ہندوستان ءِ گوما جنگ ءَ سوبمند بوھگ ءَ پد پاکستانی سلاہانی جھان ءِ لوٹ گیش بیتگ

اسلام آباد۔ 11جنوری(اے پی پی): گوستگیں سال ءِ مئی ءَ بھارت ءِ گوما چار روچی جنگ ءِ وھد ءَ پاکستان ءَ نہ ایوک ءَ وتی فوجی سامان آنی کارکردگی ءِ ثابت کتگ بلکیں جے ایف 17 تھنڈر جنگی بالی گراب، الخالد مین بیٹل ٹینک ءُُ فتحچ سیریز راکٹ گائیڈڈ ملٹی لاون ءِ توانائی آنی سرجمیں رنگ ءَ پیش داشتگ۔ کشمیر میڈیا سروس ءِ رد ءَ جے ایف 17 تھنڈر ءَ بھارت ءِ گوما ٹکر ءُُ ٹکر ءِ وھد ءَ وتی جنگی توانائی ثابت کتگ۔ اے بالی گراب ءَ را جنگ ءِ وھد ءَ آدمپور ءَ بھارتی ایئر فورس ءِ جدید ایس 400 سرفیس ٹو ایئر میزائل سسٹم ءِ ھلاس کنگ ءِ کریڈٹ دیگ بوتگ۔ جے ایف 17 ءَ دبئی ایئر شو ءَ ھم جوانیں کارکردگی پیش داشتگ۔ اے ھپتگ ءَ دفاع ءِ وزیر خواجہ محمد آصف ءَ گوشت کہ پاکستان ءِ سلاھانی صنعت ءِ سوبمندی ءَ چہ ملک ءِ معیشت ءِ رھبند بدل بوت کنت۔ یک پرائیویٹ ٹیلی ویژن اسٹیشنے ءَ گوں تران کنان ءَ آئی ءَ گوشت کہ مئے بالی گراب جنگ ءِ تہ ءَ آزمائش کنگ بوتگ انت ایشانی سر ءَ انچو آرڈر رسگ ءَ انت کہ پاکستان ءَ را شش ماہ ءَ پد آئی ایم ایف ءِ ضلورت نہ بیت۔ عراقی فضائیہ ءِ کمانڈر لیفٹیننٹ جنرل مہند غالب محمد رادھی الاسدی ءَ ہم عراق ءِ تر ءُُ تاب ءِ وھد ءَ پاک فضائیہ ءِ سروک ایئر چیف مارشل ظہیر احمد بابر سدھو ءَ گوں گند ءُُ نند ءِ ساھت ءَ گپ ءُُ تران کتگ ءُُ مئی ءَ بھارت ءِ ھلاپ ءَ پاکستانی فضائیہ ءِ پیشہ وارانہ صلاحیت آنی توسیپ کتگ ءُُ JFar12 ءِ تہ ءَ دلگوشی ءِ درشانی کتگ۔ آئی ایس پی آر ءِ رد ءَ عراقی فضائیہ ءِ سروک ءَ پاک فضائیہ ءِ جھان ءِ تک ءِ تربیت ءَ چہ پائدگ چست کنگ ءُُ جے ایف 17 تھنڈر ءُُ سپر مشتاق ءِ تربیت ءِ بالی گراب آنی تہ ءَ ھاسیں دلگوشی ءِ درشانی کتگ۔ سعودی عرب ءِ گوما وام ءِ بدل ءَ جے ایف 17 ءِ ڈیل ءِ سر ءَ ھم ھیال ءُ لیکہ کنگ بوھگ ءَ اِنت۔ برطانوی حالجاہ رائٹرز ءِ رد ءَ پاکستان ءُ سعودی عرب ءِ نیام ءَ سعودی ءِ نزیک ءَ 2ارب ڈالر ءِ وام ءَ را جے ایف 17 جنگی بالی گراب آنی ڈیل ءِ تہ ءَ بدل کنگ ءِ گپ ءُ تران بوھگ ءَ اِنت۔ پاکستانی وسیلگ ءِ رد ءَ اے ڈیل ءِ کلیں ارزشت 4 ارب ڈالر بوت کنت کہ ایشی ءِ تہ ءَ گیشیں دفاعی سامان ھم ھوار بنت۔ بنگلہ دیش ءَ ھم جے ایف 17 ءِ گرگ ءِ واھشت ءِ درشانی کتگ۔ پاکستان ءُ بنگلہ دیش ءِ فضائیہ سروک آنی نیام ءَ جے ایف 17 تھنڈر بالی گراب ءِ ممکنہ گرگ ءِ بابت ءَ سرجمیں گپ ءُ تران بوتگ۔ آئی ایس پی آر ءِ رد ءَ ایئر چیف مارشل زہیر احمد بابر سدھو ءَ وتی بنگلہ دیشی ھمکار ءَ را پاک فضائیہ ءِ گوستگیں پیشرفت ءِ بابت ءَ سرپد کت ءُُ تربیت ءُ تکنیکی کمک ءِ دل یکیمی دات۔ پاکستان ءَ لیبیا ءَ را روایتی فوجی سامان ءِ بہا کنگ ءِ ھاترا ارباں ڈالر ءِ ڈیل ءِ سر ءَ دستخط کتگ۔ رائٹرز ءِ رد ءَ اے ڈیل ءِ تہ ءَ جے ایف 17 جنگی جہاز ءُ سپر مشتاق ءِ تربیت ءِ بالی گراب آنی بہا کنگ ھم ھوار اِنت۔ پاکستانی یک اگدہ دارے ءِ رد ءَ اے ڈیل ءِ تہ ءَ زمینی، دریائی ءُ ھوائی سامان ھوار انت ءُ اے ڈیل دو سال ءُ نیم ءَ سرجم کنگ بیت۔ دفاعی افواج ءِ سروک جنرل عاصم منیر ءَ گوستگیں سال ءِ 18دسمبر ءَ لیبیا ءَ لیبیا ءِ عرب سلاہ بندیں اُرد ءِ کمانڈر ان چیف خلیفہ بلقاسم حفتر ءَ گوں گند ءُ نند کتگ۔ اے معاہدہ اے گپ ءِ پدر کنگ ءَ انت کہ پاکستان ءِ دفاعی صنعت ءَ را تیزی ءَ گوں جہانی پڑ ءَ وتی نشان جوڑ کنگ ءَ انت ءُ جے ایف 17 تھنڈر اے سوبمندی ءِ یک مرکزی ستونے جوڑ بوھگ ءَ انت۔