پی اے ایف ءِ سروک ءَ عراقی فضائیہ ءِ کمانڈر ءَ گوں گند ءُ نند کت، دو نیمگی فوجی کمک ءُ پیشہ وارانہ دلچسپی ءِ جیڈھانی سرا تران

اسلام آباد۔10جنوری  (اے پی پی):پاکستان ءِ فضائیہ ءِ سروک فضائیہ ءِ سروک مارشل ظہیر احمد بابر سدھو ءَ عراق ءِ سرکاری تر ءُ تاب ءِ ساھت ءَ کمانڈر عراقی فضائیہ لیفٹیننٹ جنرل اسٹاف پائلٹ مھند غالب محمد رادھی الاسدی ءَ گوں گند ءُ نند کتگ۔ گند ءُ نند ءِ ساھت ءَ دو نیمگی فوجی کمک ءُ پیشہ وارانہ دلچسپی ءِ جیڈھ آنی سر ءَ گپ ءُ تران کنگ بوت، ایشی ءِ تہ ءَ یکجائی تربیت، صلاحیت سازی، ہوابازی ءِ صنعت ءِ تہ ءَ کمک ءُ دوئیں فضائیہ آنی نیام ءَ عملی ھمگرنچی ءِ دیمروئی ءِ سر ءَ ھاسیں دلگوشی دیگ بوت۔ شمبے ءِ روچ ءَ پاک فضائیہ ءِ جارکش ءِ نیمگ ءَ جاڑی بوتگیں بیان ءِ رد ءَ پی اے ایف ءِ سروک ءَ را عراقی فضائیہ ءِ ہیڈ کوارٹر ءَ راجدپتری ءُ مزنیں وش آتک کنگ بوتگ ایشی ءِ تہ ءَ عراقی فضائیہ ءِ یک جوانیں پوشاکیں دستہ ءَ پی پی اے ایف ءِ سروک ءَ را گارڈ آف آنر پیش کتگ کہ اے دو برات ءِ نیام ءَ یکوئی ءِ احترام ءِ درشان اِنت۔ پی اے ایف ءِ سروک ءَ پاکستان ءُ عراق ءِ نیام ءَ گہتریں مذہبی، دود ءُ ربیدگی ءُ راجدپتری سیادی ءِ سر ءَ زور پر دات ءُ دوئیں براتیں ملک ءُ آھانی سلاھ بندیں اُرد آنی نیام ءَ دیریں سیادی ءِ بُن ھشت گوشت۔ پی اے ایف ءِ سروک ءَ پی اے ایف ءِ بے دروریں جزم ءِ سر ءَ زور پر دات کہ آ عراقی فضائیہ ءِ تربیت ءُ یکجائی صلاحیت آناں گیش کنگ ءِ پڑ آنی تہ ءَ سرجمیں کمک ءَ کنت۔ دوئیں کمانڈر آنی تہ ءَ وت مہ وتی آپریشنل ھمگرنچی ءُ مھکمیں عملی کمک ءَ را گیش کنگ ءِ واستہ یکجائی مشق ءُ تربیتی پروگرام آنی برجم دارگ ءِ سر ءَ تپاک کنگ بوتگ۔ عراقی فضائیہ ءِ کمانڈر ءَ پی اے ایف ءِ پیشہ وارانہ لیکہ ءُ دمگ ءَ یک نوکیں ءُ ٹیکنالوجی ءِ رد ءَ لیس فضائیہ ءِ جوڑ بوھگ ءِ سوبمندیں ردوم ءِ ستا کرتگ۔ پاک فضائیہ ءِ جھان ءِ تک ءِ تربیت ءِ نظام ءِ منگ ءَ آئی ءَ عراقی فضائیہ ءِ واستہ نوکیں ءُ آیوکیں وھد ءِ رد ءَ تربیتی ماڈل ءِ جوڑ کنگ ءِ واستہ پاک فضائیہ ءِ کمک ءِ لوٹ کنگ ءِ واھشت ءِ درشانی کت۔ عراقی کمانڈر ءَ پاک فضائیہ ءِ پائلٹ آنی تبادلہ پوسٹنگ پروگرام ءِ تہ ءَ سک باز دلگوشی ءِ درشان کت ءُ اے گپ ءِ سر ءَ زور پر دات کہ عراقی پائلٹ پی اے ایف ءِ جنگی تجربگ ءِ واھندیں پیشہ وارانہ پائلٹ آنی نیمگ ءَ چہ براہ راست وانگ ءِ سک باز ارزشت ءَ دار اَنت، ایشی ءِ عملی تجربگ ءَ را جھان ءِ تک ءَ مثالی لیکگ بیت۔ کمانڈر عراقی فضائیہ ءَ جے ایف 17 تھنڈر جنگی جہاز آنی ممکنہ گرگ، سپر مشتاق ءِ تربیت ءِ جہاز آنی ھوار کنگ ءُ جامع رکھینگ ءُ لائف سائیکل ءِ کمک ءِ تہ ءَ ھم سک باز دلگوشی ءِ درشانی کتگ۔ جنگ ءِ بدل بوھوکیں حرکیات ءِ تہ ءَ ملٹی ڈومین آپریشن آنی گیش بوھوکیں ارزشت ءَ را سرپد کنان ءَ آئی ءَ پاک فضائیہ ءِ مزنیں آپریشنل تجربگ ءَ چہ منظم یکجائی تربیت ءُ گہتریں آپریشنل کوآرڈینیشن ءِ وسیلگ ءَ فائدہ چست کنگ ءِ ضلورت ءِ سر ءَ زور پر دات۔ عراقی فضائیہ سروک ءَ خطہ ءَ استحکام ءِ دیمروئی ءِ واستہ پاکستان ءِ جوڑیشت ءِ کرد ءَ را ھم ساڑات ءُ وت مہ وتی اسٹریٹجک مفاد ءِ شوبگ آنی تہ ءَ کمک ءَ را گیش کنگ ءِ واھشت ءِ درشان کت۔ پاک فضائیہ ءِ سروک ءِ اے تر ءُ تاب دوئیں ملک آنی نیام ءَ دفاعی سیادی ءَ را گیش مھکم کنگ، پیشہ وارانہ کمک ءَ را گیش کنگ ءُ دوئیں فضائیہ آنی نیام ءَ برجمیں سیادی آناں را گیش کنگ ءِ یکجائی جزم ءِ درشان اِنت۔