نائب مزن وزیر اسحاق دار ءَ جدہ ءَ پاکستان ءِ قونصل جنرل ءِ نوکیں چانسلری بلڈنگ ءِ بنگیج

جدہ۔10جنوری  (اے پی پی):نائب مزن وزیر ءُ دری کارانی وزیر سینیٹر محمد اسحاق ڈار ءَ شمبے ءِ روچ ءَ جدہ ءَ پاکستان ءِ قونصل جنرل ءِ نوکیں چانسلری ماڑی ءِ بنگیج کت۔ اے موہ ءِ سر ءَ یک سادہ بلے شرپداریں مراگشے برجم دارگ بوت کہ ایشی ءِ تہ ءَ سعودی عرب ءَ پاکستان ءِ سفیر احمد فاروق، سعودی مزنیں مردم، جدہ ءَ پاکستان ءِ قونصل جنرل سید مصطفیٰ ربانی، نامداریں پاکستانی مردم ءُ جدہ ءَ پاکستان ءِ قونصل خانہ ءِ کارندہ آں بہر زرتگ ات۔ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ بنگیج ءِ مراگش ءِ ساھت ءَ نوکیں چانسلری ءِ ماڑی ءِ احاطہ ءَ پاکستانی بیرک ایر کنگ بوتگ، پد ءَ چانسلری ءِ لان ءَ یک پودے ءِ کشت ءُ کشار کنگ بوتگ، ربن ءِ کٹگ بوتگ، تختی ءِ پچ کنگ بوتگ ءُ عرب ءُ پاکستان ءِ واستہ پاکستان ءِ دیمروئی ءُ وشھالی ءِ دعا کنگ بوتگ۔ اے موہ ءِ سر ءَ یک کسانیں ویڈیو رپورٹے ھم پیش کنگ بوتگ کہ ایشی ءِ تہ ءَ منصوبگ ءِ ھاسیں لیکہ آنی سر ءَ چمشانک دیگ بوتگ۔ نائب مزن وزیر اسحاق ڈار ءَ وتی گشتانک ءِ تہ ءَ جدہ ءَ پاکستانی قونصل خانہ ءِ کوشست ءُ سعودی واکدار آنی کمک ءَ را ساڑات، ایشی ءِ برکت ءَ اے منصوبگ سرجم بوت۔ آئی ءَ اے جزم ءِ درشان کت کہ پاکستان ءِ حکومت درملک ءَ نندوکیں پاکستانی آناں جوانیں کنسولر ازمت پجاری ءِ واستہ جزمیگ انت۔ نائب مزن وزیر ءَ ماڑی ءُ آسراتی چار ءُ تپاسی ءَ پد منصوبگ ءِ سرجمی ءِ سر ءَ دل یکیمی ءِ درشان کت ءُ ہدایت کت کہ قونصل خانہ ءِ انتظامی کار ءُ قونصلر ازمت زوتاں چہ زوت نوکیں چانسلری ماڑی ءَ شنگ کنگ بہ بنت۔ سعودی عرب ءِ مغربی خطہ ءَ تقریباً 1.8 ملین پاکستانی نندوک انت ءُ نوکیں چانسلری ءِ ماڑی ءُ ایشی ءِ آسراتی کمیونٹی ءَ را ازمت ءِ پجارینگ ءِ تہا مزنیں کردے پیلو کن انت۔