درئی کارانی کارگس ءِ جارکش طاہر حسین آندرابی ءِ ھپتگی پریس بریفنگ ءَ پاکستان کشمیری راج ءِ عادلانہ جہد ءِ واستہ بے مٹیں اخلاقی، سیاسی ءُ سفارتی کمک ءَ برجاہ دار ایت، پریس بریفنگ

اسلام آباد۔8جنوری  (اے پی پی): پاکستان ءَ یک رندے پد ءَ وتی کوھنیں  لیکہ  ءِ پدا زور دات کہ آ کشمیری الس ءِ وت واجہی ءِ حق ءِ واستہ وتی انصاف ءِ جہد ءَ بے دروریں اخلاقی، سیاسی ءُ سفارتی کمک ءَ برجاہ دار ایت۔ درئی کارانی کارگس ءِ جارکش طاہر حسنت آندرابی ءَ پنچ شمبے ءِ روچ ءَ ھپتگی پریس بریفنگ ءِ تہ ءَ گوشت کہ 5 جنوری ءَ پاکستان ءِ الس ءَ جموں کشمیر ءِ الس ءِ گوما وت واجئی ءِ ھک ءِ روچ برجم داشتگ۔ آئی ءَ گوشت کہ اے روچ اقوام متحدہ ءِ 1949ءِ قرارداد ءِ یات ءَ کنگ بیت ایشی ءِ تہ ءَ کشمیری الس ءِ اقوام متحدہ ءِ چیردستی ءَ آزات ءُ منصفانہ رائے شماری ءِ وسیلگ ءَ وتی آیوکیں باندات ءِ ٹھینگ ءِ ھک ءَ را منگ بیت۔ ترجمان ءَ گوشت کہ میاں اوستمانی کانود اقوام متحدہ ءِ منشور ءِ تہ ءَ ھواریں بنیاتی رھبند ءِ رنگ ءَ وت واجہی ءِ ھک ءَ را من ایت ءُ گوستگیں ھپت دہائی آنی تہ ءَ کشمیری راج ءَ را بھارت ءِ نیمگ ءَ چہ اے ناگزیریں ھک ءَ چہ زبھر کنگ بوتگ۔ آئی ءَ گوشت کہ جموں کشمیر ءِ سر ءَ بھارت ءِ برجاھیں ناجائزیں قبضہ مئے وھد ءِ المناکیں ءُ گیش ءُ گیوار نہ بوتگیں جیڈھ آنی تہ ءَ یک اِنت۔ ترجمان ءَ گوشت کہ جموں ءُ کشمیر ءِ اُلس بھارت ءِ ناجائزیں قبضہ ءِ چیر دستی ءَ منظم زلم ءُ زوراکی، منظم انسانی ھک آنی لگتمالی ءُ بنیاتی ھک ءُ انسانی شرپ ءِ رد کنگ ءِ آماچ اَنت۔ آئی ءَ گوشت کہ بھارت مُدام کشمیری الس ءِ جائزیں حکومت ھاسیں رنگ ءَ میڈیا ءَ را ھاموش کنگ ءِ کوشست ءَ کنگ ءَ انت۔ کشمیری چاگردی بندیگ آنی کساس ءَ مدام گیشی بوھگ ءَ اِنت وھدے کہ قبضہ گیریں واکداراں قبضہ گیریں دمگ ءَ 16 چاگردی گل آنی سر ءَ بندش جتگ۔ بے گناہیں کشمیریانی پروفائلنگ، آزار ءُ اذیت، بے رھبندیں دزگیر کنگ ءُ نام نہاد "کارڈن ءُ پٹ ءُ پول” ءِ کارروائی مقبوضہ دمگ ءَ دود ءُ ربیدگ جوڑ بوتگ۔ درئی کارانی کارگس ءِ جارکش ءَ گوشت کہ ھزاراں کشمیری سروک ءُ سول سوسائٹی ءِ کارکن لاک ڈاؤن ءِ سکیں گرانیں جاوراں برداشت کنگ ءَ اَنت۔ مصرت عالم، شبرا احمد شاہ، آشم اندرابی، ڈاکٹر قاسم فکتو، ایڈووکیٹ عبدالقوام، فہمیدہ صوفی ءُ دگہ بازیں راہشون سالانی سال اِنت کہ لاک ڈاؤن ءَ اَنت۔ محمد یاسینش ملک ءَ را نام نہاد عدالتی عمل ءَ پد سزا دیگ بوتگ ءُ ھندی قبضہ گیریں واکدارانی انتقامی کارروائیانی سبب ءَ خرم پرویز ءُ صحافی عرفان مراج انگت ءَ زندان ءَ اَنت۔ طاہر حسنی اندرابی ءَ گوشت کہ 5اگست 2019ءَ بھارت ءِ ناجائزیں ءُ یک نیمگی کارروائی ڈیموگرافک بدلی ءِ وسیلگ ءَ بھارت ءِ ناجائزیں قبضہ ءَ را مھکم کنگ ءِ بے دروریں کوشست اِنت۔ آئی ءَ گوشت کہ اے کار کشمیری اُلس ءَ را وتی وتن ءِ تہ ءَ بے احترام ءُ محرومیں کمیونٹی ءِ جوڑ کنگ ءِ مول ءُ مراد انت کہ ایش میاں اوستمانی کانود ءُ وت واجئی ءِ ھک ءِ منگ بوتگیں رھبند آنی پد ءَ پدریں ھلاپ ورزی انت۔ ترجمان ءَ گوشت کہ بھارت ءِ مقبوضہ جموں ءُ کشمیر ءَ دہائی آنی زلم ءُ زوراکی ءُ بے حسابیں قربانی آنی باوجود کشمیری راج ءَ وتی جائزیں وت واجہی ءِ حق ءِ ھاترا وتی جہد ءِ تہ ءَ مھکمیں رنگ ءِ درشان کتگ۔ آئی ءَ گوشت کہ پاکستان کشمیری الس ءِ وت واجئی ءِ ھک ءِ واستہ وتی بے مٹیں اخلاقی، سیاسی ءُ سفارتی کمک ءَ را برجاہ دارگ ءِ واستہ وتی جزم ءِ یک رند ءَ پدر کنت۔