مزن وزیر شہباز شریف ءَ امارات ءِ ’سجوانی گروپ‘ ءِ ڈل ءَ گوں گند ءُ نند کتگ، پاکستان ءِ ڈیجیٹل اکانومی، اماراتی سرمایہ کارانی گیش بوھوکیں واھگ داری  ءَ را وش اتک

اسلام آباد۔9جنوری  (اے پی پی): مزن وزیر محمد شہباز شریف ءَ پاکستان ءِ ڈیجیٹل  اکانومی، امارات ءِ سرمایہ کار آنی گیش بوھوکیں واھگی ءِ سر ءَ چمشانک دیان ءَ گوشت کہ پاکستان ءُ امارات ءِ نیام ءَ دیریں براتی سیادی گیش موثر اقتصادی کمک ءُ سرمایہ کاری ءِ نیمگ ءَ روگ ءَ انت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ جمعہ ءِ روچ ءَ امارات ءِ مزنیں کاروباری گل ’’سجوانی گروپ‘‘ ءِ ڈل ءَ مزن وزیر محمد شہباز شریف ءَ گوں گند ءُ نند کتگ۔ مزن وزیر ءَ ڈل ءَ گوں تران کنان ءَ گوشت کہ پاکستان ءُ امارات ءِ نیام ءَ گہتریں، دیریں ءُ براتی سیادی است انت کہ ایشی ءِ بنیات وت مہ وتی دل یکیمی ءُ شرپ ءِ سر ءَ انت۔ آئی ءَ گوشت کہ گوستگیں روچاں شیخ محمد بن زاید النہیان ءِ پاکستان ءِ تر ءُ تاب ءَ چہ دوئیں ملک آنی نیام ءَ شریکداری ءَ را گیش مھکم کتگ ءُ کمک ءَ را دیمروئی دیگ ءِ واستہ جوانیں چاگرد جوڑ کتگ۔ مزن وزیر ءَ اے گپ ءِ سر ءَ دل یکیمی ءِ درشان کت کہ گوستگیں مزن تک ءِ رابطہ ءُ ایکسچینج ءَ چہ پاکستان ءُ امارات ءِ جندی شعبہ ءُ سرمایہ کار آنی نیام ءَ وت مہ وتی بھروسہ ءِ تہ ءَ گیشی بوتگ ءُ وت مہ وتی کمک ءَ را دیمروئی دیگ ءِ واستہ مھکمیں بنیات ایر کنگ بوتگ۔ آئی ءَ گوشت کہ پاکستان ءِ حکومت ءَ انفارمیشن ٹیکنالوجی، ڈیجیٹل انوویشن، بلاکچین ءُ اے دگہ نوکیں ٹیکنالوجی ءِ شوبگ آنی تہ ءَ بزنس ٹو بزنس (بی ٹو بی) کمک ءَ را ھاسیں ارزشت داتگ۔ مزن وزیر ءَ پاکستان ءِ ڈیجیٹل معیشت ءِ تہ ءَ اماراتی سرمایہ کار آنی تہ ءَ گیش بوھوکیں دلگوشی ءَ را وش اتک کت۔ آئی ءَ گوشت کہ امارات ءِ سرمایہ کاری، نوآبادیاتی ءُ گلوبل کنکٹیویٹی ءُ پاکستان ءِ انسانی وسائل اقتصادی دیمروئی ءِ واستہ سک باز پائدگ مندیں شریکداری انت۔ ساجوانی گروپ ءِ ڈل ءَ پاکستان ءَ سرمایہ کاری ءُ اقتصادی شریکداری ءِ موہ آنی ھوالگ ءَ گیش کمک ءِ واستہ وتی جزم ءِ یک رند ءَ پدر کت۔ مزن وزیر محمد شہباز شریف ءَ دل یکیمی ءِ درشان کت کہ نجی شوبگ ءِ کمک ءَ را گیش کنگ ءَ چہ دوئیں ملک آنی سیاسی سروکی ءِ مھکمیں کمک ءَ چہ پاکستان ءُ امارات ءِ نیام ءَ اقتصادی کمک ءَ را نوکیں بالاد ءَ سر کنت۔ ساجوانی گروپ ءِ ڈل ءَ مزن وزیر ءِ پاکستان ءَ جوانیں وش آتک ءُ مہمان داری ءِ پد ءَ شگر ءُ منت گپت۔ ایشی ءَ پد مزن وزیر ءَ ڈل ءِ شرپ ءَ  سبارگ ءِ نان ءِ میزبانی کت۔