ترک ڈل ءَ مزن وزیر ءِ صنعت ءُ پیداوار ءِ ھاسیں کمکار ہارون اختر خان ءَ گوں گند ءُ نند کت، سرمایہ کاری، یکجائی منصوبہ ءُ کاروباری آسراتی ءِ بابت ءَ گپ ءُ تران

اسلام آباد۔12دسمبر  (اے پی پی): ترکی ءِ کاروباری ڈل ءَ مزن وزیر ءِ صنعت ءُ پیداوار ءِ ھاسیں کمکار ہارون اختر خان ءَ گوں گند ءُ نند کت، ایشی ءِ تہ ءَ پاکستان ءُ ترکی ءِ نیام ءَ سرمایہ کاری، یکجائی منصوبگ ءُ کاروباری آسراتی ءِ ھوالگ ءَ سرجمیں گپ ءُ تران کنگ بوت۔ دیوان ءَ سرکاری ءُ نجی شعبہ ءِ نمائندگاں بہر زرتگ ات ایشی ءِ تہا پی آئی ڈی سی، ایس ایم ای ڈی اے ءُ انجینئرنگ ڈویلپمنٹ بورڈ ءِ چیف ایگزیکٹوز ھوار اتنت۔ ہارون اختر خان ءَ گوشت کہ مزن وزیر شہباز شریف ءِ وژن براتیں ملک آنی گوما اقتصادی سیادی ءَ را گیش مھکم کنگ انت۔ آئی ءَ گوشت کہ اے وھد ءَ دوئیں ملک آنی نیام ءَ تجارت ءِ کساس یک ارب ڈالر ءِ نزیک ءَ انت ایشی ءِ تہ ءَ پنچ ارب ڈالر ءَ تاں گیش بوھگ ءِ گنجائش است انت۔ ترک ڈل ءَ گوشت کہ ایل سی ڈبلیو ءَ ھوار ترکی ءِ بازیں ٹیکسٹائل برانڈ پاکستان ءَ سرمایہ کاری کنگ لوٹ اَنت۔ ڈل ءَ اسلام آباد، کراچی ءُ لاہور ءَ ترکی ءِ بینک آنی پچ کنگ ءِ درخواست ھم دیم داتگ۔ اے درگت ءَ ہارون اختر خان ءَ دل یکیمی دات کہ ترکی ءِ سرمایہ کار آنی واستہ لیٹر آف کریڈٹ ءُ بینکنگ ءِ آسراتی گہتر کنگ بنت۔ آئی ءَ گوشت کہ پاکستان کاروباری چاگرد ءَ را گہتر کنگ ءِ واستہ ریگولیٹری اصلاحات آرگ ءَ انت، وھدیکہ مزن وزیر ءِ ہدایت ءِ رد ءَ راجی صنعتی پالیشی جوڑ کنگ بوتگ، ایشی ءِ تہ ءَ سرمایہ کار آنی واستہ ھاسیں آسراتی ھوار انت۔ ترک ڈل ءَ استنبول ءُ تہران ءُ اسلام آباد ءِ تجارتی راہداری ءِ زوتیں وھد ءَ بندات کنگ ءِ تہ ءَ سک باز دلگوشی ءِ درشانی کتگ۔ ہارون اختر خان ءَ گوشت کہ پاکستان ءِ لینڈ لیز پالیشی ءَ چہ دری سرمایہ کار آناں صنعتی کنگ ءِ موہ رس ایت ءُ ترکی ءِ سرمایہ کار آناں آسراتی ءِ واستہ ھاسیں کمیٹی ھم جوڑ کنگ بوتگ۔ گند ءُ نند ءَ دوئیں ملک آنی نیام ءَ بازیں شوبگ ءُ یکجائی منصوبگ آنی تہ ءَ کمک ءِ سر ءَ تپاک کنگ بوتگ۔