وزیر داخلہ محسن نقوی ءِ سروکی ءَ دیوان، دوئیں شہر آناں آپ ءِ پھجاری ءِ واستہ دو سال ءِ تہ ءَ دوتارا ڈیم ءِ سرجم کنگ ءِ منظوری، آپ ءِ ذخیرہ کنگ، بھر ءُ بانگ ءِ نظام ءَ را مھکم کنگ ءِ واستہ بازیں تجویز آنی سر ءَ چار ءُ تپاسی کنگ بوت

اسلام آباد۔10جنوری  (اے پی پی):وزیر داخلہ محسن نقوی ءِ سروکی ءَ دیوان ءَ دوئیں شہر آناں آپ ءِ پھجاری ءِ تہ ءَ گیشی ءِ واستہ کسانیں ءُ دراجیں مدتی گامگیج آنی سر ءَ چار ءُ تپاسی کنگ بوت۔ اسلام آباد ءَ گیش بوھوکیں آپ ءِ کمیگ ءَ گوں گر ءُ چیل بوھگ ءِ واستہ ایمرجنسی ایکشن پلان ءِ سرا عمل کنگ ءِ پیسلہ کنگ بوتگ۔ شمبے ءِ روچ ءَ برجم داشتگیں دیوان ءَ تہی کارانی وزیر ءِ مملکت طلال چوہدری، مزن وزیر ءِ مشیر سید توقیر شاہ، تہی کارانی وزارت، سی ڈی اے، واپڈا ءُ راولپنڈی انتظامیہ ءِ مزنیں کارندہ آنی بھر زوری بوتگ۔ دیوان ءَ آپ ءِ ذخیرہ ءُ بہر ءُ بانگ ءِ نظام ءَ را مھکم کنگ ءِ بازیں تجویز آنی سر ءَ چار ءُ تپاسی کنگ بوت۔ وفاقی وزیر محسن نقوی ءَ اے موہ ءِ سر ءَ گوشت کہ کیپیٹل ڈویلپمنٹ اتھارٹی پنجاب حکومت ءِ گوما یکجائی ءَ نوکیں ڈیم جوڑ کنت تانکہ اسلام آباد ءُ راولپنڈی ءِ دراجیں مدت ءِ آپ ءِ ضلورت آناں پیلو کنت۔ گند ءُ نند ءِ ساھت ءَ حکام ءَ چارہ، دوترا ءُ شہدرہ ڈیم ءِ منصوبگاں ھوار کسانیں ڈیم ءُ آپی ذخائر آنی منصوبگ بندی ءُ پیشرفت ءِ ھوالگ ءَ سرپدی دات۔ واپڈا ءُ سی ڈی اے ءِ کارندہ آں دارالحکومت ءِ شہری ءُ میتگ ءِ دمگاں آپ ءِ رسگ ءَ را گیش کنگ ءِ مول ءُ مراد ءَ فزیبلٹی رپورٹ، ٹائم لائن ءُ جتا جتائیں آپشن پیش کتگ۔ دیوان ءَ دو سال ءِ تہ ءَ ڈوتارا ڈیم ءِ سرجمی ءِ منظوری داتگ کہ ایشی ءِ تہ ءَ 110میگا ڈی ءِ زِر ءَ ایر کنگ ءِ ھاترا جوڑ کنگ بوتگ۔ وفاقی وزیر محسن نقوی ءَ آپ ءِ استیں نظام ءِ تہ ءَ کوتاہی آنی سر ءَ جیڈھ ءِ درشانی کت ءُ آپ ءِ بھر ءُ بانگ ءِ نیٹ ورک ءَ را اوور ہال کنگ ءِ ضلورت ءِ سر ءَ زور پر دات۔ آئی ءَ سیادی داروکیں محکمہ آناں ہدایت کت کہ آ ترندیں رنگ ءَ نظام ءِ کوتاہی آناں پجارینگ ءُ بے رکاوٹیں آپ ءِ رسگ ءَ را دل یکیمی کنگ ءِ واستہ موثر میکانزم ءِ سر ءَ عمل کنگ بہ بنت۔ اسلام آباد ءِ نندوکیں مردمانی آپ ءِ پھجارینگ ءَ را وتی ”اولی ترجی“ لیکگ ءَ محسن نقوی ءَ واکدار آناں ہدایت کتگ کہ آ زوتیں آپ ءِ لوٹ آنی پیلو کنگ ءِ واستہ درستیں دستیابیں وسیلگ آناں کارمرد کنان ءَ کوتاہ مدتی منصوبگ ءِ چیر دستی ءَ زوت ءُ موثر گامگیج بہ زور اَنت۔ آئی ءَ آپ ءِ دُزی ءُ کنکشن ءِ ناجائز کارمرز کنگ ءِ سر ءَ ھم سکیں کارروائی ءِ پرمان داتگ۔ وزیر داخلہ ءَ آپ ءِ دستیابی ءُ سپلائی ءِ ھوالگ ءَ پیشرفت ءَ را ترند کنگ ءِ واستہ 10روچ ءِ یک جامع روڈ میپ ءِ لوٹ کتگ ءُ آپ ءِ درستیں منصوبگ آنی سر ءَ عمل کنگ ءِ واستہ کارروائی ءِ لائکیں گامگیج آناں دیم ءَ آؤرتگ۔ گند ءُ نند ءَ ہوم سیکرٹری، ایڈیشنل ہوم سیکرٹری، سی ڈی اے ءِ چیئرمین، راولپنڈی کمشنر ءُ سی ڈی اے بورڈ ءِ باسکاں ہوار مزنیں کارندہ آنی بہر زورگ بوتگ۔