نوکیں ٹیکنالوجی  درسانی واستہ  ساپ ءُ سلہ ئی  ءَ  رسائی المی انت، چاگردی ءُ اقتصادی دیمروئی ءُ الس ءِ وشحالی حکومت ءِ اولی ترجی انت، مزن وزیر شہباز شریف

اشک آباد۔12دسمبر  (اے پی پی): مزن وزیر محمد شہباز شریف ءَ گوشت کہ نوکیں ٹیکنالوجی ءِ تہ ءَ درست آنی واستہ منصفانہ ءُ بے رھبندیں رسائی المی اِنت، چاگردی ءُ اقتصادی دیمروئی ءُ الس ءِ گہبودی پاکستان ءِ حکومت ءِ اولی ترجی اِنت۔ دیمروئی کنوکیں ملک آب و ہوا ءِ بدلی ءِ سبب ءَ بوتگیں تاوان ءِ سبب ءَ مشکلات ءِ آماچ انت۔ پاکستان ءِ دری پالیشی ءِ مستریں رِد ءُ بند انت کہ جیڑھ ءُ جنجال آناں ایمنی ءِ گوما گیش ءُ گیوار کنگ پاکستان ءِ دری پالیشی ءِ مستریں ستون انت ۔ پاکستان جھان ءِ امن ءُ ایمنی ءِ دیم ءَ برگ ءِ تہ مزنیں کردے پیلو کنگ ءَ اِنت۔ ما ناشرکاری ءِ ھلاسی ءِ واستہ جزم آں۔ میان استمانی براتی ءَ اوگان طالبان ءِ سرکار ءَ را زور دیگی اِنت کہ آ وتی سرڈگار ءَ چہ ناشرکاری ءِ کاراں بند بہ کنت۔ پاکستان فلسطینی اُلس ءُ دلیریں کشمیری آنی بنیاتی ھک آنی واستہ کنگ بوتگیں کوشست آنی کمک ءَ برجاہ دار ایت۔ آئی ءَ اے ھیالانی درشانی جمعہ ءِ روچ ءَ امن ءُ ایمنی ءِ میاں اوستمانی سال، میاں اوستمانی غیر جانبداری ءِ روچ ءُ ترکمانستان ءِ دائمی غیر جانبداری ءِ سیمی سالروچ ءِ درگت ءَ برجم داشتگیں فورم ءَ گوں تران کنان ءَ کت۔ مزن وزیر ءَ گوشت کہ اشگ آباد ءِ وڑیں وشیں شہر ءَ بوھگ یک وشی یے، اسپیتیں سنگ مرمر ءِ زیبائی ءُ ترکمن الس ءِ پرمڈائی   ستا کرز انت۔ آئی ءَ گوشت کہ اگاں چہ اے منی اولی ترکمانستان ءِ تر ءُ تاب اِنت بلے من ءَ ادا ھچ وڑیں اجنبی یے نہ گندگ ءَ کیت۔ ترکمانستان ءِ مہمانداری مثالی انت۔ ترکمانستان ءِ دود اِنت کہ مہمان ءَ چہ وتی ھاندان ءَ گیشتر احترام بہ کنت۔ ترکمانستان ءِ راجی سروک قربان گلی بردی محمدوف  ءُ ترکمانستان ءِ صدر سردار بردی محمدوف  منی واستہ برات ءِ وڑ ءَ اَنت ءُ پاکستان ءُ ترکمانستان ءِ دوستی ءَ را گیش مھکم کنگ ءَ ایشاں مزنیں کردے پیلو کتگ۔ مزن وزیر ءَ گوشت کہ من ترکمانستان ءِ سروکی ءَ را دائمی غیر جانبداری ءِ 30سال ءِ سرجمی ءِ سر ءَ ءُ اقوام متحدہ ءِ نیمگ ءَ 2025ءَ امن ءُ ایمنی ءِ سال ءِ جار جنگ ءِ سوبمندیں کوشست ءِ سر ءَ مبارکی دیان آں ۔ مزن وزیر ءَ گوشت کہ پاکستان ءَ اے سال ءَ سلامتی کونسل ءِ غیر دائمی باسک ءِ بستار ءَ وتی ذمہ واری پیلو کتگ ءُ جھان ءِ امن ءُ ایمنی ءِ دیمروئی ءِ واستہ سرجمیں رنگ ءَ کرد پیلو کنگ ءَ انت، ءُ ناشرکاری ءِ ھلاسی ءِ واستہ جزمیگ انت۔ آئی ءَ گوشت کہ اوگان سرزمین ءَ چہ ناشرکاری ءِ ھترہ درکپگ ءَ اِنت، اے ھترہ ءَ گوں گر ءُ چیل بوھگ ءِ کوشست کنگ بوھگ ءَ اِنت، ایشی ءِ ھمراھی ءَ میاں اوستمانی براتی اوگان طالبان ءِ سرکار ءَ را ھم زور بہ دنت کہ آ وتی میاں اوستمانی ذمہ واری ءُ وعدہ آناں پیلو بہ کنت ءُ ناشرکار آناں وتی سرزمین ءَ چہ ناشرکاری کار آنی کنگ ءَ چہ بہ رکین ایت۔ مزن وزیر ءَ گوشت کہ پاکستان دائمی جنگ بندی ءِ واستہ قطر، ترکی، سعودی عرب، متحدہ عرب امارات ءُ ایران ءِ دل ءِ جہلانکی ءَ گوں کوشست آناں وش اتک کنت۔ تنازعات ءِ امن ءُ ایمنی ءِ گیواری پاکستان ءِ دری پالیشی ءِ بنیاتی ستون انت۔ غزہ ءِ امن منصوبہ پاکستان ءِ کمک ءَ منظور کنگ بوت کہ رند ءَ اقوام متحدہ ءِ سلامتی کونسل ءَ ایشی ءِ منظوری دات۔ اے سال ءِ بندات ءَ اقوام متحدہ ءِ قرارداد 2788 ءِ منظوری ءَ چہ جیڈھ آنی پرامن گیواری ءِ واستہ پاکستان ءِ عزم ءِ سرجمی ءَ پدر اِنت۔ عرب ءُ اسلامی ملک آنی گروپ ءِ باسک ءِ بستار ءَ ما امیت کن ایں کہ میاں اوستمانی تک ءَ برجاھیں امن ءِ کوشست بے گناھیں فلسطینی آنی جان آنی ایمنی ءَ را دل یکیمی کنگ ءَ کمک کن اَنت ءُ دائمی ءُ برجمیں جنگ بندی، انسانی کمک ءِ برجاھیں پجارینگ ءُ غزہ ءِ نوک جوڑیشت ءَ کمک ءَ را دل یکیمی کنگ ءَ کمک کن اَنت۔ آئی ءَ گوشت کہ میاں اوستمانی تک ءَ دائمی جنگ بندی ءُ انسانی کمک پجاری المی انت ۔ پاکستان فلسطینی الس ءُ دلیریں کشمیری آنی وت واجئی ءِ بنیاتی ھک ءِ واستہ ھمک کوشست آنی کمک ءَ برجاہ دار ایت۔ پائیدار امن ءِ واھشت گوں پائیداریں دیمروئی ءَ بندوک اِنت۔ اے درگت ءَ 2030ءِ ایجنڈا پائیدار دیمروئی ءِ واستہ جوانیں ءُ امنیں دنیا ءِ واستہ سک باز المی انت۔ چاگردی ءُ اقتصادی دیمروئی ءُ الس ءِ گہبودی پاکستان ءِ حکومت ءِ اولی ترجی انت۔ آئی ءَ گوشت کہ مالیاتی شمولیت ءِ شوبگ ءَ پیشرفت ءِ ھمراھی ءَ ما زالبول ءُ نزوریں گل آناں اقتصادی مین اسٹریم ءِ تہ ءَ آرگ ءِ واستہ جوانیں گامگیج چست کتگ۔ گلوبل وارمنگ ءِ ھوالگ ءَ آئی ءَ گوشت کہ پاکستان ءَ ساپ ءُ سبزیں چاگرد ءِ واستہ گیشواری پیش کتگ ءُ اے ھوالگ ءَ مئے گامگیج جھان ءِ مثال انت۔ موسمی مٹ ءُ مٹ ءِ سبب ءَ بوتگیں تاوان ءِ سبب ءَ دیمروئی کنوکیں ملک مشکلانی آماچ انت ۔ ما سیلاب ءِ سبب ءَ مزنیں کچے ءَ جانی ءُ مال ءِ تاوان ءِ آماچ بوتگیں ۔ آب و ہوا ءِ بدلی، غربت ءُ نابرابری دنیا ءِ ھاترا مزنیں چیلنج انت۔ آ یک جھان ءِ ھترہ اَنت کہ ایشی ءِ ھاترا مشترکہ ذمہ واری ءِ چیر دستی ءَ عملی گامگیج زورگ لوٹ اَنت۔ نوکیں ٹیکنالوجی ءِ ھاسیں رنگ ءَ ڈیجیٹل ٹیکنالوجی ءِ ساپ ءُ سلہ ئی ءَ گوں   رسائی المی  اِنت۔