پاکستان ءِ معیشت ایمنیں دستاں اِنت، دنیا ءِ مالیاتی ادارہ پاکستانی معیشت ءَ من اَنت، عطا اللہ تارڑ

لاہور۔10جنوری  (اے پی پی):وفاقی وزیر ءِ اھوالکاری ءُ شنگکاری عطا اللہ تارڑ ءَ گوشت کہ پاکستان ءِ معیشت ایمنیں دست آنی تہ ءَ اِنت، میکرو اکنامک اشاریہ آنی تہ ءَ گہتری بوھگ ءَ اِنت، سرجمیں دگنیا ءِ مالیاتی ادارگ پاکستانی معیشت ءَ را من اَنت۔ شمبے ءِ روچ ءَ جامعہ اشرفیہ ءَ مولانا فضل الرحیم ءِ بیرانی ءِ سر ءَ دلپدردی ءِ درشان کنگ ءَ پد وزیر داخلہ محسن نقوی ءِ گوما میڈیا ءَ گوں تران کنان ءَ وفاقی وزیر ءِ اھوالکاری ءَ گوشت کہ آ مولانا فضل رحیم ءِ رند ءِ بُرزی ءِ واستہ دعا کن آں، مولانا فضل الرحیم ءِ گوما یک روحانی سیادی یے بوتگ۔ آئی ءَ گوشت کہ مئے گوں آئی ءَ نزیکیں سیادی بوتگ، مولانا فضل الرحیم ءَ مدام شفقت ءِ گپ جتگ، آئی ءَ جامعہ اشرفیہ ءَ نودربر آنی نگہبانی ءِ واستہ نوکیں نظام ءِ دیم ءَ آؤرتگ۔ آئی ءَ گوشت کہ مولانا فضل الرحیم ءِ مذھب ءِ واستہ ھزمت آناں سرجمیں دگنیا ءَ منگ بیت۔ یک جست ءِ پسو ءَ وفاقی وزیر ءِ اھوالکاری ءَ گوشت کہ میکرو اکنامک اشاریہ آنی تہ ءَ مدام گہتری بوھگ ءَ اِنت، مارا خدا ءِ شکر کنگی اِنت کہ پاکستان ڈیفالٹ ءِ کش ءَ چہ پدا واتر بوتگ ءُ مرچی دگنیا ءِ مالیاتی ادارگ پاکستان ءِ معیشت ءَ را من اَنت۔ آئی ءَ گوشت کہ پاکستان یک دیمروئی کنوکیں معیشت یے، اسٹاک مارکیٹ روچ پہ روچ ریکارڈ جوڑ کنگ ءَ انت، ایوک ءَ دسمبر ءِ ماہ ءَ درملک ءَ نندوکیں پاکستانی آں 3.6 ارب ڈالر ءِ زرّ وطن ءَ روان داتگ انت ایش گوستگیں سال ءِ مقابلہ ءَ 17درسد ءُ گوستگیں ماہ ءِ مقابلہ ءَ 11درسد گیش انت۔ آئی ئَ گوشت کہ زرّ ءِ ذخیرہ ءِ تہ ئَ گیشی ئُُ مہنگائی ءِ تہ ئَ مزنیں کساس ئَ کمیگ بوتگ۔ الحمدللہ پاکستان ءِ معیشت مھکمیں دستاں اِنت، مزن وزیر محمد شہباز شریف ایشی ءِ سروکی ءَ کنگ ءَ اِنت، وھدیکہ اے رد ءَ فیلڈ مارشل سید عاصم منیر ءِ کوشست ستا کرز اِیت۔ جوانیں ٹیم ورک ءِ سبب ءَ معیشت استحکام ءِ نیمگ ءَ رھادگ بوھگ ءَ انت ملک ءِ اندر ءَ معیشت ءِ ھوالگ ءَ جوانیں چاگرد است انت۔ پاکستان ءِ آئین ءِ رکھینگ ءِ تحریک یک پاد ءِ سرا انت، من ایشی ءَ چہ گیش ہچ گشگ نہ لوٹاں۔