٹی اوار کننگ آ سجفنگ انگ ءِ، ہرانا پاکستان اٹی یونیورسٹی آف لندن نا کانود گریجویٹس آتا کسبی لائخی تیا دوررس مثبت اثرتمک۔ اوڑدہی ٹی فیکلٹی ڈویلپمنٹ وصلاحیت سازی، فیکلٹی ایکسچینج و ہیلکاری پروگرام آتون اوار ایلوامور تیا ہم گپ وتران مس۔ پروفیسر فلپ آل مینڈنگر تعمیری گپ وتران آ منت واری ءِ ہرفے، وخت اس کہ بنجائی وزیر کانود بامعنی و مریس مدی تعلیمی شریداری نا مون آ دننگ کن پاکستان نا پبی مخ تفی و کمکاری نا باوری کرفے۔