کتاب یا آٹو بائیوگرافی ءِ نبشتہ کنگ ءَ راستی ءُ گواچنی  گیشتر المی اِنت، نبشتہ کار ءِ سرا اخلاقی ذمہ واری اِنت کہ آ راجدپتر ءَ گوں ایمانداری ءَ دیم پہ دیم بہ بیت، یوسف رضا  گیلانی

کراچی۔9جنوری  (اے پی پی): چیئرمین سینیٹ سید یوسف رضا  گیلانی ءَ گشتگ کہ ہرچ کتاب یا آٹو بائیوگرافی ءِ نبشتہ کنگ ءَ راستی ءُ گواچنی گیشتر المی انت، پرچا کہ نبشتہ کار ءِ سرا اخلاقی ذمہ واری انت کہ آ راجدپتر ءَ گوں ایمانداری ءَ دیم پہ دیم بہ بیت۔ جمعہ ءِ روچ ءَ کراچی ءَ برجم داشتگیں راجی اسمبلی ءِ باسک ڈاکٹر مرزا اختیار بیگ  ءِ اقتصادی سرھالانی سر ءَ کتاب ’’معیشت ءُ پارلیمنٹ‘‘ ءِ شنگ کنگ ءِ مراگش ءَ ھاسیں مہمان ءِ بستار ءَ بھر زوری کنان ءَ آئی ءَ گوشت کہ آئی ءَ وتی کتاب ’’چاہ یوسف سی سدا‘‘ ءِ نبشتہ کنگ وتی کسانی ءَ چہ بندات کتگ۔ آئی ءَ گوشت کہ سفرنامہ ءِ نبشتہ کنگ بوت کنت کہ نسبتا آسان بہ بیت بلے راجدپتر ءِ رد  ءَ وتی زند ءِ نبشتہ کنگ ءَ ہمت، تسلسل ءُ یکوئی ءِ ضلورت اِنت۔ سید یوسف رضا گیلانی  ءَ اے گپ ءِ سر ءَ زور پر دات کہ معیشت ءُ پارلیمنٹ ءِ نیام ءَ یکے دومی ءَ گوں سیادی ناگزیر اِنت ءُ اے دوئیں پڑ آنی تہ ءَ چہ ھچ یکے ءَ را یلہ کنگ نہ بیت۔ آئی ءَ گوشت کہ راجی جیڈھ آنی گیواری ایوک ءَ اجتماعی سوچ، گپ ءُ تران ءُ یکجائی تجربت آنی وسیلگ ءَ ممکن انت۔ پارلیمانی کارانی بابت ءَ گیش زانشتی لبزانک ءِ ضلورت ءِ سر ءَ زور پر دیان ءَ آئی ءَ گوشت کہ اے رنگیں نبشتانک نوکیں نسل ءَ را ملک ءِ حکومت داری ءُ جمہوری نظام ءِ سرپد بوھگ ءَ کمک رسیت۔ آئی ءَ ڈاکٹر مرزا اختر باغہ ءَ را کتاب ءِ چاپ ءُ شنگ ءِ سر ءَ مبارکی دات ءُ کتاب ءَ را ارزشتی ایں ءُ المی ئیں وانگ ءِ نام دات۔ اے موہ ءِ سر ءَ تران کنان ءَ ڈاکٹر مرزا اختر باغا ءَ گوشت کہ ’’ معیشت ءُ پارلیمنٹ‘‘ آئی ءِ 12می کتاب انت۔ آئی ءَ گوشت کہ گوستگیں 23سال آنی تہ ءَ گورننس، بزنس کمیونٹی ءُ معیشت ءِ ھوالگ ءَ ھزار ءَ چہ گیش کالم نبشتہ کتگ۔ آئی ءَ وتی زندنامگ ”بے حد“ ءِ ھم گپ جتگ کہ آئی ءِ تہ ءَ آئی ءَ وتی واھگ درشان کتگ کہ پاکستانی بوھگ ءِ ھچ حد ءُ سیمسر مہ بیت۔  مراگش ءَ مزن وزیر آزات   کشمیر، چین  ءِ  قونصل جنرل، عراق  ءِ  قونصل جنرل، مراکش  ءَ  پاکستان  ءِ  قونصل جنرل، گورنر خیبر پختونخوا فیصل کریم کنڈی، صوبائی وزیر سندھ ناصر حسین شاہ، پاکستان پیپلز پارٹی ءِ سروک   نوید قمر  ءُ نفیسہ شاہ، نامدار  یں ندکار انور مقصود، نامداریں اھوالکار حمابقائی ءَ ھوار  سیاسی، سفارتی، علمی ءُ اھوالکاری دمگ آنی ٹوھ ٹوھیں پرسنالٹی آں بھر زوری کت۔